قازاقستاندىقتاردىڭ جەكە دەرەكتەرى تاراپ كەتكەن وقيعاعا بايلانىستى ءىستى ۇقك تەرگەپ جاتىر، دەپ حابارلايدى Dalanews.kz.
"ۇلتتىق قاۋىپسىزدىك كوميتەتى قىلمىستىق كودەكستىڭ 208-بابى 2-بولىگى "اقپاراتتى زاڭسىز يەمدەنۋ" بويىنشا قىلمىستىق ءىستى تەرگەپ جاتىر"، - دەدى ىشكى ىستەر مينيسترلىگىنىڭ باسپا ءسوز قىزمەتى وكىلى.
بۇعان دەيىن 16 ميلليوننان اسا قازاقستاندىقتىڭ جەكە دەرەگى تاراپ كەتتى. اقپاراتتى كيبەرشابۋىلدى تالداۋ جانە تەرگەۋ ورتالىعى راستادى.
جابىق كانالدار ارقىلى تاراعان مالىمەتتەردىڭ ىشىندە ازاماتتاردىڭ تولىق ءاتى-جونى، تۋعان كۇنى، جەكە سايكەستەندىرۋ ءنومىرى، جىنىسى، ازاماتتىعى، تەلەفون ءنومىرى، مەكەن جايى جانە باسقالارى بار.
كەيىنىرەك سيفرلىق دامۋ مينيسترلىگى جاعدايدى تولىق تەكسەرىپ جاتقانىن مالىمدەدى. سوڭعى اقپارات بويىنشا مەملەكەتتىك ورگانداردىڭ بازالارىنا حاككەرلەر شابۋىلداماعان.
"ياعني وسى جولى تاراپ كەتكەن مالىمەتتەر جەكە كومپانيالاردىڭ، ميكروقارجىلىق ۇيىمداردىڭ بازاسىنان الىنۋى نەمەسە ەسكى اقپاراتتار جيناقتالىپ قايتا جاريالانۋى مۇمكىن" دەيدى مينيسترلىك وكىلدەرى.
