مۇناي سەرۆيستىك كومپانيالار وداعىنىڭ ءتورالقا ءتوراعاسى راشيد جاقسىلىقوۆ مۇناي بويىنشا قازاقستاننىڭ قازىرگى حال-احۋالى قانداي ەكەنىن ايتتى، - دەپ حابارلايدى Dalanews.kz.

ساراپشىنىڭ پىكىرىنشە، كوروناۆيرۋس ىندەتى كەزىندە الەمدىك الپاۋىتتار ءوز قورلارىن ابدەپ تولتىرىپ العان.

"كوۆيد كەلگەن كەزدە مۇنايىمىزدى بەرۋ ءۇشىن ءتىپتى ۇستىنە اقشا بەردىك. "مۇنايىمدى سەن الىپ كەتسەڭ، ساعان اقشا بەرەمىن" دەگەن جاعدايعا جەتتىك. ۇشاقتار ۇشپاي قالدى، سونداي جاعداي بولىپ قالدى. سول كەزدە جۇڭگو مەن ءۇندىستان وزدەرىنىڭ شيكىزات قويمالارىن مۇنايعا تولتىرىپ الدى"، - دەدى ول.

دەگەنمەن راشيد جاقسىلىقوۆ قازاقستان ءقازىر ءبىرقاتار جوبادان جاقسى پايدا كورىپ وتىرعانىن جەتكىزدى.

"ءۇش جوبادان (مۇناي جوبالارىنان - ەسك.) ءارتۇرلى پايدا كەلىپ وتىر. مىسالى، ءقازىر "تەڭىز" جوباسى ۇلكەن پايدا اكەلىپ وتىر. ءتىپتى ءبىزدىڭ بيۋدجەتتىڭ ۇشتەن ءبىرىن قالىپتاستىرىپ وتىر. ويتكەنى ينۆەستورلار سالعان اقشاسىن قايتارىپ بولىپ قالدى. ءقازىر (كەن ورنى - ەسك.) قازاقستاننىڭ پايداسىنا جۇمىس ىستەپ جاتىر. ارتىق ايتقان بولمايىن، 80 پايىزدىڭ ۇستىندە (مۇناي - ەسك.) قازاقستانعا قالىپ وتىر. قاشاعاننان ەكى پايىز عانا ەلدە قالىپ وتىر. 98 پايىزى شەتەلگە كەتىپ جاتىر. ويتكەنى ولار (ينۆەستورلار - ەسك.) وزدەرىنىڭ سالعان اقشاسىن قايتارىپ جاتىر. ءۇشىنشىسى - قاراشىعاناق، اقسايداعى گاز (زاۋىتى - ەسك.). ودان دا قازىرگى تاڭدا ۇلكەن پايدا كورىپ وتىرمىز، 70 پايىزدىڭ ۇستىندە قازاقستاندا قالادى"، - دەدى ساراپشى. 

جاقسىلىقوۆتىڭ سوزىنشە، الايدا قازاقستاندا ءقازىر جاڭا جەر قويناۋلارىن اشۋعا گەولوگيا سالاسى اقساپ تۇر. 

"جاڭا جەر قويناۋلارى جوق. گەولوگيا مۇلدە جۇمىس ىستەمەي جاتىر، اقساپ قالدى. قانىش ساتبايەۆ اشىپ كەتكەن جەر قويناۋلارىن پايدالانىپ جاتىرمىز. اۋىر مەتالل بولسىن، ءتۇرلى ءتۇستى مەتالل بولسىن - ءبارى سول كەزدەگى. ...گەولوگيا جۇمىسىن باستاۋى كەرەك. بۇل - ءبىرىنشى ماسەلە. قازىرگى تاڭدا بىزدە گەولوگيا كاستاسى جوعالىپ كەتتى. بىرەن-ساران گەولوگتار قالدى، ولاردى جوعالتىپ الاتىن بولساق، قايتا گەولوگيا عىلىمىن كوتەرۋىمىز كەرەك. ەكىنشىدەن، گەولوگيامەن اينالىساتىن كاسىپورىن مۇلدە جوق"، - دەدى جاقسىلىقوۆ.

ايتا كەتەيىك، دەرەكتەرگە سۇيەنسەك، قازاقستاننىڭ مۇناي بويىنشا جالپى وندىرىستەگى ۇلەسى 33،1 پايىز بولادى. ءوندىرىس بويىنشا ەكىنشى ورىندا اقش 30،9 پايىزبەن تۇر. ءۇشىنشى ورىندا ەۋروپا ەلدەرى تۇر، ۇلەس سالماعى - 18،4 پايىز. ولاردان كەيىن جۇڭگو تۇر، ۇلەسى - 11،4 پايىز جانە باسقا ەلدەر، ولاردىڭ ۇلەسى - 2،7 پايىز تۇر. ال مۇناي ەكسپورتى مىنا ەلدەرمەن ارادا جۇرگىزىلەدى: يتاليا، نيدەرلاندى، جۇڭگو، كورەيا رەسپۋبليكاسى، رۋمىنيا، فرانسيا، تۇركيا، گرەسيا، سينگاپۋر.