داستۇرگە اينالعان «ازاماتتىق الاڭ» وتىرىسىندا وتاندىق ساراپشىلار مەن پىكىر كوشباسشىلارى وزەكتىلىگىن جوعالتپايتىن وسى تاقىرىپتا ءوزارا تالقى جاسادى.
قازاقستان رەسپۋبليكاسى اقپارات جانە قوعامدىق دامۋ مينيسترلىگىنىڭ قولداۋىمەن «رۋحاني جاڭعىرۋ» قازاقستاندىق قوعامدىق دامۋ ينستيتۋتىنىڭ ۇيىمداستىرۋىمەن وتكەن «ازاماتتىق الاڭ» جوباسىنىڭ بيىلدىققا ءبىرىنشى وتىرىسى «جاستاردىڭ باسەكەگە قابىلەتتىگى: قازاقستاننىڭ الەمدىك كوشباسشىلىعىنىڭ نەگىزى» تاقىرىبىنا ارنالدى. بۇگىندە الەمدىك ارەنالارداعى قازاق جاستارىنىڭ جەتىستىكتەرىنە توقتالعان ق ر اقپارات جانە قوعامدىق دامۋ مينيسترلىگى «رۋحاني جاڭعىرۋ» دەپارتامەنتىنىڭ ديرەكتورى نۇرلان كۇنتۋوۆ جاستاردىڭ باسەكەگە قابىلەتتىلىگىن ارتتىرۋدىڭ ماڭىزدىلىعىنا توقتالدى.
«بۇگىندە قاي سالادا بولماسىن، ەلىمىزدىڭ نامىسىن حالىقارالىق ارەنادا ابىرويمەن قورعاپ جۇرگەن جاستارىمىز جەتەرلىك. بۇل سپورتقا دا، ونەرگە دە، تەحنيكا سالالارىنا دا قاتىستى. ماسەلەن، كەشە عانا وتانداسىمىز، «قازاقستاننىڭ 100 جاڭا ەسىمى» جوباسىنىڭ جەڭىمپازى يمانبەك زەيكەنوۆ ايگىلى Grammy جۇلدەسىن جەڭىپ الدى. دەگەنمەن جالپى جاستارىمىزدىڭ باسەكەگە قابىلەتتىلىگى قانشالىقتى؟ باسەكەگە قابىلەتتى جاستارىمىزدىڭ بەينەسى قانداي بولۋى كەرەك؟ دەگەن سىندى ماسەلەلەر كوپشىلىكتى تولعانتاتىنى راس. ءبىز ءبىرىنشى كەزەكتە ەلىن سۇيەتىن پاتريوت ازاماتتارىمىزدى تاربيەلەۋىمىز قاجەت»، - دەدى نۇرلان كۇنتۋوۆ.
وتىرىس بارىسىندا «رۋحاني جاڭعىرۋ» قازاقستاندىق قوعامدىق دامۋ ينستيتۋتىنا قاراستى «جاستار» عىلىمي-زەرتتەۋ ورتالىعىنىڭ ديرەكتورى ايان ساكوشيەۆ قازاقستان جاستارىنىڭ پورترەتىنە توقتالدى.
«رەسمي دەرەكتەرگە سۇيەنسەك، 2020 جىلى 14 پەن 29 جاس ارالىعىنداعى رەسپۋبليكا جاستارىنىڭ سانى 3،7 ملن. ادامدى قۇراعان. بۇل ەلدەگى جالپى حالىق سانىنىڭ 20،4 پايىزىن قۇرايدى. ولاردىڭ 56،4%ء-ى قالادا تۇرسا، اۋىلدا تۇراتىندارىنىڭ كورسەتكىشى – 43،6%. تاعى ءبىر ايتا كەتەرلىگى، ءدال وسى جاس ارالىعىنداعى قازاقستاندىقتاردىڭ 92،9 پايىزى ەشبىر پارتياعا مۇشە ەمەس»، - دەدى ساكوشيەۆ.
راسىمەن دە، بۇگىندە قاي سالادا بولماسىن، الەمدىك ارەنالاردا قازاقستاننىڭ ابىرويىن اسقاقتاتىپ، ەلىمىزگى امبەگە تانىتىپ جاتقان جاستارىمىز جەتەرلىك. ماسەلەن، «قازاقستاننىڭ 100 جاڭا ەسىمى» جوباسىنىڭ جەڭىمپازى، ءانشى الىبەك المادييەۆ «قازاقستان داۋىسى»، «حوچۋ ك مەلادزە» سىندى بايقاۋلاردىڭ ءفيناليسى بولعان. ءوزىنىڭ جوسپارلارىمەن ءبولىسۋ ارقىلى الىبەك جاستاردىڭ بەينەسى قانداي بولۋ قاجەتتىگىن ايتىپ ءوتتى.
«ۇزاق ۋاقىتتار بويى رەسەيلىك «حور تۋرەسكوگو» ۇجىمىنىڭ قۇرامىندا بولدىم. گاسترولدەرگە ءجيى شىعاتىنبىز. جالاقىم جاقسى بولدى. قازىرگىدەن 5-6 ەسە ارتىق تاپتىم. ءبىراق تابىسىمنان ءلاززات الا العانىم جوق. ويتكەنى، وزگە ەلدىڭ مۇددەسىنە قىزمەت ەتىپ جۇرگەنىمدى ىشتەي تۇيسىنەتىنمىن. سودان ەلگە ورالۋ قاجەت دەپ شەشتىم. مۇندا تابىسىم ازداۋ بولسا دا، ءوز ەلىم ءۇشىن قىزمەت ەتەمىن. مەنىڭ تۇسىنىگىمدە جاستار وتانسۇيگىش بولۋى كەرەك. قايدا جۇرسەڭ دە، ءبىرىنشى كەزەكتە ءوزىڭدى ەمەس، ءوز ەلىڭنىڭ اتىن اسقاقتاتۋ ءۇشىن ەڭبەك ەت»، - دەپ پىكىرىن ءبىلدىردى المادييەۆ.
سونداي-اق، Forbes Kazakshtan رەيتينگىنەن ورىن العان جاس ينجەنەر ماۋلەن بەكتۇرعانوۆ روبوتوتەحنيكا سالاسىنداعى قازاقستان جاستارىنىڭ جەتىستىكتەرىنە توقتالىپ، «قازاقستاننىڭ 100 جاڭا ەسىمى» جوباسىنىڭ جەڭىمپازى قانداي بولۋ قاجەتتىگىن ايتىپ بەردى.
«شىنىمدى ايتسام، كەزىندە بۇل جوباعا قاتىسام دەگەن وي بولعان. ءوتىنىشتى مەن ءۇشىن باسقالار جولداعان. الايدا مەنىڭ كىشكەنتاي دا بولسا، جەتىستىگىمە قىزىعۋشىلىق تانىتىپ، ءىلتيپات تانىتقاندارى ءۇشىن ريزامىن. جوباعا قاتىسقاندار اراسىندا ەلىمىزدىڭ ابىرويىن كۇللى الەمگە اسقاقتاتىپ جاتقان زامانداستارىمىز دا بار. مەنىڭشە، «قازاقستاننىڭ 100 جاڭا ەسىمى» جوباسىنىڭ جەڭىمپازى وزىنە عانا ەمەس، ەلىنە پايداسىن تيگىزەر پاتريوت جانە كوشباسشىلىق قابىلەتى زور بولۋى كەرەك»، - دەدى ماۋلەن بەكتۇرعانوۆ.
ەستەرىڭىزگە سالا كەتسەك، ماۋلەن كادىمگى قولدىڭ ءپروتوتيپىن جاساپ، مۇمكىندىگى شەكتەۋلى جاندارعا زور مۇمكىندىك جاساعان بولاتىن. بۇل روبوتوقول مي ارقىلى باسقارىلىپ، «ءتىرى قولدىڭ» قىزمەتتەرىن اتقارا الادى. ەندىگى كەزەكتە بەكتۇرعانوۆ باستاعان كومپانيا «روبوت اياقتاردى» جاساپ شىعارماقشى.
ايتا كەتەيىك، «ازاماتتىق الاڭ» جوباسى ق ر اقپارات جانە قوعامدىق دامۋ مينيسترلىگىنىڭ قولداۋىمەن «رۋحاني جاڭعىرۋ» قازاقستاندىق قوعامدىق دامۋ ينستيتۋتى ۇيىمداستىردى. وعان قوعام بەلسەندىلەرى، مەملەكەتتىك قىزمەتكەرلەر، بلوگەرلەر، جۋرناليستەر، ۇكىمەتتىك ەمەس ۇيىمداردىڭ وكىلدەرى، جالپى تانىمال تۇلعالار قاتىستى.
