1 شىلدەدەن باستاپ پوليسيا ءوتىنىش بەرۋشىدەن تۇرمىستىق قۇقىق بۇزۋشىلىقتاردى تىركەۋدىڭ انىقتاۋ سيپاتىنا كوشتى. جاڭا تۇزەتۋلەر جابىرلەنۋشىلەردىڭ ءوتىنىشىنسىز اكىمشىلىك قۇقىق بۇزۋشىلىق تۋرالى ءىس قوزعاۋعا مۇمكىندىك بەرەدى.
تۇرمىستىق زورلىق-زومبىلىق جاساۋ فاكتىسى بويىنشا حاتتاما جاساۋ ءۇشىن ءقازىر كۋاگەرلەردىڭ، كورشىلەردىڭ ايعاقتارى، بەينەباقىلاۋ كامەرالارى مەن بەينەتىركەگىشتىڭ جازبالارى جەتكىلىكتى. سوڭعى شەشىمدى سوت قابىلدايدى.
تاراپتاردى قايتا تاتۋلاستىرۋ مۇمكىندىگى الىنىپ تاستالادى. بۇعان دەيىن تۇرمىستىق زورلىق-زومبىلىق تۋرالى ماتەريالداردىڭ جارتىسى تاتۋلاسۋ ءۇشىن سوتتا توقتاتىلعان بولاتىن.
بۇل اگرەسسوردىڭ نەمەسە تۋىستارىنىڭ سەندىرۋى نەمەسە قىسىمى ناتيجەسىندە پايدا بولدى. 1 شىلدەدەن باستاپ سوتتا تەك ءبىر رەت تاتۋلاسۋعا بولادى. بۇل زارداپ شەككەندەرگە پسيحولوگيالىق قىسىم جاساۋدى توقتاتۋعا مۇمكىندىك بەرەدى.
تۇرمىستىق زورلىق-زومبىلىق ءۇشىن اكىمشىلىك جانە قىلمىستىق جاۋاپكەرشىلىك كۇشەيتىلدى. اكىمشىلىك قاماۋعا الۋدىڭ ناقتى مەرزىمدەرى انىقتالدى. 19 مامىردان باستاپ قىلمىستىق كودەكستىڭ اۋىر جانە اۋىرلىعى ورتاشا دەنساۋلىققا زيان كەلتىرۋگە بايلانىستى جەكەلەگەن باپتارىنا “كىنالىگە ماتەريالدىق نەمەسە وزگە دە تاۋەلدىلىكتە بولعان ادامعا قاتىستى ىس-ارەكەت جاساۋ ” بىلىكتىلىك بەلگىسى ەنگىزىلدى (قك 106-بابى، قك 107-بابى). بۇل قىلمىسكەردى وقشاۋلاۋ ءۇشىن قاماۋعا الۋ سانكسياسىن قولدانۋعا، سونداي-اق جاۋاپكەرشىلىكتى ارتتىرۋعا مۇمكىندىك بەرەدى. سونداي-اق تۇرمىستىق قۇقىق بۇزۋشىلىقتار ءۇشىن جاۋاپكەرشىلىك كۇشەيتىلدى.
ناتيجەسىندە، سوڭعى ءتورت ايدا (شىلدە-قازان) جاۋاپقا تارتىلعاندار سانى ارتتى. ەگەر اعىمداعى جىلدىڭ ەكىنشى توقسانىندا 7 مىڭ ادام جاۋاپكەرشىلىككە تارتىلسا، ءۇشىنشى توقساندا ولاردىڭ سانى 27 مىڭ ادامدى قۇرادى (قازان ايىندا – 9،5 مىڭ). تيىسىنشە، قاماۋعا الىنعان اگرەسسورلاردىڭ سانى 2 ەسە ءوستى.
بيىلعى جىلى بارلىعى 60 مىڭ (60741) قۇقىق بۇزۋشى اكىمشىلىك جاۋاپكەرشىلىككە تارتىلدى. ولارعا قاتىستى 75 مىڭ قورعانىس ۇيعارىمى شىعارىلدى. سوتتار قۇقىق بۇزۋشىلاردىڭ مىنەز-قۇلقىنا 12 مىڭ ەرەكشە تالاپ قويدى. ولاردىڭ تاراپىنان بەلگىلەنگەن شەكتەۋلەردى 10 مىڭ بۇزۋشىلىقتىڭ جولىن كەستى.
جالپى، ۇيىمداستىرۋشىلىق جانە قۇقىقتىق شارالاردىڭ ناتيجەسىندە ا.ج. 10 ايىنىڭ قورىتىندىسى بويىنشا وتباسىلىق-تۇرمىستىق قاتىناستار سالاسىنداعى قۇقىق بۇزۋشىلىقتار تۋرالى حابارلامالاردى تىركەۋدىڭ 20%-عا، ونىڭ ىشىندە قىلمىستىق قۇقىق بۇزۋشىلىقتاردى 4،2%-عا، وتباسىلىق-تۇرمىستىق قاتىناستار سالاسىندا جاسالعان اۋىر قىلمىستاردى تىركەۋ 12%-عا تومەندەدى.
