تۇركىستان وبلىسىنىڭ قازىعۇرت اۋدانىندا 2 گا جەر اۋماعىندا جىلدام پىسىرىلەتىن كەسپە شىعاراتىن زاۋىت ءوندىرىسىن كەڭەيتۋ بويىنشا اۋقىمدى جاڭعىرتۋ جۇمىستارى باستالدى.

2018 جىلدىڭ قاراشا ايىندا زاۋىتتىڭ بۇرىنعى يەسى — قازاقستاندىق كاسىپكەر مەن نەپال ەلىنىڭ تۇڭعىش ميللياردەرى بينود چوۋدحاريگە تيەسىلى «Chaudhary Group» (CG Global) كورپوراسياسى اراسىندا زاۋىتتى ساتىپ الۋ تۋرالى كەلىسىم جاسالدى. مامىلە اياقتاعاننان كەيىن جاڭا كومپانيا قاجەتتى جابدىقتاردى ورناتىپ، ەكىنشى وندىرىستىك جەلىنى سالۋ جۇمىستارىنا كىرىستى.

«CG Global» كورپوراسياسىنىڭ ەنشىلەس كاسىپورنى «CG Foods Central Asia» كومپانياسى 2019 جىلدىڭ ناۋرىزىندا ءوندىرىستى ىسكە قوسىپ، جىلىنا 1100 توننا ءونىم شىعارۋدى جوسپارلاۋدا.

كيشور لودحا، «CG Foods Central Asia» كومپانياسىنىڭ باس ديرەكتورى:

«تۇركىستان وبلىسىندا باستاپقى كەزدە ءونىمنىڭ 10 ءتۇرىن شىعارۋدى كوزدەپ وتىرمىز. بارلىق وندىرىستىك تەحنولوگيالار ەۋروپالىق ساپا ستاندارتتارىنا سايكەس كەلەدى. زاۋىت جانىنان تاعى جاڭا سەح سالامىز، وندا كەسپەگە ارنالعان ارنايى دامدەۋىشتەر شىعارىلادى».

ءونىم دايىنداۋدا وتاندىق شيكىزات: ۇن، تۇز، قانت، سارى ماي جانە باسقا كومپونەنتتەر قولدانىلادى. 70% — جەرگىلىكتى شيكىزات، 30% — مالايزيا، سينگاپۋر جانە ءۇندىستاننان الىنعان شيكىزات. كەسپە 2019 جىلدان باستاپ ورتالىق ازيا ەلدەرىنە ەكسپورتتالادى.

«CG Global» كورپوراسياسىنىڭ يەسى بينود چوۋدحاري 2013 جىلى Forbes تىزىمىنە ەنگەن. الەمنىڭ 30-دان استام ەلىندە 11 ءتۇرلى باعىتتا جۇمىس ىستەيتىن 80 كومپانياسىنان قۇرالعان (6 مىڭ قىزمەتكەر) يمپەريانى قۇرۋ ءۇشىن وعان 40 جىل قاجەت بولدى. بۇگىندە ونىڭ بايلىعى $ 1،5 ملرد.قۇرايدى.