ەلىمىزدەگى Home Credit Bank بىلتىر ءوز اكسيونەرىن اۋىستىردى. «رەسەي حوۋم كرەديت ەند فينانس بانكى» كومپانياسى اكسيالارىن چەحيا ازاماتتارى ساتىپ الدى. Home Credit Bank اكتيۆتەرىنىڭ كولەمى بويىنشا ەلدە 13ء-شى ورىنعا يە. Forbes Kazakhstan باسىلىمىنىڭ شولۋشىسى تاتيانا باتيششيەۆاعا بەرگەن سۇحباتىندا، Home Credit Bank باسقارما ءتوراعاسى كيريل باچۆاروۆ بانكتىڭ سيفرلىق داۋىردە قالاي دامىپ جاتقانى تۋرالى اڭگىمەلەدى. Dalanews.kz وسى سۇحباتتىڭ ماڭىزدى جەرلەرىن نازارلارىڭىزعا ۇسىنادى.

Forbes Kazakhstan: ءىرى بانكتەر ماركەتپلەيس، اقىلدى تولەمدەر، قاشىقتىقتان ونبوردينگ قۇرۋ ارقىلى نارىقتاعى ءوز پوزيسيالارىن نىعايتتى. وسىنىڭ اياسىندا ورتا دەڭگەيلى بانكتەردىڭ بولاشاعى قانداي؟

- قازاقستاندا ءىرى امبەباپ جانە ورتا مامانداندىرىلعان بانكتەر بار. ولاردىڭ ىشىندە ءبىز دە بارمىز. بىزدە ناقتى تۇجىرىم قالىپتاسقان. بيزنەسىن، ىشكى قۇرىلىمىن تۇسىنبەگەن جەرگە بارمايمىز. Home Credit - بولشەك ساۋدا بانكى. بيىل عانا ءبىز شاعىن بيزنەسكە قىزمەت ەتەمىز دەپ شەشتىك. ولار ءۇشىن جاڭا قوسىمشانى ىسكە قوسامىز. ءبىراق شاعىن بيزنەس بانك ءۇشىن جاڭا سەگمەنت ەمەس. كەزىندە ءبىز وسى سەگمەنتپەن سەرىكتەس رەتىندە جۇمىس ىستەدىك، بۇل بيزنەستىڭ كليەنتتەرىنە نەسيە بەردىك. سوندىقتان بىزدە سينەرگيانى قالاي قۇرۋ كەرەكتىگى تۋرالى تۇسىنىك بار. ءوز كەزەگىندە، ءبىز كورپوراتيۆتىك بيزنەسكە قىزمەت ەتپەيمىز. ءبىز باسقالارعا كاراعاندا جاقسىراق بولعىمىز كەلەتىن شاعىن سالادا جۇمىس ىستەگىمىز كەلەدى.

Forbes Kazakhstan: ءسىزدىڭ شاعىن جانە ورتا بيزنەسكە دەگەن كوزقاراسىڭىزدى ەسكەرە وتىرىپ، بانكتى پوزيسيالاۋ قالاي ءوربيدى؟ بۇرىن Home Credit Bank قازاقستاندا كۇندەلىكتى پايدالانۋعا ارنالعان وتباسىلىق بانك رەتىندە ءوزىن تانىتقان ەدى. بۇل ستراتەگيا بولاشاقتا دا جالعاسا ما؟

- ءبىز بولشەك ساۋدادان كەتپەيمىز. ءبىز ءتىپتى ونى جاقسىراق دامىتا الامىز جانە كليەنتتەرىمىزدىڭ سانىن كوبەيتەمىز دەپ سەنەمىز. مىسالى، ولارعا ءبولىپ تولەۋ، ەڭ جاقسى كەشبەك، سەرىكتەستەردىڭ بۇكىل جەلىسى بويىنشا 12 ايلىق ءبولىپ تولەۋ مەرزىمى بار نەسيە كارتاسىن ۇسىنامىز. ءبىز ءۇشىن ەڭ باستىسى، ءبىز ءۇشىن جاڭا بولىپ تابىلاتىن شاعىن بيزنەس نارىعىنا شىعۋ ارقىلى ءبىز تۇتىنۋشىلارعا كوبىرەك قۇندىلىق ۇسىنا الامىز. ەندى بۇل قۇندىلىقتاردى قالاي مونەتيزاسيالاۋ كەرەكتىگىن شەشۋ كەرەك.
بانكتى وتباسىلىق بانك دەپ تانىستىرۋ ءبىز ءۇشىن كەشەگى كۇن بولىپ قالدى. ءقازىر ءبىز Home Creditء-تىڭ جاڭا بەينەسىن جاساۋ ۇستىندەمىز. قۇپيانى ازىرگە اشپاي-اق قويايىن. ءبىز تامىز-قىركۇيەك ايلارىندا جارنامالىق ناۋقان وتكىزىپ، جاڭا ونىمدەر مەن جاڭا نەسيە كارتاسىمەن بىرگە جاڭا پوزيسيانى ەنگىزگىمىز كەلەدى. ول نارىقتاعى ۇزدىك ۇسىنىس بولماق.

Forbes Kazakhstan: Cىزدەر التىنمەن اينالىساسىزدار ما؟

- التىنمەن جۇمىس ىستەمەيمىز. وعان ناقتى تۇتىنۋشى ءپروفيلى قاجەت. ءبىز التىنعا ۇلكەن سۇرانىس بولمايدى دەپ ويلايمىز. ءبىراق ەگەر وسى باعىت وكىلدەرى ماعان كەلىپ، مۇنى ىستەۋ قاجەت ەكەنىن دالەلدەپ، نارىقتىق تالداۋ ارقىلى پەرسپەكتيۆاسىن كورسەتسە، وندا ءبىزدىڭ ەسىك اشىق.

ءبىزدىڭ ءونىم توبى ايتارلىقتاي دەربەس قيمىلدايدى. ءبىز ونى agile (جەكە توپتا يكەمدى جوبالاردى باسقارۋ ادىستەمەسى – رەد.) رەتىندە جەكە ءبولىپ قويدىق. توپ وزىنە ماقسات قويادى جانە ونى جۇزەگە اسىرادى. ولاردان كليەنت بەلسەندى جانە مۇمكىندىگىنشە بىزبەن كوبىرەك بىرگە بولۋىن تالاپ ەتەمىن. بۇل پروبلەمالاردى قاي ونىمدەر شەشەتىنىن كوماندا ءوزى انىقتايدى. بۇعان دەيىن ءار ءونىمنىڭ تابىستىلىعىن ەسەپتەپ، شىعىنى كوپ ءونىمدى وتكىزبەۋگە تىرىسساق، ءقازىر باسقاشا ويلايمىز. ءبىز ءبىر كليەنتكە شاققانداعى كىرىستىلىك تۋرالى ويلايمىز. كليەنتپەن قارىم-قاتىناستى ساقتاۋ ءۇشىن ءبىز وعان باسقا ءبولىپ تولەۋ جوسپارىن ساتا الامىز. ول ءبىز ءۇشىن ارتىق شىعىن بولسا دا، ءبىز ورتاق مۇددەگە سەنەمىز.

Forbes Kazakhstan: سىزدەر جەلىلىك ءونىمدى ۇسىنۋ جۇيەسىن ەنگىزەسىز بە؟

- ەگەر ءسىز ەكوجۇيە تۋرالى ايتىپ جاتساڭىز، جوق، ءبىز ونى قۇرىپ جاتقان جوقپىز. كەيبىر بانكتەر وزدەرىنىڭ ەكوجۇيەلەرىن ءساتتى جاساي الدى. بىزگە ولارمەن باسەكەلەسۋدىڭ قاجەتى جوق سياقتى. ءبىز سەرىكتەستىككە ۇمتىلامىز. ياعني، ستاندارتتى ونىمدەردى ساتۋعا عانا ەمەس، سونىمەن بىرگە ولارمەن جاڭا نارسەلەردى ويلاپ تابۋعا مۇمكىندىك بەرەتىن نەگىزگى سەرىكتەستىكتەرمەن جۇمىس ىستەۋگە دايىنبىز. ءقازىر مەن ءبىز كوپ جىلدار بويى جۇمىس ىستەپ كەلە جاتقان سەرىكتەستەر تۋرالى، اتاپ ايتقاندا قازپوچتا جانە بولشەك ساۋدا كومپانيالارى تۋرالى عانا ەمەس، سونىمەن قاتار ءبىز جاڭا ونىمدەر مەن قۇندىلىقتاردى بىرلەسىپ جاساۋعا دايىن تەلەكوممۋنيكاسيا جانە ەلەكتروندى كوممەرسيا كومپانيالارى تۋرالى ايتىپ وتىرمىن.

Forbes Kazakhstan: قازىرگى ۋاقىتتا بانك كليەنتتى تارتۋعا قانشا رەسۋرس جۇمسايدى؟

– ءبىز باستاپقى تارتۋعا كوبىرەك تولەۋگە دايىنبىز دەپ ايتار ەدىم. سەبەبى، بىزگە كليەنتكە بەرەر ۇسىنىستار كوپ جانە ول ەكى جاققا دا ءتيىمدى. جاڭا كليەنت تارتۋعا 7 000-10 000 تەڭگەدەن ارتىق شىعىن شىعارماۋعا تىرىسامىز. ءقازىر ورتا ەسەپپەن ءارتۇرلى ونىمدەردى ءتۇرلى ارنالاردا تارتۋ ءۇشىن 7000 تەڭگەدەي شىعادى. قارىم-قاتىناستى قالاي دامىتۋ كەرەكتىگىن، ەكىنشى جانە ءۇشىنشى ءونىمدى تۇتىنۋشىعا قالاي وتكىزۋ كەرەكتىگىن تۇسىنبەسەك، وندا مۇمكىن بولعانشا شىعىندى ازايتۋعا تىرىسار ەدىك.

Forbes Kazakhstan: بيىلعى جىلدان قانداي ءۇمىت كۇتەسىز؟

- مەن ينفلياسيانىڭ ازايۋىن جانە بازالىق مولشەرلەمەنىڭ تومەندەۋىن كورگىم كەلەدى. نارىقتاعى رەسۋرستاردىڭ جالپى قۇنىن تومەندەتۋ ارقىلى ءبىز ءقازىر تاۋەكەل تەكسەرىسىنەن وتپەي تۇرعان كليەنتتەرىمىزگە قولجەتىمدى نەسيەلەر ۇسىنا الار ەدىك. ءقازىر ولارعا نەسيە بەرە الماي وتىرمىز.

Forbes Kazakhstan: نەسيەلەر ءالى دە ءسىزدىڭ باستى ءونىمىڭىز مە؟

- ازىرگە، يا. ءبىراق مەن پايىزدىق كىرىستەن كوميسسياعا اۋىسقىم كەلەدى. ەۋروپاعا قاراعاندا قازاقستان نارىعىندا مۇنى ىسكە اسىرۋ قيىن. ويتكەنى حالىق ەسەپشوت جۇرگىزۋ ءۇشىن بانككە اقشا تولەۋگە داعدىلانباعان. مىسالى، يتاليادا اعىمداعى شوت جىلىنا 100 ەۋرو تۇرادى. كارتاعا قوسىمشا اقى تولەنەدى. قازاقستانداعى باسەكەلەستىك كليەنتتىڭ تىم ەركەلەپ كەتۋىنە الىپ كەلدى. مۇنى دا ەسكەرۋ كەرەك.

شاعىن بيزنەس ءۇشىن سيفرلىق بانكينگتى ىسكە قوسۋداعى نەگىزگى ماقساتتىڭ ءبىرى – كىرىستى كوبىنە كوميسسيادان الۋ. بۇل رەتتە بازالىق مولشەرلەمەنى تومەندەتۋ بىزگە ۇلكەن كومەك بەرەدى.