ادىلەت مينيسترلىگى ۇكىمەت وتىرىسىندا قازاقستاندىق ورىنداۋشىلاردىڭ اۆتورلىق قۇقىقتارىن قورعاۋ ءۇشىن ارنايى پلاتفورما قۇرۋدى ۇسىندى، دەپ حابارلايدى Dalanews.kz.
«2024 جىلدىڭ كۇزىندە قازاقستاندىق مۋزىكانىڭ Meta پلاتفورمالارىنان جوعالىپ كەتۋى ۇجىمدىق باسقارۋ سالاسىنداعى ولقىلىقتاردى كورسەتتى. كوپتەگەن تانىمال اۆتور مەن ورىنداۋشىلار ءوز ەڭبەكتەرىنىڭ پايدالانىلۋى ءۇشىن ءتيىستى سىياقى الماعاندارىن مالىمدەدى»، – دەپ اتاپ ءوتتى ادىلەت ءمينيسترى ەرلان سارسەمبايەۆ.
مينيسترلىك اۆتورلار مەن قۇقىق يەلەرىنە ءوز شىعارمالارىنىڭ قولدانىلۋىن قاداعالاۋعا مۇمكىندىك بەرەتىن سيفرلىق جۇيە قۇرۋدى جوسپارلاپ وتىر. بۇل جۇيە كەلىسىمشارت جاساۋ، رويالتي جيناۋ، ءبولۋ جانە تولەم جاساۋ پروسەستەرىن ونلاين باقىلاۋعا مۇمكىندىك بەرەدى.
«جالپى، سيفرلىق پلاتفورمانى جاساندى ينتەللەكت ەلەمەنتتەرىمەن ەنگىزۋ ماسەلەسى قاراستىرىلۋدا. بۇل جۇيە مەملەكەتتىك رەەسترگە ەنگىزىلگەن وبەكتىلەر بويىنشا تالداۋ جانە ەسەپ بەرۋ، ينتەللەكتۋالدىق مەنشىك نىساندارىن ىزدەۋ جۇيەسىن جەتىلدىرۋ، اۆتورلار مەن قۇقىق يەلەنۋشىلەرگە ارنالعان ءموبيلدى قوسىمشا ازىرلەۋ، سونداي-اق مەملەكەتتىك ورگاندار مەن حالىقارالىق ۇيىمداردىڭ اقپاراتتىق جۇيەلەرىمەن ينتەگراسيانى كەڭەيتۋدى قامتيدى»، – دەپ مالىمدەدى مينيستر.
ەسكە سالايىق، بىلتىر قاراشادا Instagram جەلىسىنەن قازاقستاندىق اندەر جوعالىپ كەتكەن بولاتىن. Meta ولاردىڭ KazAK-پەن (قازاقستان اۆتورلار قوعامى) سەرىكتەستىك كەلىسىمى ۇزارتىلماعانىن، سوندىقتان KazAK قۇقىقتارىن ساقتايتىن بارلىق كونتەنت ۋاقىتشا جويىلعانىن حابارلادى.
KazAK-تىڭ كەز كەلگەن ءانى ءقازىر Facebook پەن Instagram جەلىسىندەگى Reels جانە Stories بولىمدەرىندە قولجەتىمسىز. جاۋاپتا "KazAK ۇسىنعان اندەر پايدالانۋشى كونتەنتتى ولار وزدەرى ءوشىرۋى نەمەسە بۇعاتتاۋى مۇمكىن" دەلىنگەن.
