حالىقتى ساپالى اۋىز سۋمەن قامتاماسىز ەتۋ – قازاقستاننىڭ مەملەكەتتىك ساياساتىنىڭ نەگىزگى باعىتتارىنىڭ ءبىرى ءارى ازاماتتاردىڭ ءومىر ءسۇرۋ ساپاسىن ارتتىرۋدىڭ ماڭىزدى فاكتورى، دەپ حابارلايدى Dalanews.kz.

2021 جىلدان باستاپ 2026 جىلدىڭ I توقسانىنا دەيىن سۋمەن جابدىقتاۋ جۇيەسىن دامىتۋعا 835 ملرد تەڭگەدەن استام قاراجات باعىتتالدى. وسى كەزەڭدە 34 قالا مەن 756 اۋىلدىق ەلدى مەكەننىڭ تۇرعىندارى ورتالىقتاندىرىلعان سۋمەن جابدىقتاۋ قىزمەتىنە قول جەتكىزدى. بۇدان بولەك، 699 اۋىلدا سۋ تازارتۋدىڭ زاماناۋي بلوك-مودۋلدىك ستانسيالارى ورناتىلدى.

سۋمەن جابدىقتاۋ جەلىلەرىن سالۋ جانە رەكونسترۋكسيالاۋ، سۋ الۋ قۇرىلىستارىن جاڭعىرتۋ، سونداي-اق ينفراقۇرىلىمدى جاڭارتۋ بويىنشا اۋقىمدى جوبالار ىسكە اسىرىلدى.

سالانى جۇيەلى دامىتۋ ماقساتىندا «ەنەرگەتيكالىق جانە كوممۋنالدىق سەكتورلاردى جاڭعىرتۋ» ۇلتتىق جوباسى قابىلداندى.

قۇجات ينفراقۇرىلىمدى كەشەندى جاڭعىرتۋدى، سيفرلىق شەشىمدەردى ەنگىزۋدى جانە ەنەرگيا تيىمدىلىگىن ارتتىرۋدى كوزدەيدى. 2030 جىلعا قاراي كوممۋنالدىق جەلىلەردىڭ توزۋىن 40%-عا دەيىن تومەندەتۋ جوسپارلانۋدا.

سيفرلاندىرۋ ماسەلەسىنە ەرەكشە نازار اۋدارىلۋدا. سۋ ەسەپتەۋ قۇرالدارى، اۆتوماتتاندىرىلعان باسقارۋ جۇيەلەرى (SCADA، اسكۋۆ) جانە Smart Water ەلەمەنتتەرى ەنگىزىلۋدە. بۇل سۋ شىعىندارىن ازايتىپ، ەسەپتىڭ اشىقتىعىن ارتتىرۋعا جانە جۇيەلەردىڭ تۇراقتى جۇمىسىن قامتاماسىز ەتۋگە مۇمكىندىك بەرەدى.

قابىلدانىپ جاتقان شارالار كەشەنى ەلدىڭ ءاربىر تۇرعىنىن ساپالى ءارى سەنىمدى سۋمەن قامتاماسىز ەتۋگە باعىتتالعان.