بۇل كۇن – بارشا وتانداستارىمىزدى ىنتىماق پەن بىرلىككە باستايتىن كۇن. قازاقستان مەملەكەتتىلىگىنىڭ نەگىزىن قالاۋشى – ەلىمىزدىڭ تۇڭعىش پرەزيدەنتى ن. ءا. نازاربايەۆتىڭ جان-جاقتى سارالانعان ىشكى جانە سىرتقى ساياساتىنىڭ ارقاسىندا ەلىمىز دامۋدىڭ ىلگەرىلەۋ مەن وركەندەۋ جولىمەن كەلەدى.
قازاقتا: «تاريحتى تۇلعالار جاسايدى» دەگەن ءسوز بار. ءار ۇلتتىڭ وزىندىك تاريحىن قالىپتاستىرعان ۇلى تۇلعالار بولادى. ولار قانشاما ۋاقىت وتسە دە سول ۇلتتىڭ داناسى رەتىندە ساناعا بەكىپ، ادامزاتتىڭ ورتاق ازاماتىنا اينالادى. بۇل رەتتە، ەگەمەن قازاقستاننىڭ نەگىزىن سالۋدىڭ جانە نىعايتۋدىڭ تاريحي ميسسياسى ەلباسى نۇرسۇلتان نازاربايەۆقا تيەسىلى.
تاۋەلسىز مەملەكەتتىڭ نەگىزىن قالاۋشى پرەزيدەنت بارشا قازاقستاندىق مويىنداعان جانە حالىقارالىق قوعامداستىق تاراپىنان قۇرمەتكە يە بولعان كەمەڭگەر تۇلعا.
بيىل ەلباسىمىز كيەلى ماقتاارال اۋدانىن تاريحي قالپىنا كەلتىرىپ، ماقتالى ولكەنىڭ بولاشاعىن ايقىنداپ بەردى. سونىڭ ارقاسىندا 21 جىل بويى شەتتە قالىپ، دامۋدان كەشەۋىلدەگەن مىرزاكەنت پەن اتاكەنت كەنتتەرى، باسقا دا اۋىلدىق وكرۋگتەر دامۋدىڭ داڭعىل جولىنا ءتۇستى. ءبىز جاڭا اۋداندا مادەنيەت پەن ونەرىمىزدى، ءبىلىم مەن عىلىمدى، ونەركاسىپ پەن بيزنەسىمىزدى دامىتۋ ارقىلى ۇلى ماقساتتارعا جەتەتىن بولامىز.
ماقتاارال اۋدانىنا بىرنەشە رەت اياق باسقان ۇلت كوشباسشىسى ن.ءا.نازاربايەۆ ماقتاارالدىقتارعا ۇلكەن سەنىم بىلدىرەتىنىن ايتقان. ماسەلەن، «ماقتاارال – وڭتۇستىك قازاقستاننىڭ» جۇرەگى دەگەن ءسوزى ءالى كۇنگە دەيىن بىزگە شابىت بەرەدى. مىنە، ەلباسىمىزدىڭ سەنىمى ۇدەسىنەن شىعۋ ماقساتىندا اۋداندا اۋقىمدى ىستەر اتقارىلىپ، تاريحي قالپىنا كەلگەن ماقتاارالدى دامىتۋعا باعىتتالعان جاڭا جوبالار جاسالۋدا.
قاراشانىڭ ورتاسىندا 3 كۇنگە سوزىلعان ۇلان-اسىر تويىمىزدى وتكىزىپ الدىق. ماقتاارال اۋدانىنىڭ 90 جىلدىق مەرەيتويىنا وزبەكستان رەسپۋبليكاسىنىڭ سىرداريا وبلىسىنان ارنايى دەلەگاسيا كەلىپ، تويىمىز حالىقارالىق دەڭگەيگە ۇلاستى. وبلىس باسشىسى ج.ق.تۇيمەبايەۆ مەرەيتويىمىزدىڭ اشىلۋ سالتاناتىنا قاتىسىپ، ەڭبەكقور ماقتاارالدىقتارعا دەگەن ىزگى تىلەگىن ارنادى. سونداي-اق، اۋدانىمىزدان تۇلەپ ۇشىپ رەسپۋبليكامىزدىڭ ءتۇرلى جەرلەرىندە جۇرگەن اتاقتى تۇلەكتەر، وسى جەردە ءتۋىپ-وسىپ، گەرمانيا، گرەسيا، رەسەي سياقتى ت.ب. مەملەكەتتەردە تۇرىپ جاتقان وزگە ۇلت وكىلدەرى قوناققا كەلدى. مۇنىڭ بارلىعى دا – ماقتالى ماقتاارال اۋدانىنىڭ رەسپۋبليكادا، ءتىپتى تۇتاس تمد-دا ابىرويى مەن بەدەلىنىڭ جوعارى ەكەندىگىن كورسەتىپ بەردى.
ءقادىرلى جەرلەستەر! 1 جەلتوقسان – ءبىزدىڭ تاريحىمىزدىڭ جاڭا اق پاراعى اشىلعان كۇن. تاۋەلسىزدىكتى تۇعىرىنا قوندىرعان، ەلدى ەرلىككە جەتكىزگەن ۇلت كوشباسشىسى 1 جەلتوقساندا ەل تىزگىنىن ۇستادى. وسى كۇنى پرەزيدەنتتىك ينستيتۋتقا قادام باستىق.
تۇڭعىش پرەزيدەنتتىڭ باستامالارىنا قولداۋ جاساي وتىرىپ، ەلىمىز كوپ بيىكتى باعىندىردى. مەملەكەتىمىزدىڭ الەم ەلدەرى اراسىنداعى ابىرويى ۋاقىت ساناپ ارتىپ كەلەدى. مۇنىڭ بارلىعى دا بۇگىنگى تاۋەلسىزدىگىمىزدى تۇعىرلى ەتۋ جولىنداعى تۇڭعىش پرەزيدەنتىمىز – ەلباسىنىڭ ەسەلى ەڭبەگىنىڭ، كورەگەن جاسامپازدىعىنىڭ جەمىسى.
وسىناۋ ەل حالقىنىڭ بىرلىگى مەن بەرەكەسىن ۇلىقتاپ، مەملەكەتتىڭ مەرەيىن اسىراتىن مەرەكە كۇنى سىزدەرگە زور دەنساۋلىق، وتباسىلار-ىڭىزعا ب ا ق پەن بەرەكە، شاڭىراقتارىڭىزعا شاتتىق تىلەيمىز!
باقىت اسانوۆ، ماقتاارال اۋدانىنىڭ اكىمى
