بۇگىن «قازاقتەلەكوم» اق جانە اقپاراتتاندىرۋ جانە بايلانىس قىزمەتكەرلەرىنىڭ سالالىق كاسىپتىك وداعى تۇزەتىلگەن جاڭا ۇجىمدىق شارتقا قول قويدى. جاڭارتىلعان قۇجات، ۇزاق مەرزىمدى جانە سىندارلى ىنتىماقتاستىقتىڭ ناتيجەسى، ەڭبەك جاعدايلارىن جاقسارتىپ، قىزمەتكەرلەرگە كورسەتىلەتىن الەۋمەتتىك قولداۋدى نىعايتۋعا باعىتتالعان، دەپ حابارلايدى Dalanews.kz.
«بۇگىن قول قويىلعان قۇجات تەك رەسمي كەلىسىم ەمەس. بۇل ءار قىزمەتكەرگە دەگەن قامقورلىعىمىزدىڭ دالەلى. ءبىز كومپانيادا ەڭبەك جاعدايلارى بارىنشا ءادىل بولىپ، قىزمەتكەرلەردىڭ ءال-اۋقاتى باستى باسىمدىعىمىز بولىپ قالۋى ءۇشىن جۇمىستى جالعاستىرا بەرمەكپىز»، - دەپ اتاپ ءوتتى «قازاقتەلەكوم» اق باسقارما ءتوراعاسى باعدات مۋسين.
جاڭا ۇجىمدىق شارتقا سايكەس، نەكەگە تۇرۋ نەمەسە بالا تۋۋ سياقتى ومىرلىك جاعدايلاردا جۇمىسشىلارعا ماتەريالدىق تولەمدەر كوبەيتىلدى. سونداي-اق، قىزمەتكەر ءومىرىنىڭ ءتۇرلى سالالارىندا قوسىمشا جەڭىلدىكتەر قاراستىرىلعان.
جۇمىسشىلار مەن ولاردىڭ بالالارىنىڭ دەنساۋلىعىن نىعايتۋعا ەرەكشە كوڭىل بولىنەدى. جاڭارتىلعان ۇجىمدىق شارتتا سپورتتىق-ساۋىقتىرۋ ءىس-شارالارى مەن بالالار لاگەرلەرىنە تولەمدەر ۇلعايتىلدى.
سونىمەن قاتار، كومپانيادا «دەمەۋ» (كوپ بالالى وتباسىلار مەن ەرەكشە قاجەتتىلىكتەرى بار بالالارى بار وتباسىلار ءۇشىن)، جەڭىلدىكتى شارتتارمەن يپوتەكالىق نەسيەلەۋ جانە ت.ب. سياقتى الەۋمەتتىك قولداۋ باعدارلامالارى جۇمىس ىستەيدى.
بيىل «قازاقتەلەكوم» اق ۇجىمدىق شارتىنا 25 جىل تولدى.
«قازاقتەلەكوم» اق الەۋمەتتىك ساياساتىن ودان ءارى جەتىلدىرىپ، ءوز قىزمەتكەرلەرىنىڭ لايىقتى دەڭگەيدە، ءقاۋىپسىز جۇمىس ىستەۋى ءۇشىن جاعداي جاساۋدى جالعاستىرا بەرمەك.
