ءماجىلىس دەپۋتاتى گۇلدارا نۇرىموۆا مەديسينا سالاسىندا ءبىلىم الىپ جاتقان ستۋدەنتتەرگە قاتىستى ماڭىزدى ماسەلەنى كوتەردى، دەپ حابارلايدى Dalanews.kz.
بۇدان بىلاي "قوعامدىق دەنساۋلىق ساقتاۋ" جانە "مەديسينالىق-پروفيلاكتيكالىق ءىس" فاكۋلتەتتەرىن اياقتاعان تۇلەكتەر مەديسينالىق جوعارى وقۋ ورنىن بىتىرگەنىنە قاراماستان دارىگەر سانالمايدى.
دەپۋتاتتىڭ ايتۋىنشا، بۇل جاعداي ادىلەتسىزدىككە جول اشادى. ياعني، قىزمەتكەرلەردىڭ بىلىكتىلىگى مەن جوعارى ءبىلىمى بار ەكەنىنە قاراماستان، بىردەي جۇمىس ىستەي تۇرا تۇلەكتەر ارىپتەستەرىنەن از جالاقى الادى.
"ولاردىڭ باسىم بولىگى ءبىر كەزدەرى مەديسينالىق جوعارى وقۋ ورىندارىنىڭ جانىنداعى ديپلومنان كەيىنگى ءبىلىم بەرۋ بازالارىندا زەرتحانالىق دياگنوستيكا بويىنشا باستاپقى كاسىپتىك قايتا دايارلاۋدان ءوتتى. ونداعان جىل بويى دارىگەر-زەرتحاناشىلار بولىپ جۇمىس ىستەدى، مول تاجىريبەسى بار. ءبىراق وسى بۇيرىقتان كەيىن زەرتحاناشى دارىگەردىڭ ستاۆكاسىنان تەحنيكالىق پەرسونالدىڭ جالاقىسىمەن بىردەي زەرتحانا مامانىنىڭ ستاۆكاسىنا اۋىستىرىلدى.
ولاردىڭ جۇمىسى ينفەكسيالىق جانە جۇقپالى بيولوگيالىق ماتەريالمەن، ۋلى حيميكاتتارمەن جانە جابدىقتىڭ زياندى ساۋلەلەنۋىمەن بايلانىستى. بۇل مامانداردىڭ تاجىريبەسى مەن اسىرەسە پاندەميا كەزىندەگى مەديسيناعا قوسقان ۇلەسىن ەسكەرە وتىرىپ، ولاردىڭ وسىنداي تۇسىنىكسىز جاعدايدا قالعانى ادىلەتسىز دەپ سانايمىز"، – دەدى دەپۋتات.
ونىڭ سوزىنشە، بەرىلگەن ۋادە مەن ورىندالعان ءىستىڭ اراسىندا الشاقتىق بار.
"مەديسينالىق-بيولوگيالىق ءىس"، "بيوتەحنولوگيا" فاكۋلتەتتەرىن بىتىرگەن پەداگوگيكالىق ۋنيۆەرسيتەتتەردىڭ تۇلەكتەرى بار، ولار بۇيرىققا سايكەس مەديسينا قىزمەتكەرىنە دە، بيولوگيا مۇعالىمىنە دە جاتپايتىن بولىپ قالدى"، – دەپ اتاپ ءوتتى گۇلدارا نۇرىموۆا.
وسى تۇستا دەپۋتات مىناداي وزگەرىستەر ەنگىزۋدى ۇسىندى:
"قوعامدىق دەنساۋلىق ساقتاۋ"، "مەديسينالىق-پروفيلاكتيكالىق ءىس" فاكۋلتەتتەرىنىڭ تۇلەكتەرى مەن كلينيكالىق زەرتحانالىق دياگنوستيكا سالاسىندا مەديسينالىققا جاتپايتىن ءبىلىمى بار زەرتحانا ماماندارى ءۇشىن بىلىكتىلىك تالاپتارى مەن ستاندارتتارىن ازىرلەۋ جانە بەكىتۋ؛
وسى لاۋازىمدا 2020 جىلدىڭ جەلتوقسانىنا دەيىن جۇمىس ىستەگەن زەرتحانا ماماندارىنىڭ "دارىگەر-زەرتحاناشى" لاۋازىمىن قالپىنا كەلتىرىلسىن.
