قازاقستان مەكتەپتەرىندە كەڭىنەن قولدانىلاتىن Kundelik ەلەكتروندى پلاتفورماسىنداعى وقۋشىلاردىڭ جەكە دەرەگى ينتەرنەتكە تاراپ كەتكەنى بەلگىلى بولدى، دەپ حابارلايدى Dalanews.kz.
بۇل جونىندە العاش بولىپ “ۆىحود ك موريۋ” تەلەگرام ارناسى مالىمدەدى.
ارنانىڭ حابارلاۋىنشا، Kundelik – رەسەيلىك “دنيەۆنيك.رۋ” پلاتفورماسىنىڭ بالاماسى. جەلتوقسان ايىنىڭ باسىندا جەلىگە شىققان مالىمەتتەردە وقۋشىلاردىڭ تولىق ءاتى-جونى، تۋعان كۇنى، وقيتىن مەكتەبى مەن سىنىبى كورسەتىلگەن. فايلدارداعى دەرەك 2025 جىلدىڭ قىركۇيەگىندەگى جاعدايدى قامتيدى، بۇل دەرەكتەر بازاسىنىڭ جاقىندا جاسالعانىن بىلدىرەدى.
"پلاتفورما وپەراتورلارى ازىرگە رەسمي تۇسىنىكتەمە بەرگەن جوق"، - دەيدى دەرەككوز.
حابارلامادا ايتىلعانداي، جەكە اقپاراتتىڭ ناقتى كولەمىن باعالاۋ قيىن. Darknet-تە بىرنەشە مىڭ جازبا جيناقتالعان “سىناق فايلدارى” پايدا بولعان. بۇل – الەۋەتتى ساتىپ الۋشىلارعا ارنالعان ۇلگىلەر عانا. ال جەكە دەرەكتە لوگيندەر، پارولدەر، تەلەفون نومىرلەرى نەمەسە باسقا دا جەكە اقپارات بولعان-بولماعانى ازىرگە بەلگىسىز. Kundelik قازاقستانداعى مەكتەپتەردىڭ باسىم بولىگىندە مىندەتتى پلاتفورما بولعاندىقتان، وقۋشىلار، اتا-انالار جانە مۇعالىمدەردى قوسقاندا، جۇيە ميلليونداعان پايدالانۋشىنى قامتيدى. دەمەك، تاراعان دەرەكتەردىڭ كولەمى وتە اۋقىمدى بولۋى مۇمكىن.
Kundelik پلاتفورماسىنىڭ يەلەرى رەتىندە ونىڭ نەگىزىن قالاۋشى مۇحتار يلياسوۆ، سەرىكتەسى – "زەردە" حولدينگىنىڭ بۇرىنعى توپ-مەنەدجەرى اسكقار بيشيگيەۆ (Innovation Process Group ارقىلى)، سونداي-اق نۇرسۇلتان نازاربايەۆتىڭ قىزى دينارا قۇلىبايەۆا (MP Innovations) جانە رەسەيلىك “دنيەۆنيك.رۋ” كومپانياسى كورسەتىلگەن. قازاقستاندىق ەلەكتروندى كۇندەلىك رەسەيلىك جۇيەنىڭ تەحنولوگياسى نەگىزىندە ازىرلەنگەن.
“دنيەۆنيك.رۋ”-دىڭ 49%-ى كاسىپكەر گاۆرييل ليەۆيگە، 33%-ى بۇرىنعى فسين قىزمەتكەرى ميحايل كاۋروۆقا، 18%-ى بۇرىنعى مۇنايشى انتون سىسونوۆقا تيەسىلى. قالعان 3%-ى «سكولكوۆو» قورىمەن بايلانىستى الەكسەي سولوۆيەۆكە قارايدى. كومپانيا 2011 جىلدان بەرى رەسەي مەملەكەتتىك ورگاندارىنان 500 ملن رۋبلدەن استام قارجىلاندىرۋ العان.
Kundelik پەن “دنيەۆنيك.رۋ” بۇعان دەيىن دە دەرەكتەردىڭ ءالسىز قورعالۋى، نارىقتى مونوپوليالاۋ جانە اقىلى قىزمەتتەردى ەنگىزۋ ءۇشىن ءجيى سىنعا قالعان ەدى. كەيبىر جاعدايلاردا پلاتفورمالاردا جارنامالىق قاتەلەردىڭ كەسىرىنەن پورنوگرافيالىق ۆيدەولار پايدا بولعانى دا تىركەلگەن. مۇعالىمدەر مەن اتا-انالار جۇيەنىڭ ءجيى بۇزىلاتىنىن تالاي مارتە كوتەرگەن.
بۇل – قازاقستاندىقتاردىڭ جەكە دەرەكتەرى رەسەيلىك سەرۆيستەردىڭ قولىنان تاراعان العاشقى جاعداي ەمەس. بىلتىر جەلتوقساندا قازاقستاندىقتاردىڭ ىشكى اۋە رەيستەرى تۋرالى مالىمەتتەر جاريا بولعان ەدى. وندا Air Astana، Scat، Qazaq Air جانە 2020 جىلى جابىلعان Bek Air كومپانيالارى بويىنشا 700 مىڭنان استام رەيستىڭ دەرەگى قولجەتىمدى بولعان. جولاۋشىلاردىڭ ءاتى-جونى، قۇجات نومىرلەرى، تەلەفون نومىرلەرى مەن ەلەكتروندى پوشتالارى كورسەتىلگەن اقپارات رەسەيدىڭ Leonardo جانە "سيرەنا-تريەۆەل" برونداۋ جۇيەلەرىنەن تاراعانى انىقتالدى. ۋكراينالىق KibOrg توبى 664 ميلليون رەيس تۋرالى اقپاراتقا قول جەتكىزگەنىن مالىمدەگەن.
سول كەزدە قازاقستاننىڭ سيفرلىق دامۋ مينيسترلىگى رەسەيلىك سەرۆيستەردى جاۋاپقا تارتۋعا ۋادە بەرگەنىمەن، بۇل ىسكە اسپادى. ال بيىل قازان ايىندا ماسكەۋدەگى باسمان سوتى "سيرەنا-تريەۆەل"ء-دىڭ بۇرىنعى بەنەفيسيارى يبراگيم سۋلەيمانوۆتى قاماۋعا الدى. ول بۇعان دەيىن الاياقتىق جانە قاراجات جىمقىرۋ بويىنشا سوتتالعان بولسا، ەندى تاپسىرىسپەن كىسى ءولتىرۋ ۇيىمداستىردى دەگەن ايىپ تاعىلدى.
