Elimizdegi Home Credit Bank byltyr óz aksıonerin aýystyrdy. «Reseı Hoým Kredıt end Fınans Banki» kompanıasy aksıalaryn Chehıa azamattary satyp aldy. Home Credit Bank aktıvteriniń kólemi boıynsha elde 13-shi orynǵa ıe. Forbes Kazakhstan basylymynyń sholýshysy Tatána Batıshevaǵa bergen suhbatynda, Home Credit Bank basqarma tóraǵasy Kırıl Bachvarov banktiń sıfrlyq dáýirde qalaı damyp jatqany týraly áńgimeledi. Dalanews.kz osy suhbattyń mańyzdy jerlerin nazarlaryńyzǵa usynady.
Forbes Kazakhstan: İri bankter marketpleıs, aqyldy tólemder, qashyqtyqtan onbordıng qurý arqyly naryqtaǵy óz pozısıalaryn nyǵaıtty. Osynyń aıasynda orta deńgeıli bankterdiń bolashaǵy qandaı?
- Qazaqstanda iri ámbebap jáne orta mamandandyrylǵan bankter bar. Olardyń ishinde biz de barmyz. Bizde naqty tujyrym qalyptasqan. Bıznesin, ishki qurylymyn túsinbegen jerge barmaımyz. Home Credit - bólshek saýda banki. Bıyl ǵana biz shaǵyn bızneske qyzmet etemiz dep sheshtik. Olar úshin jańa qosymshany iske qosamyz. Biraq shaǵyn bıznes bank úshin jańa segment emes. Kezinde biz osy segmentpen seriktes retinde jumys istedik, bul bıznestiń klıentterine nesıe berdik. Sondyqtan bizde sınergıany qalaı qurý kerektigi týraly túsinik bar. Óz kezeginde, biz korporatıvtik bızneske qyzmet etpeımiz. Biz basqalarǵa karaǵanda jaqsyraq bolǵymyz keletin shaǵyn salada jumys istegimiz keledi.
Forbes Kazakhstan: Sizdiń shaǵyn jáne orta bızneske degen kózqarasyńyzdy eskere otyryp, bankti pozısıalaý qalaı órbıdi? Buryn Home Credit Bank Qazaqstanda kúndelikti paıdalanýǵa arnalǵan otbasylyq bank retinde ózin tanytqan edi. Bul strategıa bolashaqta da jalǵasa ma?
- Biz bólshek saýdadan ketpeımiz. Biz tipti ony jaqsyraq damyta alamyz jáne klıentterimizdiń sanyn kóbeıtemiz dep senemiz. Mysaly, olarǵa bólip tóleý, eń jaqsy keshbek, seriktesterdiń búkil jelisi boıynsha 12 aılyq bólip tóleý merzimi bar nesıe kartasyn usynamyz. Biz úshin eń bastysy, biz úshin jańa bolyp tabylatyn shaǵyn bıznes naryǵyna shyǵý arqyly biz tutynýshylarǵa kóbirek qundylyq usyna alamyz. Endi bul qundylyqtardy qalaı monetızasıalaý kerektigin sheshý kerek.
Bankti otbasylyq bank dep tanystyrý biz úshin keshegi kún bolyp qaldy. Qazir biz Home Credit-tiń jańa beınesin jasaý ústindemiz. Qupıany ázirge ashpaı-aq qoıaıyn. Biz tamyz-qyrkúıek aılarynda jarnamalyq naýqan ótkizip, jańa ónimder men jańa nesıe kartasymen birge jańa pozısıany engizgimiz keledi. Ol naryqtaǵy úzdik usynys bolmaq.
Forbes Kazakhstan: Cizder altynmen aınalysasyzdar ma?
- Altynmen jumys istemeımiz. Oǵan naqty tutynýshy profıli qajet. Biz altynǵa úlken suranys bolmaıdy dep oılaımyz. Biraq eger osy baǵyt ókilderi maǵan kelip, muny isteý qajet ekenin dáleldep, naryqtyq taldaý arqyly perspektıvasyn kórsetse, onda bizdiń esik ashyq.
Bizdiń ónim toby aıtarlyqtaı derbes qımyldaıdy. Biz ony agile (jeke topta ıkemdi jobalardy basqarý ádistemesi – red.) retinde jeke bólip qoıdyq. Top ózine maqsat qoıady jáne ony júzege asyrady. Olardan klıent belsendi jáne múmkindiginshe bizben kóbirek birge bolýyn talap etemin. Bul problemalardy qaı ónimder sheshetinin komanda ózi anyqtaıdy. Buǵan deıin ár ónimniń tabystylyǵyn eseptep, shyǵyny kóp ónimdi ótkizbeýge tyryssaq, qazir basqasha oılaımyz. Biz bir klıentke shaqqandaǵy kiristilik týraly oılaımyz. Klıentpen qarym-qatynasty saqtaý úshin biz oǵan basqa bólip tóleý josparyn sata alamyz. Ol biz úshin artyq shyǵyn bolsa da, biz ortaq múddege senemiz.
Forbes Kazakhstan: Sizder jelilik ónimdi usyný júıesin engizesiz be?
- Eger siz ekojúıe týraly aıtyp jatsańyz, joq, biz ony quryp jatqan joqpyz. Keıbir bankter ózderiniń ekojúıelerin sátti jasaı aldy. Bizge olarmen básekelesýdiń qajeti joq sıaqty. Biz seriktestikke umtylamyz. Iaǵnı, standartty ónimderdi satýǵa ǵana emes, sonymen birge olarmen jańa nárselerdi oılap tabýǵa múmkindik beretin negizgi seriktestiktermen jumys isteýge daıynbyz. Qazir men biz kóp jyldar boıy jumys istep kele jatqan seriktester týraly, atap aıtqanda Qazpochta jáne bólshek saýda kompanıalary týraly ǵana emes, sonymen qatar biz jańa ónimder men qundylyqtardy birlesip jasaýǵa daıyn telekomýnıkasıa jáne elektrondy komersıa kompanıalary týraly aıtyp otyrmyn.
Forbes Kazakhstan: Qazirgi ýaqytta bank klıentti tartýǵa qansha resýrs jumsaıdy?
– Biz bastapqy tartýǵa kóbirek tóleýge daıynbyz dep aıtar edim. Sebebi, bizge klıentke berer usynystar kóp jáne ol eki jaqqa da tıimdi. Jańa klıent tartýǵa 7 000-10 000 teńgeden artyq shyǵyn shyǵarmaýǵa tyrysamyz. Qazir orta eseppen ártúrli ónimderdi túrli arnalarda tartý úshin 7000 teńgedeı shyǵady. Qarym-qatynasty qalaı damytý kerektigin, ekinshi jáne úshinshi ónimdi tutynýshyǵa qalaı ótkizý kerektigin túsinbesek, onda múmkin bolǵansha shyǵyndy azaıtýǵa tyrysar edik.
Forbes Kazakhstan: Bıylǵy jyldan qandaı úmit kútesiz?
- Men ınflásıanyń azaıýyn jáne bazalyq mólsherlemeniń tómendeýin kórgim keledi. Naryqtaǵy resýrstardyń jalpy qunyn tómendetý arqyly biz qazir táýekel tekserisinen ótpeı turǵan klıentterimizge qoljetimdi nesıeler usyna alar edik. Qazir olarǵa nesıe bere almaı otyrmyz.
Forbes Kazakhstan: Nesıeler áli de sizdiń basty ónimińiz me?
- Ázirge, ıa. Biraq men paıyzdyq kiristen komısıaǵa aýysqym keledi. Eýropaǵa qaraǵanda Qazaqstan naryǵynda muny iske asyrý qıyn. Óıtkeni halyq esepshot júrgizý úshin bankke aqsha tóleýge daǵdylanbaǵan. Mysaly, Italıada aǵymdaǵy shot jylyna 100 eýro turady. Kartaǵa qosymsha aqy tólenedi. Qazaqstandaǵy básekelestik klıenttiń tym erkelep ketýine alyp keldi. Muny da eskerý kerek.
Shaǵyn bıznes úshin sıfrlyq bankıngti iske qosýdaǵy negizgi maqsattyń biri – kiristi kóbine komısıadan alý. Bul rette bazalyq mólsherlemeni tómendetý bizge úlken kómek beredi.
