ريددەردە مەملەكەتتىك مەكەمەلەر، كاسىپورىندار جانە الەۋمەتتىك قىزمەتتەر ءۇشىن جۇمىس كەستەسى وزگەردى، دەپ حابارلايدى Dalanews.kz.
14 ناۋرىزدان باستاپ شىعىس قازاقستان وبلىسى ريددەر قالاسىنىڭ تۇرعىندارى ءۇشىن جۇمىس كۇنى ءبىر ساعات ەرتە باستالادى – ساعات 08:00-دەن 17:30-عا دەيىن، تۇسكى ءۇزىلىس 12:00-دەن 13:30-عا دەيىن.
قالا اكىمدىگىندە بۇل وزگەرىس ەڭبەك پروسەسىن وڭتايلاندىرۋعا جانە جۇمىس تيىمدىلىگىن ارتتىرۋعا باعىتتالعانىن، سونىمەن قاتار ءوڭىردىڭ كليماتتىق ەرەكشەلىكتەرى ەسكەرىلگەنىن ءتۇسىندىردى.
“بۇگىندە شىعىس قازاقستان وبلىسىنىڭ 11 اۋدانى جاڭا جۇمىس كەستەسىنە كوشتى، جانە ءبىز بۇل باستامانى قۋانا قابىلدادىق. جۇمىس كەستەسىن وزگەرتۋ – كۇن ءتارتىبىن ىڭعايلى ءارى ءونىمدى ەتۋگە جاسالعان قادام. ەندى تۇرعىندار تاڭەرتەڭگى ۋاقىتتى ءتيىمدى پايدالانىپ، جارىق كەزەڭدە كوبىرەك ءىس اتقارا الادى، بۇل قوسىمشا كۇش سالۋدى قاجەت ەتپەيدى”، – دەپ ءتۇسىندىردى ريددەر قالاسى اكىمىنىڭ ورىنباسارى بولات اقۋجانوۆ.
ول بۇل وزگەرىستەردىڭ جۇمىس ىستەيتىن ازاماتتارعا دا، ولاردىڭ وتباسىلارىنا دا پايدا اكەلەتىنىن اتاپ ءوتتى.
بۇل وزگەرىستەر مەكتەپتەرگە، بالاباقشالارعا جانە مەديسينالىق مەكەمەلەرگە اسەر ەتپەيدى، ويتكەنى ولار بۇرىننان 08:00-دەن باستاپ جۇمىس ىستەپ كەلەدى.
ريددەر قالاسى اكىمىنىڭ ورىنباسارى بولات اقۋجانوۆتىڭ ايتۋىنشا، جاڭا جۇمىس كەستەسىنە كوشۋ تۋرالى شەشىم قابىلداماس بۇرىن بىرنەشە كەزدەسۋلەر وتكىزىلىپ، ماسەلە جان-جاقتى تالقىلانعان.
