جاڭا جىل جاقىنداعان سايىن كەڭسەلەر مەن جۇمىس ورىندارىن بەزەندىرۋگە دەگەن نيەت كۇشەيەدى. الايدا الماتى قالاسىنىڭ توتەنشە جاعدايلار دەپارتامەنتى (تجد) مەرەكەلىك بەزەندىرۋ كەزىندە قاۋىپسىزدىك تالاپتارى ساقتالماسا، ايىپپۇل سالىناتىنىن ەسكەرتتى، دەپ حابارلايدى Dalanews.kz.

قاۋىپسىزدىكتىڭ نەگىزگى تالاپتارى

الماتى قالالىق تجد مالىمەتىنشە، جاڭا جىلدىق بەزەندىرۋ ءبىرقاتار تالاپقا ساي بولۋى ءتيىس:

• مەرەكەلىك ءىس-شارالار كەمىندە ەكى ەۆاكۋاسيالىق شىعۋ جولى بار جانە جانعىش جابىندارى بار عيماراتتاردا ەكىنشى قاباتتان جوعارى ەمەس ءۇي-جايلاردا وتكىزىلۋى كەرەك؛

• جاڭا جىلدىق شىرشا بەرىك نەگىزگە ورناتىلادى، شىعۋ جولدارىن بوگەمەۋى ءتيىس؛

• شىرشا بۇتاقتارى قابىرعالار مەن توبەدەن كەمىندە 1 مەتر قاشىقتىقتا ورنالاسۋى قاجەت؛

• ەگەر ءۇي-جايدا ەلەكتر جارىعى بولماسا، ءىس-شارالار تەك كۇندىزگى ۋاقىتتا وتكىزىلەدى؛

• جارىقتاندىرۋ قۇرىلعىلارى ەلەكتر قوندىرعىلارىن ورناتۋ قاعيدالارىنا ساي بولۋى كەرەك. تومەندەتكىش ترانسفورماتورسىز ەلەكتر جەلىسى قولدانىلعان جاعدايدا، شىرشادا تەك شامدارى تىزبەكتەي جالعانعان، كەرنەۋى 12 ۆولتتان اسپايتىن گيرلياندالار پايدالانىلۋى ءتيىس. شامداردىڭ رۇقسات ەتىلگەن قۋاتى – 25 ۆاتت؛

• گيرلياندالاردا اقاۋ انىقتالسا (سىمداردىڭ قىزۋى، شامداردىڭ جىپىلىقتاۋى، ۇشقىن شىعۋى)، ولار دەرەۋ ەلەكتر جەلىسىنەن اجىراتىلۋى قاجەت؛

• مەرەكەلىك ءىس-شارالار كەزىندە ساحنادا جانە زالداردا ءورت قاۋىپسىزدىگىنە جاۋاپتى ادامدار مەن ورتكە قارسى قىزمەت وكىلدەرى كەزەكشىلىك ۇيىمداستىرۋى ءتيىس. ءىس-شارا وتەتىن ءۇي-جايلار العاشقى ءورت ءسوندىرۋ قۇرالدارىمەن قامتاماسىز ەتىلۋى كەرەك.

قاۋىپسىزدىك تالاپتارى بۇزىلسا نە بولادى

ۆەدومستۆو وكىلدەرىنىڭ ايتۋىنشا، ءورت قاۋىپسىزدىگى تالاپتارىن بۇزعانى ءۇشىن اكىمشىلىك قۇقىق بۇزۋشىلىق تۋرالى كودەكستىڭ 410-بابىنا سايكەس اكىمشىلىك جاۋاپكەرشىلىك قاراستىرىلعان.

زاڭعا سايكەس، ايىپپۇل مولشەرى تومەندەگىدەي:

• جەكە تۇلعالارعا – 5 اەك (19 660 تەڭگە)؛

• لاۋازىمدى تۇلعالارعا، شاعىن بيزنەس سۋبەكتىلەرىنە جانە كوممەرسيالىق ەمەس ۇيىمدارعا – 15 اەك (58 980 تەڭگە)؛

• ورتا بيزنەسكە – 50 اەك (196 600 تەڭگە)؛

• ءىرى بيزنەسكە – 150 اەك (589 800 تەڭگە).

ەگەر ءورت قاۋىپسىزدىگى تالاپتارىنىڭ بۇزىلۋى ورتكە اكەلىپ، ماتەريالدىق شىعىن كەلتىرسە نەمەسە ادامداردىڭ دەنساۋلىعىنا زيان تيگىزسە (قىلمىستىق جاۋاپكەرشىلىكسىز):

• جەكە تۇلعالارعا – 10 اەك (39 320 تەڭگە)؛

• لاۋازىمدى تۇلعالارعا، شاعىن بيزنەس پەن ۇەۇ-عا – 20 اەك (78 640 تەڭگە)؛

• ورتا بيزنەسكە – 200 اەك (786 400 تەڭگە)؛

• ءىرى بيزنەسكە – 300 اەك (1 179 600 تەڭگە).

ال ەگەر وسى تالاپتار ءبىر جىل ىشىندە قايتا بۇزىلسا، ايىپپۇل كولەمى ارتا تۇسەدى:

• جەكە تۇلعالارعا – 10 اەك (39 320 تەڭگە)؛

• لاۋازىمدى تۇلعالارعا، شاعىن بيزنەس پەن ۇەۇ-عا – 20 اەك (78 640 تەڭگە)؛

• ورتا بيزنەسكە – 100 اەك (393 200 تەڭگە)؛

• ءىرى بيزنەسكە – 250 اەك (983 000 تەڭگە).