قازاقستاندا شارۋا قوجالىقتارىنا سيىر ەتىن ەكسپورتتاۋدى جەڭىلدەتۋ جوسپارلانىپ وتىر. بۇل تۋرالى ءتيىستى وزگەرىستەر جوباسى “اشىق نقا” پورتالىندا جاريالاندى، دەپ حابارلايدى Dalanews.kz.

جوباعا سايكەس، ەكسپورتقا قاتىساتىن شارۋاشىلىقتارعا قويىلاتىن تالاپتار قايتا قارالماق. اتاپ ايتقاندا، وزىندە ەت وڭدەيتىن كاسىپورنى بار فەرمەرلىك شارۋاشىلىقتار ءۇشىن ەڭ تومەنگى تالاپ 500 باس ءىرى قاراعا دەيىن تومەندەتىلۋى مۇمكىن.

ال ءوز ەت كومبيناتى جوق، ءبىراق ءىرى كولەمدە مال ۇستايتىن شارۋاشىلىقتارعا دا شەتەلگە ءونىم شىعارۋ مۇمكىندىگى بەرىلمەك. ەگەر مۇنداي شارۋا قوجالىقتارىندا ءىرى قارا سانى 5 مىڭ باستان اسسا، ولار ەتتى باسقا ەت كومبيناتتارىنىڭ قىزمەتىن پايدالانۋ ارقىلى ەكسپورتتاي الادى.

سونىمەن قاتار سيىر ەتىن شەتەلگە شىعارۋعا التى ايلىق كۆوتا ەنگىزۋ ۇسىنىلىپ وتىر. جوسپار بويىنشا جاڭا سويىلعان، سالقىنداتىلعان جانە مۇزداتىلعان سيىر ەتىنىڭ جالپى ەكسپورت كولەمى 20 مىڭ تونناعا دەيىن بولۋى مۇمكىن.

كۆوتا كولەمى شارۋاشىلىقتاعى مال باسىنا قاراي بەلگىلەنەدى. مىسالى، شامامەن 5 مىڭ باس ءىرى قاراسى بار فەرمەرلىك شارۋاشىلىقتار 1 مىڭ تونناعا دەيىن ەت ەكسپورتتاي الادى. 10 مىڭ باس مالى بار شارۋاشىلىقتارعا 2 مىڭ تونناعا دەيىن، 15 مىڭ باسى بارلارعا 3 مىڭ تونناعا دەيىن كۆوتا قاراستىرىلماق. ال 20 مىڭ باس مالى بار فەرمالارعا 4 مىڭ تونناعا دەيىن، ەڭ ءىرى – شامامەن 50 مىڭ باس مالى بار شارۋاشىلىقتارعا 10 مىڭ تونناعا دەيىن ەت ەكسپورتتاۋعا مۇمكىندىك بەرىلەدى.