مەملەكەتتىك كەڭەسشى ەرلان قارين قازاقستاندا ءتىل ماسەلەسىنە قاتىستى قاقتىعىستار جوق ەكەنىن، ءبىراق، وكىنىشكە قاراي، كەي جەرلەردە تۇرمىستىق مادەنيەتسىزدىك بايقالاتىنىن مالىمدەدى، – دەپ حابارلايدى Dalanews.kz.
مەملەكەتتىك كەڭەسشى ەرلان قارين ىشكى ساياساتتىڭ جۇزەگە اسىرىلۋ باعىتتارىن ۇلتتىق قۇرىلتاي مۇشەلەرىمەن تالقىلادى.
«ءتىل ماسەلەسىنە قاتىستى دەلىنەتىن ءبىرقاتار داۋلى جاعداي شىن مانىندە قىزمەت كورسەتۋ سالاسىنداعى تۇرمىستىق قاقتىعىس سانالادى. مۇنداي جاعدايلاردى كەيبىر ادامدار باسقا باعىتقا بۇرۋعا تىرىسادى»، – دەدى ول كەزدەسۋدە.
ءقاريننىڭ ايتۋىنشا، مۇنداي جايتتىڭ تۇپكى سەبەبى – قاراپايىم ەتيكا، ءتارتىپ پەن سىپايىلىق ماسەلەسى.
«ءبىزدىڭ ەلىمىزدە ەشقانداي تىلدىك قاقتىعىس جوق، ءبىراق، وكىنىشكە قاراي، كەي جەرلەردە تۇرمىستىق مادەنيەتسىزدىك بار. وسى ماسەلەمەن ءبىرىنشى كەزەكتە اينالىسۋىمىز كەرەك: تاربيە بەرۋ، جاڭا قوعامدىق ەتيكانى، مىنەز-قۇلىق مادەنيەتىن ناسيحاتتاۋ قاجەت»، – دەدى ول.
مەملەكەتتىك كەڭەسشى بۇل وقيعالار قوعامدىق جاي-كۇيدى كورسەتپەيتىنىنە نازار اۋداردى.
«كەيبىر ادامدار قاقتىعىستى ادەيى ۋشىقتىرىپ، وزدەرىنىڭ جەكە پايداسىن كوزدەيدى»، – دەپ سانايدى ول.
ونىڭ ايتۋىنشا، مۇنداي قاقتىعىستاردىڭ ۇيىمداستىرۋشىلارى زاڭ بويىنشا جاۋاپكەرشىلىككە تارتىلادى.
