قازاقستاننىڭ ماقسارى مايى جاپونياعا ەكسپورتقا شىعارىلدى.

«Kaz-Ir AGRO» ج ش س العاش رەت 37،3 توننا كولەمىندە ماقسارى مايىن جاپونياعا جونەلتتى. 

«Kaz-Ir AGRO» ج ش س – قازاقستان تاريحىنداعى جاپونياعا ازىق-تۇلىك ونىمدەرىن  جەتكىزەتىن، ماقسارى وسىرۋگە، سونداي-اق سالقىنداي سىعىلعان، تازارتىلماعان ماقسارى مايىن وندىرۋگە مامانداندىرىلعان العاشقى كومپانيا.   

جاپونياعا ماقسارى مايىن ەكسپورتتاۋ تۋرالى كەلىسىمشارتتى قازاقستاندىق ەكسپورتتاۋشى اعىمداعى جىلدىڭ ماۋسىم ايىندا جاسادى.

«KazakhExport» ەسك» اق «قارىزدى ساقتاندىرۋ» ءونىمى بويىنشا 200 000 000 تەڭگە سوماسىنا ساقتاندىرۋ قورعانىسىن بەرۋ ارقىلى قولداۋ كورسەتتى

سونىڭ ناتيجەسىندە «Kaz-Ir AGRO» ج ش س اگرارلىق نەسيە كورپوراسياسىندا شيكىزات (ماقسارى) ساتىپ الۋعا كرەديت جەلىسىن تارتتى.

جاپونيا – تەحنولوگيانى قاتاڭ ساقتاپ، ءوندىرىستىڭ ساپاسىن ءجىتى قاداعالاۋمەن بۇكىل الەمگە تانىمال بولعان ساپا ەلى. قازاقستاندىق ەكسپورتتاۋشى 6 اي بويى ساپانى راستاۋعا، مەملەكەتتىك جانە حالىقارالىق ستاندارتتارعا سايكەستىككە جۇرگىزىلگەن زەرتحانالىق تالداۋلار بويىنشا مۇقيات تەكسەرۋدەن ءوتتى.

«Kaz-Ir AGRO» ءۇشىن جاپونيامەن ىنتىماقتاسۋ – ءىرى تۇتىنۋشىلار نارىعىنا شىعۋعا  مۇمكىندىك. قازىرگى ساتتە كومپانيا نيدەرلاندقا ماقسارى مايىن جەتكىزۋ بويىنشا جىلدىق كەلىسىمشارتتى جاساۋ جونىندە كەلىسسوزدەر جۇرگىزۋدە.

2018 جىلدىڭ ءبىرىنشى جارتىجىلدىعىندا كاسىپورىن 400 توننا كولەمىندەگى ءونىمدى ەكسپورتقا شىعاردى. ماقسارى مايى جۇڭگو، چەحيا، جاپونيا، رەسەي جانە وزبەكستان ەلدەرىنە ەكسپورتتالادى.

بيىلعى جىلى «Kaz-Ir AGRO» ج ش س ءوزىنىڭ 11 جىلدىعىن اتاپ ءوتتى. وسى ۋاقىت ىشىندە كومپانيا قازاقستانداعى، سونداي-اق شەتەلدەگى سەرىكتەستەرى مەن كليەنتتەرىنىڭ سەنىمىن جاۋلاپ العان.