ايتا كەتەلٸك, اقوردا ەلٸ كٷنگە دەيٸن ۋكرايناداعى احۋالعا قاتىستى رەسمي مەلٸمدەمە جاسامادى. وسىناۋ ٷنسٸزدٸكتٸ سان-ساققا جورىعان كرەملدٸڭ پروپاگاندا قۇرالدارى وداقتاسىن وپاسىزدىق جاسادى دەپ ايىپتاۋدا.
دونەتسك مەن لۋگانسكٸنٸ مويىنداۋعا كەلگەندە بٸزدٸڭ ەلدٸڭ بەيتاراپتىق ساقتايتىنىن ايتقان مۇحتار تٸلەۋبەردٸ مەن ۇقشۇ ەسكەرٸن ۋكرايناعا جٶنەلتۋ مٷمكٸن ەمەسٸن مەلٸمدەگەن مەۋلەن ەشٸمباەۆتىڭ ريتوريكاسى كرەمل يدەولوگتارىنا ۇناماي قالسا كەرەك.
– اقوردا ەلٸپتٸڭ ارتىن باعىپ, قازٸرگٸ جاعدايدا مەسكەۋدٸڭ كٶڭٸلٸنە كەلمەيتٸن ساڭىلاۋ ٸزدەۋگە تىرىسۋدا. ەلەم رەسەيلٸك اگرەسسييانى اشىق ايىپتاپ, كرەملدٸڭ سازايىن بەرۋدٸ تالاپ ەتٸپ وتىرعان تۇستا تەپە-تەڭدٸك ساقتاۋ وڭاي ەمەس.
قازاق بيلٸگٸنٸڭ تاكتيكاسى تٶڭٸرەگٸن بارلاۋعا, كٷتۋگە نەگٸزدەلٸپ وتىر. بيلٸك قاڭتار دٷربەلەڭٸنەن ەلٸ ايىققان جوق. تٷنەۋكٷنگٸ وقيعا رەسەي الدىنداعى ساياسي -ەكونوميكالىق كٸرٸپتارلىقتى كٷشەيتە تٷستٸ.
كرەملدٸڭ ۋكرايناعا باسىپ كٸرگەن سۇعاناق ساياساتى نەمەنە تىنادى? قازاقستان مەن رەسەيدٸڭ كەلەشەكتەگٸ قارىم-قاتىناسى قالاي ٶربيتٸنٸ وسىعان بايلانىستى", – دەيدٸ ساراپشى.
...
ونىڭ پايىمداۋىنشا, كيەۆ كرەملگە تٸزە بٷككەن بولسا, بۇل قازاقستانعا دا كەرٸ ەسەرٸن تيگٸزەدٸ. اقوردا وسى سوعىستا ۋكراينانىڭ مەرەيٸ ٷستەم بولۋىنا مٷددەلٸ. ەگەر رەسەي جەڭسە, قازاقستان ەكٸنشٸ بەلارۋسكە اينالادى. مەسكەۋدٸڭ ايتقانىنا قۇلدىق ۇرىپ, اگرەسسوردىڭ سٶزٸن سٶيلەۋگە مەجبٷر بولادى.
"كيەۆكە باسىپ كٸرگەن پۋتيننٸڭ تاۋى شاعىلىپ, كەرٸ شەگٸنسە كٷللٸ پوستكەڭەستٸك كەڭٸستٸكتەگٸ ساياسي احۋال كٷرت ٶزگەرەدٸ. رەسەيدٸڭ كٷشتەۋٸمەن قۇرىلعان ساياسي-ەكونوميكالىق بلوكتار كٶپكە ۇزاماي كٷيرەيدٸ. ۇقشۇ, ەۋرازييالىق وداق سەكٸلدٸ ۇيىمدار شەتٸنەن شىتىناپ, ىدىراي باستايدى. ولاردىڭ ورنىنا ايماقتىق جوبالارعا جان بٸتٸپ, كرەملمەن تەڭ دەرەجەدە سٶيلەسەتٸن قۇرىلىمدار پايدا بولادى", – دەيدٸ ساراپشى.
...
دەۋرەن ەبەننٸڭ ايتۋىنشا, پۋتيننٸڭ اۆانتيۋراسى رەسەيدٸ قۇزعا قۇلاتىپ تىنادى. مەسكەۋ سىرت ەلەمنەن تولىق وقشاۋلانىپ, سۇراپىل سانكتسييانىڭ استىندا قالادى. بۇل بٸزدٸڭ ەلدٸ دە اينالىپ ٶتپەيدٸ.
قازاقستان 2014 جىلدان بەرٸ رەسەيگە سالىنعان سانكتسييانىڭ سالدارىن سەزٸنٸپ كەلەدٸ. وسى جولعى "ايىپپۇل" بۇرىنعىدان جويقىن, اۋقىمدى. وسى جولعى سانكتسييا قازاقستان ەكونوميكاسىن كٷيرەتٸپ كەتۋٸ مٷمكٸن. ەكٸ ەلدٸڭ تسيفرلاندىرۋ, اتوم ەنەرگەتيكاسى باعىتىنداعى ەرٸپتەستٸگٸ كەيٸنگە شەگەرٸلەدٸ.
"اقوردا كرەملدٸڭ دەگەنٸنە كٶنٸپ, ايتاعىنا ەرەر بولسا, ەرتەڭگٸ كٷنٸ ٶزٸ دە سانكتسييانىڭ استىندا قالادى. رەسەيگە قول ۇشىن سوزار بولساق, اقش پەن باتىسىڭ اشۋىنا تيەمٸز.
رەپۋتاتسيياسىن كٸرلەتكٸسٸ كەلمەيتٸن ەل رەسەيدەن اۋلاق جٷرەدٸ" دەپ بايدەن اتا بەكەر ايتقان جوق.
ال قازاقستان مەن ۋكراينا وسى كٷنگە دەيٸن سىيلاسىپ كەلەدٸ, الىس-بەرٸس, بارىس-كەلٸس ٷزٸلگەن جوق. بەرتٸن عانا بٸزدٸڭ ەل ەۋرازييالىق وداققا شىرمالىپ قالدى دا, ارامىز سۋىڭقىراپ كەتتٸ. اقوردا پەن كيەۆتٸڭ اراسىنا كرەمل دە كيلٸگە بەردٸ.
قىرىمدى باسىپ العان رەسەيدٸڭ ەرەكەتٸن ايىپتاۋدان باس تارتقان توقاەۆتىڭ سٶزٸ دە ۋكراين حالقىنىڭ كٶڭٸلٸنە تيدٸ. ەيتسە دە ارتىنان بۇل مەلٸمدەمە مەجبٷرلٸكتەن جاسالعانىن دەلەلدەپ, ۋكراينانىڭ تۇتاستىعىنا قۇرمەتپەن قارايتىنىمىزدى كٶرسەتتٸك.
قازٸر دە قازاقستان حالقىنىڭ باسىم كٶپشٸلٸگٸ ۋكراينا قولداپ وتىر. ونداعى جاعدايعا بەي-جاي قارامايتىن بەلسەندٸلەر كيەۆكە كٶمەك كٶرسەتۋدٸڭ امالىن ٸزدەۋدە. ەكٸ ەلدٸڭ اراسىنداعى ەرٸپتەستٸكتٸڭ پوتەنتسيالى مول, بولاشاعى زور. سوعىس كٸمنٸڭ پايداسىنا شەشٸلسە دە, قازاقستان ۋكراين حالقىنا قۇرمەتٸن جوعالتپايدى", – دەيدٸ ساياساتتانۋشى.
ەزٸرلەگەن, دۋمان بىقاي
