قازاقستاندا وتباسىنداعى زورلىق-زومبىلىققا قاتىستى زاڭ قاتاڭداتىلۋى مۇمكىن، دەپ حابارلايدى Dalanews.kz.

وسى تۇستا پارلامەنت ءماجىلىسى "قازاقستاننىڭ كەيبىر زاڭنامالىق اكتىلەرىنە ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭ جوباسىن قارايدى.

ءماجىلىس دەپۋتاتى ءارى الەۋمەتتىك-مادەني دامۋ كوميتەتىنىڭ ءتوراعاسى اسحات ايماعامبەتوۆ زاڭ جوباسى ءماجىلىس دەپۋتاتتارىنىڭ باستاماسىمەن ازىرلەنگەنىن ءارى قۇجات پرەزيدەنتتىڭ وتباسىنداعى زورلىق-زومبىلىق ءۇشىن جاۋاپكەرشىلىكتى قاتاڭداتۋ تاپسىرماسىنا تولىعىمەن سايكەس كەلەتىنىن اتاپ ءوتتى.

زاڭ جوباسىندا دەپۋتاتتار بىرنەشە نەگىزگى نورما ۇسىندى. اتاپ ايتاتىن بولساق:

• بىرىنشىدەن، ۇرىپ-سوعۋدى جانە دەنساۋلىققا جەڭىل زيان كەلتىرۋدى قازىرگى اكىمشىلىك جاۋاپكەرشىلىكتەن قىلمىستىق جاۋاپكەرشىلىككە جاتقىزۋ، جازاسىن الدەقايدا قاتاڭداتۋ؛


• ەكىنشىدەن، جابىرلەنۋشىنىڭ ءوتىنىشىن كۇتپەي-اق، زورلىق-زومبىلىق تۋرالى ب ا ق نەمەسە ونلاين پلاتفورمالارداعى اقپارات نەگىزىندە ءتىستى شارالار قابىلداۋ قۇقىعىن بەرۋ؛


• وتباسىندا زورلىق-زومبىلىق جاساعان ادامداردىڭ اگرەسسيۆتى مىنەز-قۇلقىن وزگەرتۋ ءۇشىن سوتقا پسيحولوگيالىق كومەك كورسەتۋدى مىندەتتەۋ وكىلەتتىگىن بەرۋ؛


• پەدوفيلدەردى ءومىر بويىنا باس بوستاندىعىنان ايىرۋ؛


• سۋيسيدتى ناسيحاتتاعانى نەمەسە سۋيسيدكە يتەرمەلەگەنى ءۇشىن قىلمىستىق جاۋاپكەرشىلىك ەنگىزۋ؛


• بالالارعا ارنالعان ينتەرنات ۇيىمدارىنا الدىن-الا ەسكەرتۋسىز كەز-كەلگەن ۋاقىتتا بارۋ جانە تەكسەرۋ.