قازاقستاندا قۇرىلىس كومپانيالارىنا قوسىلعان قۇن سالىعىنىڭ (ققس) 16%-دىق مولشەرلەمەسىن ەنگىزۋ باسپانا باعاسىنىڭ وسۋىنە اكەلۋى مۇمكىن. بۇل تۋرالى ۇلتتىق ەكونوميكا ۆيسە-مينيسترى ازامات ءامرين مالىمدەدى، دەپ حابارلايدى Dalanews.kz.
ازامات ءامريننىڭ ايتۋىنشا، قازىرگى ۋاقىتتا ينفراقۇرىلىمدىق الىم ماسەلەسى تالقىلانۋدا، ءبىراق بۇل جونىندە تۇپكىلىكتى شەشىم ءالى قابىلدانعان جوق. دەگەنمەن، ۆيسە-مينيستر ققس ەنگىزۋدىڭ دۇرىس قادام بولاتىنىنا سەنىمدى.
“نەلىكتەن ققس سالۋ كەرەك ەكەنىن تۇسىندىرەيىن. 2023 جىلى ەلدىڭ ءجىو 135 ترلن تەڭگە بولدى. ونىڭ 17،5%-ى – كولەڭكەلى ەكونوميكا. بۇل رەسمي ستاتيستيكا، وعان سۇيەنۋىمىز كەرەك. ياعني، 135 ترلن تەڭگەنىڭ 20 ترلن تەڭگەسى كولەڭكەلى ەكونوميكانىڭ ۇلەسى. ونىڭ قۇرىلىمىنا كەلسەك، العاشقى بەستىككە كوتەرمە جانە بولشەك ساۋدا، اۋىل شارۋاشىلىعى، قۇرىلىس، دەنساۋلىق ساقتاۋ جانە ءبىلىم بەرۋ سالالارى كىرەدى”، – دەدى ءامرين ءماجىلىس كۋلۋارىندا.
ۆيسە-مينيستردىڭ سوزىنشە، قازىرگى تاڭدا قۇرىلىسشىلار قۇرىلىس ماتەريالدارىن ققس-سىز ساتىپ الادى. الايدا جاڭا ەرەجە بويىنشا، 16% ققس تولەگەن جاعدايدا، قۇرىلىس كومپانيالارى ءوز جەتكىزۋشىلەرىن “كولەڭكەدەن شىعارىپ”، سالىق تولەۋگە ىنتالاندىرۋعا ءماجبۇر بولادى.
“ەگەر قۇرىلىسشى ققس-تى ەسەپكە الا وتىرىپ، ساتىپ الۋشىلاردى زاڭداستىرماسا، بۇل اينالىم سالىعى بولادى. سول سەبەپتى ول جەتكىزۋشىلەرىن كولەڭكەدەن شىعارادى”، – دەپ ءتۇسىندىردى ازامات ءامرين.
ۇلتتىق ەكونوميكا مينيسترلىگىنىڭ بولجامى بويىنشا، جاڭا سالىقتىق رەفورما ينفلياسيا دەڭگەيىن شامامەن 3%-عا ارتتىرۋى مۇمكىن.
“باعانىڭ ءوسۋى، ارينە، بولادى، ءبىز مۇنى تۇسىنەمىز. اسىرەسە، ازىق-تۇلىك ەمەس تاۋارلاردىڭ باعاسى قىمباتتايدى”، – دەپ قورىتىندىلادى ۆيسە-مينيستر.
ساراپشىلاردىڭ پىكىرىنشە، ققس مولشەرلەمەسىنىڭ وزگەرۋى قۇرىلىس كومپانيالارى ءۇشىن قوسىمشا جۇكتەمە بولادى. بۇل جۇكتەمە، سايىپ كەلگەندە، پاتەر باعاسىنىڭ وسۋىنە اكەلۋى مۇمكىن. دەگەنمەن، مەملەكەتتىك ورگاندار سالىق رەفورماسىنىڭ نەگىزگى ماقساتى ەكونوميكانى كولەڭكەدەن شىعارۋ جانە سالىق تۇسىمدەرىن ارتتىرۋ ەكەنىن العا تارتادى.
