استانادا ەكسپو كورمەسى وتۋدە. كورمەنىڭ اياسىندا وتكىزىلىپ جاتقان شارالار دا جەتىپ ارتىلادى. سولاردىڭ ءبىرى شيەۆرون كومپانياسى قولداۋ كورسەتكەن "قازاقستاننىڭ بولاشاق ەنەرگياسى" بايقاۋى.

وسىعان وراي تۇڭعىش پرەزيدەنت اتىنداعى كىتاپحانادا بالالار مەن جاسوسپىرىمدەرگە ارنالعان "قازاقستاننىڭ بولاشاق ەنەرگياسى" رەسپۋبليكالىق كونكۋرسىنىڭ قورىتىندىسىنا ارنالعان كورمەنىڭ سالتاناتتى اشىلۋى بولدى.

شارا اياسىندا بايقاۋ جەڭىمپازدارىنىڭ اتى-جوندەرى بەلگىلى بولىپ، بايقاۋعا قولداۋ كورسەتكەن "شيەۆرون" كومپانياسى مەن يۋنەسكو كلۋبى – بالالار شىعارماشىلىق مەكتەبى جارىس جەڭىمپازدارىن ماراپاتتادى.

– ءبىزدىڭ كومپانيامىز قازاقستانعا 1993 جىلى كەلدى. ءبىز قازاقستاننىڭ تاريحىنداعى تاۋەلسىز ەلدىڭ العاشقى جىلداعى باستامالارىنا بارىنشا قولداۋ كورسەتكەن ءىرى ينۆەستوردىڭ ءبىرىمىز، – دەدى شارانىڭ شىمىلدىعىن تۇرگەن "شيەۆرون" كومپانياسىنىڭ وكىلى لەيلا ايتمۇقانوۆا.

ونىڭ ايتۋىنشا، بولاشاق ەنەرگياسى ادامداردىڭ قولىمەن جاسالادى. وسىنىڭ ارقاسىندا ءومىرىمىز وزگەرەدى.

– قازاقستانعا كەلگەن العاشقى كۇندەردەن باستاپ ءبىز بۇلدىرشىندەرگە ارنالعان جوبالارعا قولداۋ كورسەتىپ كەلەمىز. بۇل جوبا "شيەۆرون" جۇزەگە اسىرىپ جاتقان كوپتەگەن الەۋمەتتىك جوبالار سياقتى ەرەكشە ماڭىزعا يە"

– دەدى لەيلا ايتمۇقانوۆا.

ال استانادا ەكسپو كورمەسى ءوتىپ جاتىر. كورمە 10 قىركۇيەككە دەيىن سوزىلادى. وزدەرىڭىز بىلەتىندەي كورمەنىڭ تاقىرىبى "بولاشاق ەنەرگياسى" جانە سونىڭ اياسىندا تۋىندايتىن ءتۇرلى جوبالار. وسىناۋ اۋقىمدى شارادا ەنەرگيا كوزدەرىنىڭ جاڭا، زاماناۋي، ەكولوگيالىق تۇرعىدان العاندا تازا ءارى قولدانۋ قۇنى ارزان جوبالارى تانىستىرىلىپ جاتقان جايى بار.

بۇل رەتتە "قازاقستاننىڭ بولاشاق ەنەرگياسى" بايقاۋىنىڭ قاتىسۋشىلارى دا بارىنشا دايىندالعانى كورىنىپ تۇر. بالانىڭ كوزىمەن قاراعانداعى قازاقستان قانداي؟ بايقاۋ قاتىسۋشىلارى وسى جاعىنا نازار اۋدارىپ، ەلىمىزدىڭ تابيعاتى، تاۋ-تاسى، قالالارى مەن اۋىلدارىن سۋرەت ونەرى ارقىلى جەتكىزگەن ەكەن.

بۇل كورمەدە 12 مەن 16 جاس ارالىعىنداعى قاتىسۋشىلاردىڭ 100-دەن اسا جۇمىستارى تانىستىرىلدى. بالالاردىڭ بارلىعى تالانتتى. ولار ەلىمىزدەگى سۋرەت ونەرى مەن شىعارماشىلىق قابىلەتتى دامىتاتىن مەكتەپتەردە ءبىلىم الادى. ال بايقاۋعا ۇسىنىلعان جۇمىستاردى سۋرەتشىلەر وداعىنىڭ مۇشەلەرى، ونەر قايراتكەرلەرءى، قازاقستاننىڭ ەڭبەك سىڭىرگەن سۋرەتشىلەرى باعالادى.

سونىمەن قاتار بايقاۋ اياسىندا سۋرەت ونەرى، قولونەرگە قاتىستى تاجىريبە جيناۋعا مۇمكىندىك بەرەتىن شەبەرلىك ساباقتارى دا وتەدى. ارتىنشا بايقاۋ قاتىسۋشىلارى تۇڭعىش پرەزيدەنت اتىنداعى كىتاپحانا مەن ۇلتتىق مۇراجايدى ارالاۋعا مۇمكىندىك الادى.

بايقاۋعا بارلىعى 250 جۇمىس كەلىپ تۇسكەن ەكەن. وسى رەتتە جەڭىمپازداردى دا اتاي كەتكەندى ءجون كوردىك.

12-14 جاس ارالىعىنداعى بالالار اراسىندا باس جۇلدەنى ديانا وتەتىلەۋوۆا (اقتوبە قالاسى) الدى. ال 15-16 جاس ارالىعىنداعى جەتكىنشىكتەر اراسىندا استانالىق الينا ۋتايەۆا توپ جاردى.