قازاقستاندا سۋ رەسۋرستارى جانە يرريگاسيا مينيسترلىگى ازىرلەگەن جاڭا سۋ كودەكسى كۇشىنە ەندى،- دەپ حابارلايدى Dalanews.kz
كودەكستە العاش رەت «سۋ قاۋىپسىزدىگى» ۇعىمى ەنگىزىلدى. بۇل حالىق پەن ەكونوميكانى سۋ تاپشىلىعى مەن لاستانۋدان قورعاۋ، سونداي-اق ترانسشەكارالىق سۋ رەسۋرستارىنداعى ۇلتتىق مۇددەنى قامتاماسىز ەتۋ دەگەندى بىلدىرەدى.
ەكوجۇيەلەردى ساقتاۋ ماقساتىندا «ەكولوگيالىق اعىن» ۇعىمى ەنگىزىلدى – بۇل وزەن-كولدەردەگى ەڭ تومەنگى سۋ دەڭگەيىن ساقتاۋ تالابى. سۋ رەسۋرستارىن باسقارۋدا باس جانە باسسەيندىك جوسپارلار ازىرلەنىپ، جۇرتشىلىقتىڭ شەشىم قابىلداۋعا قاتىسۋى كەڭەيتىلمەك.
شاعىن وزەندەرگە تۇيىق بوگەت سالۋعا تىيىم سالىنادى. سونىمەن قاتار سۋلى-باتپاقتى القاپتار، مۇزدىقتار ارنايى قورعاۋعا الىنىپ، سۋ قورعاۋ ايماقتارىن انىقتاۋ مىندەتى جەرگىلىكتى اكىمدىكتەرگە جۇكتەلدى.
كليماتتىڭ وزگەرۋىنە بەيىمدەلۋ شارالارى جەكە تاراۋدا قارالعان. بۇل — سۋ تاسقىنى مەن قۇرعاقشىلىققا دايىندىق، سۋ قويمالارىن تەرەڭدەتۋ، ەگىن اينالىمىن ەنگىزۋ، جاڭبىر مەن ەرىگەن سۋدى جيناۋ سياقتى باعىتتاردى قامتيدى.
سۋ رەسۋرستارىن ءتيىمدى باسقارۋ ءۇشىن ۇلتتىق اقپاراتتىق جۇيە قۇرىلىپ جاتىر. ءقازىردىڭ وزىندە ونىڭ ءتورت ءمودۋلى («اكىمشىلىك»، «سۋ پايدالانۋ»، «ترانسشەكارالىق سۋ»، «كارتوگرافيا») پيلوتتىق رەجيمدە جۇمىس ىستەيدى.
سۋدى ۇنەمدەۋگە ىنتالاندىراتىن جاڭا تەتىكتەر دە قاراستىرىلعان. سۋ پايدالانۋعا رۇقسات تەك قايتا سۋمەن جابدىقتاۋ جوسپارى بولعان جاعدايدا عانا بەرىلەدى. بۇل جوسپاردى جاساۋعا ەكى جىل، ال تولىق اۋىسۋعا بەس جىل ۋاقىت بەرىلەدى.
اۋىل شارۋاشىلىعىنا ارنالعان نورمالار دا ناقتىلاندى:
- يرريگاسيالىق كوندومينيۋم قۇرۋ ءتارتىبى بەلگىلەندى؛
- قار سۋىن جيناۋ ءۇشىن 2 ملن م³-كە دەيىنگى توعانداردى ارنايى رۇقساتسىز سالۋعا بولادى (تەك تىركەۋ قاجەت).
گيدروتەحنيكالىق قۇرىلىستاردىڭ قاۋىپسىزدىگى جەكە تاراۋدا رەتتەلدى. ولارعا كوپفاكتورلى تەكسەرۋ، قاۋىپسىزدىك دەكلاراسياسى، پايدالانۋ ءتارتىبى مەن ارنايى رەگلامەنتتەر ەنگىزىلەدى.
كودەكستە سۋ قۇبىرى جانە كارىز جۇيەلەرىن دامىتۋ، جەراستى سۋلارىن ىزدەۋ، قورعاۋ مەن باقىلاۋ، كولەڭكەلى نارىقپەن كۇرەس شارالارى دا قامتىلعان.
جاڭا سۋ كودەكسىمەن بىرگە 13 زاڭ مەن بىرنەشە كودەكسكە وزگەرىستەر ەنگىزىلدى. اتاپ ايتقاندا، اكىمشىلىك كودەكس بۇزۋشىلىق ءۇشىن جاۋاپكەرشىلىكتى كۇشەيتسە، جەر جانە ەكولوگيا كودەكستەرى سۋ ايماقتارىن پايدالانۋ مەن قورعاۋ تالاپتارىن ناقتىلادى.
«جاڭا سۋ كودەكسىن ازىرلەۋ كەزىندە ءبىز بەس نەگىزگى قاعيدانى باسشىلىققا الدىق. بۇل سۋدى قورشاعان ورتانىڭ اجىراماس بولىگى، ازاماتتاردىڭ تىرشىلىك ارەكەتى مەن ەكونوميكالىق دامۋىنىڭ نەگىزى دەپ تانۋ، سۋدى قورعاۋ جانە ونىڭ سارقىلۋىن بولدىرماۋ، جەرۇستى جانە جەراستى سۋىن كەشەندى پايدالانۋ، سۋ ۇنەمدەۋ تەحنولوگيالارىن ەنگىزۋ جانە كليماتتىڭ وزگەرۋىنە بەيىمدەلۋ، سۋ قورىن قورعاۋ جانە پايدالانۋ جونىندەگى مىندەتتەردى شەشۋگە جۇرتشىلىقتى تارتۋ. بۇل قۇجات ەلىمىزدىڭ سۋ سالاسىنداعى جاڭا مەملەكەتتىك ساياساتىن قالىپتاستىرۋعا نەگىز بولادى. قۇجاتتى ازىرلەۋگە قاتىسقان پارلامەنت دەپۋتاتتارى مەن ساراپشىلارعا العىسىمدى بىلدىرەمىن»، – دەدى سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ.
