ۇلتتىق ستاتيستيكا بيۋروسى 2025 جىلى تۇرعىن ٷي نارىعىندا قانداي ٶزگەرٸستەر بولعانىن مەلٸيدەدٸ. جەلتوقسان ايىنداعى كٶرسەتكٸشكە سەيكەس, ەڭ جوعارى ٶسٸم جالعا بەرۋ نارىعى مەن ەكٸنشٸ دەڭگەيلٸ تۇرعىن ٷيدە بايقالسا, جاڭا پەتەرلەردٸڭ قىمباتتاۋى سالىستىرمالى تٷردە باياۋلاعان, دەپ حابارلايدى Dalanews.kz.
جاڭا تۇرعىن ٷيلەردٸڭ باعاسى جەلتوقساندا بٸر ايدا ورتا ەسەپپەن 0,4 پايىزعا ارتسا, ەكٸنشٸ دەڭگەيلٸ تۇرعىن ٷيلەر 1,2 پايىزعا, ال جالعا بەرٸلەتٸن باسپانا 2,1 پايىزعا قىمباتتاعان.
جىلدىق ەسەپتە جاڭا تۇرعىن ٷيلەردٸڭ باعاسى ەل بويىنشا 15,7 پايىزعا ٶستٸ. ەڭ جوعارى ٶسٸم قوناەۆ پەن پاۆلودار قالالارىندا بايقالدى. الماتى مەن استانادا دا باعا ايتارلىقتاي كٶتەرٸلگەن.
جەلتوقسان ايىنىڭ قورىتىندىسى بويىنشا جاڭا تۇرعىن ٷيلەردٸڭ بٸر شارشى مەترٸ ورتا ەسەپپەن 571 مىڭ تەڭگە بولسا, ەكٸنشٸ نارىقتا بۇل كٶرسەتكٸش 594,7 مىڭ تەڭگەگە جەتتٸ. ەڭ قىمبات تۇرعىن ٷيلەر الماتى مەن استانادا تٸركەلگەن.
جالعا بەرۋ نارىعىندا بٸر شارشى مەتردٸڭ ورتاشا قۇنى 5024 تەڭگەنٸ قۇرادى. ەڭ جوعارى جالداۋ اقىسى الماتى مەن استانادا, ال ەڭ قولجەتٸمدٸ باعا تاراز بەن تٷركٸستان قالالارىندا بايقالدى.
