قازاقستاندا ماسكا تاعۋ رەجيمى ەنگىزىلىپ جاتىر، - دەپ حابارلايدى Dalanews.kz. 

قازاقستاننىڭ باس مەملەكەتتىك سانيتارلىق دارىگەرى ايجان ەسماعامبەتوۆا قاۋلىعا قول قويدى. قۇجاتقا سايكەس دەنساۋلىق ساقتاۋ ۇيىمدارىندا ماسكا تاعۋ رەجيمى ەنگىزىلەدى. 

سانيتاريالىق-ەپيدەميولوگيالىق باقىلاۋ كوميتەتىنىڭ وبلىستاردىڭ، الماتى، استانا، شىمكەنت قالالارىنىڭ دەنساۋلىق ساقتاۋ باسقارمالارىنىڭ، اۋماقتىق دەپارتامەنتتەرىنىڭ باسشىلارى:

• "مەديسينالىق ۇيىمداردا پەرسونالدىڭ جانە كەلۋشىلەردىڭ مەديسينالىق ماسكالاردى پايدالانۋىن، انتيسەپتيكتەردىڭ بولۋىن؛
• حالىق اراسىندا COVID-19 كوروناۆيرۋس ينفەكسياسىنىڭ، تۇماۋدىڭ جانە جرۆي پروفيلاكتيكا شارالارى تۋرالى ءاقپاراتتىق-تۇسىندىرۋ جۇمىسىن جۇرگىزۋدى قامتاماسىز ەتسىن"، - دەلىنگەن قۇجاتتا.

وبلىستاردىڭ، الماتى، استانا، شىمكەنت قالالارىنىڭ جەرگىلىكتى اتقارۋشى ورگاندارىنا، ورتالىق مەملەكەتتىك ورگاندارعا، مەنشىك نىسانىنا قاراماستان جەكە جانە زاڭدى تۇلعالارعا:

• "حالىق كوپ جينالاتىن جەرلەردە (اۋەجايلار، تەمىرجول ۆوكزالدارى، اۆتوۆوكزالدار، بازارلار، ساۋدا-ويىن-ساۋىق ورتالىقتارى، ساۋدا ۇيلەرى، تەاترلار، كينوتەاترلار، حقكو-ى، بانكتەر جانە ت.ب.)، كولىكتىڭ بارلىق تۇرلەرىندە (قوعامدىق كولىك، اۋە، تەمىر جول كولىگى) مەديسينالىق نەمەسە ماتادان تىگىلگەن ماسكالاردى پايدالانۋعا ۇسىنىم بەرىلسىن"، - دەلىنگەن قۇجاتتا.

ەلدە كوروناۆيرۋس جۇقتىرعاندار سانى كۇرت ءوستى. دسم سانيتاريالىق-ەپيدەميولوگيالىق باقىلاۋ كوميتەتى مالىلىمەتىنشە، بيىل قاڭتاردا (2023 جىلعى جەلتوقسانمەن سالىستىرعاندا) ەلىمىزدە كوروناۆيرۋس جۇقتىرعاندار سانى 2،5 ەسە ءوسىپ، 477 دەرەك تىركەلگەن. بىلتىر جەلتوقساندا 187 جاعداي بولعان.

ۆيرۋس جۇقتىرعانداردىڭ ەڭ كوپ سانى الماتى (143 جاعداي) جانە استانا (74 جاعداي) قالالارىندا.