قازاقستاندا جارييالانعان امنيستييا اياسىندا 620 سوتتالعان ادام تٷزەۋ مەكەمەلەرٸنەن بوساتىلدى. بۇل تۋرالى ٸشكٸ ٸستەر مينيسترلٸگٸ مەلٸمدەدٸ, دەپ حابارلايدى dalanews.kz.
مينيسترلٸكتٸڭ حابارلاۋىنشا, امنيستييانى قولدانۋ ٷشٸن سوتتارعا 10 مىڭنان استام ماتەريال جولدانعان. ونىڭ ٸشٸندە 4 400-گە جۋىعىن قىلمىستىق-اتقارۋ جٷيەسٸ مەكەمەلەرٸ, ال 6 900-دەن استامىن پروباتسييا قىزمەتٸ دايىنداعان.
قازٸرگٸ ۋاقىتقا دەيٸن سوتتار مىڭنان استام ماتەريالدى قاراپ, نەتيجەسٸندە 620 ادام كولونييادان بوساتىلدى. سونىمەن قاتار پروباتسييا ەسەبٸندە تۇرعان 724 ازامات جازاسىنىڭ قالعان بٶلٸگٸن ٶتەۋدەن بوساتىلدى. بۇدان بٶلەك, 730-دان استام سوتتالعاننىڭ جازا مەرزٸمٸ قىسقارتىلعان.
"سوتتار مىڭنان استام ماتەريالدى قاراپ, تٷزەۋ مەكەمەلەرٸنەن 620 ادامدى بوساتتى. سونىمەن بٸرگە پروباتسييا قىزمەتٸنٸڭ ەسەبٸندە تۇرعان 724 ازامات جازاسىن ٶتەۋدەن بوساتىلدى, ال 730-دان استام سوتتالعاننىڭ جازا مەرزٸمٸ قىسقارتىلدى", - دەپ مەلٸمدەدٸ ٸٸم.
ۆەدومستۆو امنيستييانىڭ بارلىق سوتتالعانعا بٸردەي اۆتوماتتى تٷردە قولدانىلمايتىنىن اتاپ ٶتتٸ.
"قىلمىستىق امنيستييا اۆتوماتتى تٷردە قولدانىلمايدى. ەربٸر ادامنىڭ ٸسٸ جەكە قارالادى, ال تٷپكٸلٸكتٸ شەشٸمدٸ سوت قابىلدايدى", - دەلٸنگەن ٸشكٸ ٸستەر مينيسترلٸگٸنٸڭ حابارلاماسىندا.
