قازاقستاندا ۇلتتىق تاۋارلار كاتالوگىندا 24 ملن-عا جۋىق تاۋار تىركەلگەن، دەپ حابارلايدى Dala News.

بۇل تۋرالى ق ر ساۋدا جانە ينتەگراسيا ۆيسە-مينيسترى اسەت ءنۇسىپوۆ مالىمدەدى. ونىڭ ايتۋىنشا، ونىڭ ىشىندە 11 ملن-نان استامى تاۋارلار، جۇمىستار مەن قىزمەتتەردىڭ ءبىرىڭعاي كلاسسيفيكاتورى بويىنشا جىكتەلگەن.

«كۇنىنە شامامەن 100 مىڭ جاڭا تاۋار قوسىلادى. جۇيەدە بارلىعى 41 مىڭنان استام ساۋدا سۋبەكتىسى تىركەلگەن. ءبىز جالپى باقىلاۋ مەن بيزنەسكە ارنالعان ىڭعايلىلىق اراسىنداعى تەڭگەرىمدى ساقتاۋعا تىرىسامىز جانە جۇيەنى بيزنەسكە كەدەرگى كەلتىرمەيتىندەي ەتىپ سيفرلاندىرىپ جاتىرمىز»، – دەدى ول.

ۆيسە-مينيستردىڭ ايتۋىنشا، جۇيە كەزەڭ-كەزەڭىمەن ەنگىزىلىپ جاتىر. تاۋاردىڭ سيفرلىق پاسپورتى كومپانيالاردىڭ جۇمىسىن توقتاتپاي، بىرتىندەپ ەنگىزىلەدى. سونىمەن قاتار NTIN ءنومىرى بەرىلمەگەن جاعدايدا ۋاقىتشا XTIN قولدانۋ تەتىگى قاراستىرىلعان.

سونداي-اق تىركەۋ تالاپتارى جەڭىلدەتىلىپ، بيزنەسكە قولايلى جاعداي جاساۋعا باسىمدىق بەرىلگەن.

ءنۇسىپوۆتىڭ ايتۋىنشا، قارجى مينيسترلىگى مەن «اتامەكەن» ۇلتتىق كاسىپكەرلەر پالاتاسىمەن مەموراندۋمعا قول قويىلعان. وعان سايكەس، يمپورتتاۋشىلار مەن وتاندىق وندىرۋشىلەر ءۇشىن مەرزىم 1 ناۋرىزعا دەيىن، ساۋدا جەلىلەرى ءۇشىن 1 ساۋىرگە دەيىن بەلگىلەنگەن. ال شاعىن بيزنەسكە 1 شىلدەگە دەيىن ۋاقىت بەرىلگەن.

جوسپار بويىنشا، بيىل جۇيە تولىق ونەركاسىپتىك پايدالانۋعا بەرىلمەك.