قازاقستاندا جولاۋشى تاسىمالى كەزىندە جول قوزعالىسى قاۋىپسىزدىگى تالاپتارىنىڭ ءجيى بۇزىلۋىنا بايلانىستى «قازاۆتوجول» ۇلتتىق كومپانياسى تاكسي جۇرگىزۋشىلەرىنە ارنايى ۇندەۋ جاريالادى، دەپ حابارلايدى Dalanews.kz.

كومپانيا سوڭعى ۋاقىتتا جۇرگىزۋشىلەردىڭ كولىكتى باسقارا وتىرىپ، ءموبيلدى تەلەفوندى بەلسەندى پايدالانۋى كوبەيگەنىن اتاپ ءوتتى. بۇل جاعداي جولاۋشىلاردىڭ ومىرىنە تىكەلەي ءقاۋىپ توندىرەدى.

استانا – پاۆلودار باعىتىنداعى سوڭعى وقيعادا كەيبىر جۇرگىزۋشىلەر بىرنەشە سەرۆيسكە قاتار قوسىلىپ، جول ۇستىندە تاپسىرىس ىزدەپ، حابارلاما جازىپ، الەۋمەتتىك جەلىلەر مەن ۆيدەوكونتەنت قاراپ وتىرعانى انىقتالعان.

«مۇنداي ارەكەتتەر جولاۋشىلاردىڭ ءومىرى مەن دەنساۋلىعىنا ۇلكەن ءقاۋىپ توندىرەدى جانە قازاقستان رەسپۋبليكاسىنىڭ جول قاۋىپسىزدىگى تۋرالى زاڭناماسىن ورەسكەل بۇزۋ بولىپ سانالادى»، – دەپ مالىمدەدى كومپانيا.

قازاۆتوجول ەسكەرتكەن تالاپتار:

1. كولىك قوزعالىسى كەزىندە تەلەفوندى قولدانۋعا تىيىم سالىنادى. تەك گرومكيي سۆياز رەجيمى نەمەسە جولدان كوز اۋدارتپايتىن ناۆيگاسيانى قولدانۋعا رۇقسات.

2. بىرنەشە تاكسي سەرۆيسىندە قاتار جۇمىس ىستەۋ جۇرگىزۋشىنىڭ جولدان نازارىن اۋدارماۋى ءتيىس.

3. جولاۋشى ەسكەرتۋ جاساعان جاعدايدا جۇرگىزۋشى دەرەۋ ءقاۋىپتى ارەكەتىن توقتاتۋى قاجەت.

4. قاۋىپسىزدىك تالاپتارىن ەلەمەۋ – ايىپپۇل سالۋ، سەرۆيس تاراپىنان بۇعاتتاۋ نەمەسە زاڭ اياسىندا جاۋاپكەرشىلىككە تارتۋعا نەگىز بولادى.

5. جولاۋشىنىڭ قاۋىپسىزدىگى مەن كولىكتى اپاتسىز باسقارۋ – ءاربىر تاكسي جۇرگىزۋشىسىنىڭ باستى مىندەتى.

كومپانيا جۇرگىزۋشىلەردى كاسىبي ستاندارتتاردى ساقتاۋعا، جولاۋشىلارعا قۇرمەتپەن قاراۋعا جانە تاسىمالداۋدىڭ بارلىق كەزەڭىندە قاۋىپسىزدىكتى قامتاماسىز ەتۋگە شاقىردى.

«جاۋاپكەرشىلىكتى مىنەز-قۇلىق قانا جولاۋشىلار سەنىمىن ارتتىرىپ، تاكسي قىزمەتىنىڭ ساپاسىن كوتەرەدى»، – دەپ اتاپ وتەدى قازاۆتوجول.