Qazaqstandyq pikir kóshbasshylary jastardyń básekege qabilettiligin talqylady
Dástúrge ainalǵan «Azamattyq alań» otyrysynda otandyq sarapshylar men pikir kóshbasshylary ózektiligin joǵaltpaityn osy taqyrypta ózara talqy jasady.
Qazaqstan Respýblikasy Aqparat jáne qoǵamdyq damý ministrliginiń qoldaýymen «Rýhani jańǵyrý» qazaqstandyq qoǵamdyq damý institýtynyń uiymdastyrýymen ótken «Azamattyq alań» jobasynyń biyldyqqa birinshi otyrysy «Jastardyń básekege qabilettigi: Qazaqstannyń álemdik kóshbasshylyǵynyń negizi» taqyrybyna arnaldy. Búginde álemdik arenalardaǵy qazaq jastarynyń jetistikterine toqtalǵan QR Aqparat jáne qoǵamdyq damý ministrligi «Rýhani jańǵyrý» departamentiniń direktory Nurlan Kúntýov jastardyń básekege qabilettiligin arttyrýdyń mańyzdylyǵyna toqtaldy.
«Búginde qai salada bolmasyn, elimizdiń namysyn halyqaralyq arenada abyroimen qorǵap júrgen jastarymyz jeterlik. Bul sportqa da, ónerge de, tehnika salalaryna da qatysty. Máselen, keshe ǵana otandasymyz, «Qazaqstannyń 100 jańa esimi» jobasynyń jeńimpazy Imanbek Zeikenov áigili Grammy júldesin jeńip aldy. Degenmen jalpy jastarymyzdyń básekege qabilettiligi qanshalyqty? Básekege qabiletti jastarymyzdyń beinesi qandai bolýy kerek? degen syndy máseleler kópshilikti tolǵantatyny ras. Biz birinshi kezekte elin súietin patriot azamattarymyzdy tárbieleýimiz qajet», - dedi Nurlan Kúntýov.
Otyrys barysynda «Rýhani jańǵyrý» qazaqstandyq qoǵamdyq damý institýtyna qarasty «Jastar» ǵylymi-zertteý ortalyǵynyń direktory Aian Sakoshev Qazaqstan jastarynyń portretine toqtaldy.
«Resmi derekterge súiensek, 2020 jyly 14 pen 29 jas aralyǵyndaǵy respýblika jastarynyń sany 3,7 mln. adamdy quraǵan. Bul eldegi jalpy halyq sanynyń 20,4 paiyzyn quraidy. Olardyń 56,4%-i qalada tursa, aýylda turatyndarynyń kórsetkishi – 43,6%. Taǵy bir aita keterligi, dál osy jas aralyǵyndaǵy qazaqstandyqtardyń 92,9 paiyzy eshbir partiiaǵa múshe emes», - dedi Sakoshev.
Rasymen de, búginde qai salada bolmasyn, álemdik arenalarda Qazaqstannyń abyroiyn asqaqtatyp, elimizgi ámbege tanytyp jatqan jastarymyz jeterlik. Máselen, «Qazaqstannyń 100 jańa esimi» jobasynyń jeńimpazy, ánshi Álibek Almadiev «Qazaqstan daýysy», «Hochý k Meladze» syndy baiqaýlardyń finalisi bolǵan. Óziniń josparlarymen bólisý arqyly Álibek jastardyń beinesi qandai bolý qajettigin aityp ótti.
«Uzaq ýaqyttar boiy reseilik «Hor týretskogo» ujymynyń quramynda boldym. Gastrólderge jii shyǵatynbyz. Jalaqym jaqsy boldy. Qazirgiden 5-6 ese artyq taptym. Biraq tabysymnan lázzat ala alǵanym joq. Óitkeni, ózge eldiń múddesine qyzmet etip júrgenimdi ishtei túisinetinmin. Sodan elge oralý qajet dep sheshtim. Munda tabysym azdaý bolsa da, óz elim úshin qyzmet etemin. Meniń túsinigimde jastar otansúigish bolýy kerek. Qaida júrseń de, birinshi kezekte ózińdi emes, óz elińniń atyn asqaqtatý úshin eńbek et», - dep pikirin bildirdi Almadiev.
Sondai-aq, Forbes Kazakshtan reitinginen oryn alǵan jas injener Máýlen Bekturǵanov robototehnika salasyndaǵy Qazaqstan jastarynyń jetistikterine toqtalyp, «Qazaqstannyń 100 jańa esimi» jobasynyń jeńimpazy qandai bolý qajettigin aityp berdi.
«Shynymdy aitsam, kezinde bul jobaǵa qatysam degen oi bolǵan. Ótinishti men úshin basqalar joldaǵan. Alaida meniń kishkentai da bolsa, jetistigime qyzyǵýshylyq tanytyp, iltipat tanytqandary úshin rizamyn. Jobaǵa qatysqandar arasynda elimizdiń abyroiyn kúlli álemge asqaqtatyp jatqan zamandastarymyz da bar. Menińshe, «Qazaqstannyń 100 jańa esimi» jobasynyń jeńimpazy ózine ǵana emes, eline paidasyn tigizer patriot jáne kóshbasshylyq qabileti zor bolýy kerek», - dedi Máýlen Bekturǵanov.
Esterińizge sala ketsek, Máýlen kádimgi qoldyń prototipin jasap, múmkindigi shekteýli jandarǵa zor múmkindik jasaǵan bolatyn. Bul robotoqol mi arqyly basqarylyp, «tiri qoldyń» qyzmetterin atqara alady. Endigi kezekte Bekturǵanov bastaǵan kompaniia «robot aiaqtardy» jasap shyǵarmaqshy.
Aita keteiik, «Azamattyq alań» jobasy QR Aqparat jáne qoǵamdyq damý ministrliginiń qoldaýymen «Rýhani jańǵyrý» qazaqstandyq qoǵamdyq damý institýty uiymdastyrdy. Oǵan qoǵam belsendileri, memlekettik qyzmetkerler, blogerler, jýrnalister, úkimettik emes uiymdardyń ókilderi, jalpy tanymal tulǵalar qatysty.
