ءماجىلىس وتىرىسىندا "قازاقستان رەسپۋبليكاسىنىڭ كەيبىر زاڭنامالىق اكتىلەرىنە ويىن بيزنەسى، لوتەرەيالار جانە لوتەرەيا قىزمەتى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" قازاقستان رەسپۋبليكاسى زاڭىنىڭ جوباسى ءبىرىنشى وقىلىمدا قارالدى، دەپ حابارلايدى Dalanews.kz.
“مۇنىڭ قاراستىرىلىپ كەلە جاتقانىنىڭ وزىنە 2 جىلعا جۋىق ۋاقىت بولدى. كەيبىر نورمالارعا رەتتەۋشىلىك تالاپتار بويىنشا تالداۋدى جۇرگىزۋ ماقساتىندا ۇكىمەتتىڭ قورىتىندىسىن الۋدىڭ وزىنە 1،5 جىل كەتتى. ءبىر اتاپ وتەرلىگى، زاڭ جوباسىنا ماجىلىستەگى بارلىق فراكسيا وكىلدەرى باستاماشى بولىپ وتىر”، – دەپ اتاپ ءوتتى بايانداماشى ءماجىلىس دەپۋتاتى ەلنۇر بەيسەنبايەۆ.
بۇل تاقىرىپ ەلىمىز ءۇشىن وزەكتى ەكەنىن بىرنەشە جايتتان بايقاۋعا بولادى:
- بىرىنشىدەن، قۇمار ويىنىنا شىرمالعاندار سانىنىڭ ارتۋى. دەرەكتەرگە جۇگىنسەك، كەيىنگى ەكى جارىم جىلدا ەلىمىزدىڭ شامامەن ءاربىر بەسىنشى ادامى ويىن وينايدى ەكەن نەمەسە قۇمار ويىندارىنا قانداي-دا ءبىر قاتىسى بار.
- ەكىنشىدەن، وتباسى ينستيتۋتىن السىرەتۋى. ەلىمىزدەگى اجىراسۋلاردىڭ 40%-ىنا وسى لۋدومانيا تىكەلەي سەبەپ بولىپ وتىر. تۇرمىستىق زورلىق-زومبىلىققا باراتىنداردىڭ دەنى – وسى قۇمار ويىنعا شالدىققاندار.
- ۇشىنشىدەن، ءسۋيسيدتى ءورشىتۋى. ماسەلەن، 2022 جىلى ەلىمىزدە 3 مىڭ 676 ادام وزىنە قول جۇمساپ قايتىس بولسا، ولاردىڭ ءاربىر بەسىنشىسىنىڭ سەبەبى – لۋدومانيا.
- تورتىنشىدەن، قىلمىستىڭ ەتەك الۋى. ەلىمىزدە قىلمىس جاسايتىنداردىڭ 20%-ى لۋدومان ەكەنى بەلگىلى بولدى. ولار باسكە تىگەتىن اقشا تابۋ ءۇشىن الدىمەن قارىز الادى، سودان سوڭ ۇرلىق، توناۋ سەكىلدى قىلمىستارعا بارادى.
- بەسىنشىدەن، كولەڭكەلى ەكونوميكانى كۇشەيتۋى. ويىن نارىعى اينالاسىندا ۇلكەن قاراجات اينالىپ جاتىر. ماسەلەن، بىلتىر بۋكمەكەرلىك كەڭسەلەردىڭ جىلدىق اينالىمى بەيرەسمي اقپارات بويىنشا 1 تريلليون تەڭگەگە جەتكەن.
سوندىقتان زاڭ اياسىندا مىنا شارالار ىسكە اسىرىلادى.
- زاڭدا ماكسيمالدى تۇردە بۋكمەكەرلىك كەڭسەلەر مەن كازينولاردىڭ جارناماسىن شەكتەۋ قاراستىرىلعان. وندا ۇيلەردىڭ قاسبەتتەرىندە، فاسادتارىندا، عيماراتتاردا، قۇرىلىستاردىڭ قورشاۋلارىندا، كولىك قۇرالدارىندا سىرتقى جارناماعا تىيىم سالىنادى. ينتەرنەت رەسۋرستارىندا، رەسمي سايتتاردا، تەلەارنالار مەن راديودا، مەرزىمدى باسپا باسىلىمدارىندا، كينو بەتتەرىندە، ءموبيلدى وپەراتورلاردىڭ سمس حاتتامالارىنا دا جارناماعا تولىق تىيىم سالىنادى. ەندى بەلگىلى بلوگەرلەر مەن الەۋمەتتىك جەلىدەگى تانىمال تۇلعالارعا مۇنداي ويىن تۇرلەرىن جارنامالاۋعا تىيىم سالىنادى. جارناما تەك سپورتتىق وبەكتىلەر، سپورتتىق باعىتتاعى سايتتار، تەلەارنالار مەن سپورتتىق ءىس-شارالاردا عانا رۇقسات ەتىلەدى.
- ويىندا ءباس تىگۋ جاسى 21 جاستان 25 جاسقا دەيىن كوتەرىلەدى.
- وتەلمەگەن اليمەنتتىك جانە نەسيەلىك قارىزى بار ازاماتتاردىڭ قۇمار ويىنعا ءباس تىگۋ مۇمكىندىگى شەكتەلەدى. ياعني بورىشكەرلەردىڭ ءبىرىڭعاي رەەسترىندە مالىمەتتەرى بار جەكە تۇلعالاردى قۇمار ويىندارعا جانە ءباس تىگۋگە جىبەرۋگە تىيىم سالۋ بەلگىلەنەدى.
- ويناۋ جاسىنا جەتپەگەن ازاماتتاردىڭ قۇمار ويىندارىنا جانە ءباس تىگۋگە قاتىسۋى شەكتەلەدى. ولارعا زاڭسىز ويىن ويناۋعا مۇمكىندىك بەرگەن زاڭدى تۇلعالارعا قوماقتى كولەمدە ايىپپۇل سالىنادى جانە قايتالاناتىن جاعدايدا ليسەنزيالارى توقتاتىلا تۇرادى.
- زاڭسىز ونلاين كازينو ۇيىمداستىرۋشىلارعا قىلمىستىق كودەكستىڭ 307-بابى بويىنشا جازا قولدانىلادى. اتاپ ايتقاندا، مۇلكi تاركiلەنiپ، 2000 اەك دەيiنگi مولشەردە ايىپپۇل سالۋعا نە سول مولشەردە تۇزەۋ جۇمىستارىنا نە 600 ساعاتقا دەيىنگى مەرزىمگە قوعامدىق جۇمىستارعا تارتۋعا نە 2 جىلعا دەيiنگi مەرزiمگە باس بوستاندىعىن شەكتەۋگە نە سول مەرزiمگە باس بوستاندىعىنان ايىرۋعا جازالانادى.
- زاڭسىز لوتوماتيكتەر مۇلدەم جويىلادى. سونداي-اق بالالار، ءبىلىم بەرۋ، مەديسينالىق، ءدىني جانە ءدىني ۇيىمدار ورنالاسقان تۇرعىن ۇيلەر مەن عيماراتتاردا لوتەرەيا بيلەتتەرىن تاراتۋعا جانە لوتەرەيا تەرمينالدارىن ورناتۋعا تىيىم سالىنادى.
- شەتەلدىك ويىن بيزنەسىن ۇيىمداستىرۋشىلاردىڭ ءتىزىمىن جۇرگىزۋ، سونداي-اق بانكتەر مەن تولەم جۇيەلەرىنە ولاردىڭ پايداسىنا قارجىلىق وپەراسيالار جۇرگىزۋگە تىيىم سالۋ كوزدەلەدى.
- بۋكمەكەرلىك كەڭسەنىڭ نەمەسە توتاليزاتوردىڭ قىزمەتىن جۇزەگە اسىراتىن ويىن بيزنەسىن ۇيىمداستىرۋشىلاردىڭ ءوز اپپاراتتىق-باعدارلامالىق كەشەندەرىنىڭ مەملەكەتتىك كىرىستەر ورگانىنىڭ اقپاراتتىق جۇيەلەرىمەن ينتەگراسيالانۋىن قامتاماسىز ەتۋ مىندەتى بەلگىلەنەدى.
سونىمەن قاتار زاڭ جوباسىندا بۋكمەكەرلىك كەڭسەلەردە ءباس تىگۋ، اقشا الۋ جانە تولەۋ كەزىندە
- قاتىسۋشىلاردىڭ بەينە-بيومەتريكالىق يدەنتيفيكاسيادان وتكىزۋ مىندەتى؛
- ويىن بيزنەسى ۇيىمداستىرۋشىلارىنىڭ ءۇشىنشى تۇلعالاردىڭ بانكتىك كارتوچكالارىنا تولەم قابىلداۋىنا شەكتەۋ قويۋ ماسەلەسى؛
- مەملەكەتتىك قىزمەتشىلەردىڭ، قۇقىق قورعاۋ جانە اسكەري قىزمەتكەرلەردىڭ ءباس تىگۋىنە تىيىم سالۋ كوزدەلگەن. شامامەن 220 مىڭعا جۋىق قىزمەتكەردىڭ قۇمار ويىن ويناۋى شەكتەلەدى؛
- ءوز-وزىن قۇمار ويىننان شەكتەۋدى 1 جىلدان 10 جىلعا دەيىن سوزۋ قاراستىرىلعان. ياعني ەگوۆ موبايل قوسىمشاسى ارقىلى شەكتەي الادى. بۇل شەكتەۋدى قايتىپ قالپىنا كەلتىرە المايسىز.
