قازاقستاننىڭ اۋىلداعى مەكتەپتەردى دامىتۋ تاجىريبەسى HundrED Global Collection 2026 حالىقارالىق رەيتينگىنىڭ نەگىزگى تىزىمىنە ەندى. بۇل ءتىزىم الەمدە ىسكە اسىرۋعا ۇسىنىلعان 100 ۇزدىك ءبىلىم بەرۋ يننوۆاسياسىن قامتيدى. ىرىكتەۋدى فينلياندياداعى HundrED ۇكىمەتتىك ەمەس ۇيىمى وتكىزدى، وعان 800-دەن استام ءوتىنىم بەرىلگەن، دەپ حابارلايدى Dalanews.kz.
قازاقستاندا مەملەكەت باسشىسى قاسىم-جومارت توقايەۆتىڭ تاپسىرماسىمەن ورتا ءبىلىم بەرۋ ۇيىمدارىندا ءبىلىم ساپاسىن ارتتىرۋ، بارلىق بالا ءۇشىن تەڭ ءارى قولجەتىمدى ءبىلىم بەرۋ ورتاسىن قۇرۋ بويىنشا كەشەندى جۇمىستار جۇرگىزىلۋدە. 2023–2024 وقۋ جىلدارى اقتوبە وبلىسىندا وقۋ-اعارتۋ مينيسترلىگى مەن وبلىس اكىمدىگىنىڭ قولداۋىمەن «شاعىن جيناقتى مەكتەپتەردىڭ الەۋەتىن سيفرلىق تەحنولوگيالاردى پايدالانا وتىرىپ دامىتۋ» جوباسى ىسكە قوسىلعان بولاتىن. جوبانى ءبىلىم بەرۋ سالاسىن تۇراقتى دامىتۋ قورى جۇزەگە اسىردى.
پيلوتتىق جوباعا وڭىردەن 134 شاعىن جيناقتى مەكتەپ، 12 تىرەك مەكتەپ قاتىسىپ، وندا بارلىعى 10395 وقۋشى قامتىلدى. سونداي-اق 1000-نان استام ءمۇعالىمنىڭ قاتىسۋىمەن شاعىن جيناقتى مەكتەپ وقۋشىلارى ءۇشىن 12 000 ونلاين ساباق ۇيىمداستىرىلدى.
ونى قارجىلاندىرۋعا اقتوبە وبلىسىنىڭ اكىمدىگى، قازاقستان حالقىنا قورى قاتىستى. «قازاقستان حالقىنا» قورى ارقىلى شاعىن جيناقتى مەكتەپتەردىڭ ماتەريالدىق-تەحنيكالىق جاراقتاندىرىلۋىنا 2،063 ملرد تەڭگە، سونداي-اق اقتوبە وبلىسىنىڭ اكىمدىگى ارقىلى كابينەتتەردى جوندەۋ، جوعارى جىلدامدىقتاعى ينتەرنەتپەن قامتاماسىز ەتۋ جانە مۇعالىمدەرگە ىنتالاندىرۋ تولەمدەرى ءۇشىن 2 ملرد تەڭگەگە جۋىق قاراجات جۇمسالعان.
ايتا كەتۋ كەرەك، وڭىرلەرگە جۇمىس ساپارى كەزىندە وقۋ-اعارتۋ ءمينيسترى جۇلدىز سۇلەيمەنوۆا شالعاي اۋىلدارداعى شاعىن جيناقتى مەكتەپتەردە بولىپ، ونداعى وقۋ پروسەسىن ۇيىمداستىرۋ، تەحنيكالىق جاراقتاندىرۋ، پەداگوگتەرمەن قامتاماسىز ەتۋ ماسەلەسىنە ەرەكشە باسىمدىق بەرۋدە.
