پرەمەر- ءمينيستردىڭ ورىنباسارى- ق ر جاساندى ينتەللەكت جانە سيفرلىق دامۋ ءمينيسترى جاسلان مادييەۆ «ۇلتتىق بەينەباقىلاۋ جۇيەسىن» ەنگىزۋ جوسپارى تۋرالى ايتتى، دەپ حابارلايدى Dalanews.kz.
ء-بىز بەيبىتشىلىك، ادىلدىك جانە ينستيتۋتتاردىڭ ءتيىمدى جۇمىسىن قامتاماسىز ەتۋ ءۇشىن زاماناۋي تەحنولوگيالاردى، اسىرەسە قۇقىقتىق قىزمەتتەردى جاقسارتۋعا، قۇقىق قورعاۋ ورگاندارىنىڭ تيىمدىلىگىن ارتتىرۋعا جانە ازاماتتاردىڭ قۇقىقتارىن قورعاۋعا كومەكتەسەتىن جاساندى ينتەللەكتىنى پايدالانۋ قاجەت ەكەنىن تۇسىنەمىز،- دەدى مادييەۆ قازاقستان رەسپۋبليكاسىنداعى تۇراقتى دامۋ سالاسىنداعى ۇلتتىق ماقساتتار مەن مىندەتتەردىڭ ىسكە اسىرىلۋىن مونيتورينگتەۋ جونىندەگى پارلامەنتتىك كوميسسيانىڭ XI وتىرىسىندا.
ونىڭ ايتۋىنشا، بۇل باعىتتا مينيسترلىك قۇقىق قورعاۋ ورگاندارىمەن بىرلەسە وتىرىپ اۋقىمدى جۇمىستار جۇرگىزۋدە. ازاماتتاردىڭ قۇقىقتىق اقپاراتقا قولجەتىمدىلىگىن جەڭىلدەتەتىن، زاڭگەرلىك سۇراقتارعا جەدەل ءارى ناقتى جاۋاپ بەرەتىن «قۇقىقتىق كەڭەس بەرەتىن جي- اگەنت» سياقتى شەشىمدەر ىسكە اسىرىلۋدا.
بولاشاقتا قوعامدىق كەڭىستىكتەردى تاۋلىك بويى باقىلاۋدى قامتاماسىز ەتەتىن جاساندى ينتەللەكتىنى قولداناتىن «ۇلتتىق بەينەباقىلاۋ جۇيەسىن» ەنگىزۋ جوسپارلانىپ وتىر.
-جۇيە بەت-الپەتتەردى، كولىك نومىرلەرىن اۆتوماتتى تۇردە تانيدى، سونداي- اق كۇدىك تۋدىراتىن جاعدايلاردى (توبەلەستەر، ادامداردىڭ جاپپاي جينالۋى، قالدىرىلعان زاتتار) انىقتاپ، بۇل قوعامدىق قاۋىپسىزدىك دەڭگەيىن ارتتىرىپ، قۇقىق قورعاۋ ورگاندارىنىڭ جەدەل ارەكەت ەتۋ مۇمكىندىگىن كۇشەيتەدى،- دەدى مينيستر.
