قازاقستاندىقتاردىڭ تابىسى ازايا باستادى، - دەپ حابارلايدى Dalanews.kz.
ۇلتتىق ستاتيستيكا بيۋروسىنىڭ سوڭعى ەسەبى بويىنشا، ءۇشىنشى توقساندا ورتاشا جالاقى 390 مىڭ تەڭگە بولدى. بۇل ءۇش اي بۇرىنعىمەن سالىستىرعاندا 13 مىڭ تەڭگەگە از (403 251 تگ).
ورتاشا جالاقى اتىراۋ (6،1) مەن قوستاناي (0،2) وڭىرلەرىندە وسكەن. تۇركىستان وبلىسىندا 17،8 پايىزعا تومەندەگەن. جامبىل مەن قىزىلوردا وڭىرلەرىندە دە 13،4-10 پايىزعا ازايعان.
ەڭ جوعارى ورتاشا جالاقى اتىراۋ وبلىسىندا – 630 894 تەڭگە.
ەڭ از ورتاشا جالاقى جەتىسۋ وبلىسىندا – 280 464 تەڭگە.
ەسكە سالايىق، بۇعان دەيىن قارجى ءمينسترى ءمادي تاكييەۆ جانە ۇلتتىق ەكونوميكا ءمينيسترى نۇرلان بايبازاروۆ قازاقستاندا جالاقى نەگە از ەكەنىن تۇسىندىرگەن بولاتىن.
مينيستر بۇگىنگى تاڭدا 100-150 مىڭ ارالىعىنداعى جالاقىنى قازاقستاندىقتاردىڭ 35 پايىزى الاتىنىن ايتتى.
"300-600 مىڭ ارالىعىندا 36 پايىزى الادى. بۇگىنگى تاڭدا ەكونوميكانىڭ كورىنىسى سونداي. جالپى كوپ كومەك بەرىلىپ جاتىر. 2-3 جىلدىڭ ىشىندە مۇعالىمدەر، دارىگەرلەردىڭ جالاقىسى كوتەرىلدى. ءالى دە كوبەيەدى دەپ سەنەمىز. ودان باسقا ەڭ تومەنگى جالاقى 85 مىڭ تەڭگە"، - دەيدى تاكييەۆ.
ال ۇلتتىق ەكونوميكا ءمينيسترى نۇرلان بايبازاروۆ ەكونوميكالىق سەكتورداعى جالاقى ءوندىرىستىڭ ونىمدىلىگىنە بايلانىستى ەكەنىن ايتادى.
"جالاقى ءبىر ورىندا تۇرعان جوق. كاسىپورىندار تابىسى ارتقان سايىن قىزمەتكەرلەردىڭ جالاقىسىن كوتەرۋگە تىرىسادى. ەكىنشى جاعىنان مەملەكەتتىك قولداۋ شارالارى كەزىندە قويىلاتىن تالاپ - قىزمەتكەرلەرىنىڭ جالاقىسىن كوتەرىپ قويۋى قاجەت. ەگەر بيۋدجەت سالاسى جايلى ايتار بولساق، وزدەرىڭىزگە بەلگىلى، كەيىنگى جىلدارى بيۋدجەت ەسەبىنەن مەملەكەتتىك، ازاماتتىق قىزمەتكەرلەرگە جالاقىنى كوتەرۋ جۇمىستارى جۇرگىزىلدى. ءالى دە جۇرگىزىلىپ جاتىر. سوندىقتان بيۋدجەتتىڭ مۇمكىندىگىنشە حالىقتىڭ ءال-اۋقاتىن كوتەرۋ ءۇشىن جۇمىستى جالعاستىرامىز"، - دەيدى بايبازاروۆ.
