Astanada EKSPO kórmesi ótýde. Kórmeniń aiasynda ótkizilip jatqan sharalar da jetip artylady. Solardyń biri Shevron kompaniiasy qoldaý kórsetken "Qazaqstannyń bolashaq energiiasy" baiqaýy.
Osyǵan orai Tuńǵysh Prezident atyndaǵy kitaphanada balalar men jasóspirimderge arnalǵan "Qazaqstannyń Bolashaq energiiasy" respýblikalyq konkýrsynyń qorytyndysyna arnalǵan kórmeniń saltanatty ashylýy boldy.
Shara aiasynda baiqaý jeńimpazdarynyń aty-jónderi belgili bolyp, baiqaýǵa qoldaý kórsetken "Shevron" kompaniiasy men IýNESKO klýby – balalar shyǵarmashylyq mektebi jarys jeńimpazdaryn marapattady.
– Bizdiń kompaniiamyz Qazaqstanǵa 1993 jyly keldi. Biz Qazaqstannyń tarihyndaǵy táýelsiz eldiń alǵashqy jyldaǵy bastamalaryna barynsha qoldaý kórsetken iri investordyń birimiz, – dedi sharanyń shymyldyǵyn túrgen "Shevron" kompaniiasynyń ókili Leila Aitmuqanova.
Onyń aitýynsha, bolashaq energiiasy adamdardyń qolymen jasalady. Osynyń arqasynda ómirimiz ózgeredi.
– Qazaqstanǵa kelgen alǵashqy kúnderden bastap biz búldirshinderge arnalǵan jobalarǵa qoldaý kórsetip kelemiz. Bul joba "Shevron" júzege asyryp jatqan kóptegen áleýmettik jobalar siiaqty erekshe mańyzǵa ie"
– dedi Leila Aitmuqanova.
Al Astanada EKSPO kórmesi ótip jatyr. Kórme 10 qyrkúiekke deiin sozylady. Ózderińiz biletindei kórmeniń taqyryby "Bolashaq energiiasy" jáne sonyń aiasynda týyndaityn túrli jobalar. Osynaý aýqymdy sharada energiia kózderiniń jańa, zamanaýi, ekologiialyq turǵydan alǵanda taza ári qoldaný quny arzan jobalary tanystyrylyp jatqan jaiy bar.
Bul rette "Qazaqstannyń Bolashaq energiiasy" baiqaýynyń qatysýshylary da barynsha daiyndalǵany kórinip tur. Balanyń kózimen qaraǵandaǵy Qazaqstan qandai? Baiqaý qatysýshylary osy jaǵyna nazar aýdaryp, elimizdiń tabiǵaty, taý-tasy, qalalary men aýyldaryn sýret óneri arqyly jetkizgen eken.
Bul kórmede 12 men 16 jas aralyǵyndaǵy qatysýshylardyń 100-den asa jumystary tanystyryldy. Balalardyń barlyǵy talantty. Olar elimizdegi sýret óneri men shyǵarmashylyq qabiletti damytatyn mektepterde bilim alady. Al baiqaýǵa usynylǵan jumystardy Sýretshiler odaǵynyń músheleri, óner qairatkerleri, Qazaqstannyń eńbek sińirgen sýretshileri baǵalady.
Sonymen qatar baiqaý aiasynda sýret óneri, qolónerge qatysty tájiribe jinaýǵa múmkindik beretin sheberlik sabaqtary da ótedi. Artynsha baiqaý qatysýshylary Tuńǵysh Prezident atyndaǵy kitaphana men Ulttyq murajaidy aralaýǵa múmkindik alady.
Baiqaýǵa barlyǵy 250 jumys kelip túsken eken. Osy rette jeńimpazdardy da atai ketkendi jón kórdik.
12-14 jas aralyǵyndaǵy balalar arasynda bas júldeni Diana Ótetileýova (Aqtóbe qalasy) aldy. Al 15-16 jas aralyǵyndaǵy jetkinshikter arasynda astanalyq Alina Ýtaeva top jardy.
