Májilis depýtaty Gúldara Nurymova meditsina salasynda bilim alyp jatqan stýdentterge qatysty mańyzdy máseleni kóterdi, dep habarlaidy Dalanews.kz.
Budan bylai "Qoǵamdyq densaýlyq saqtaý" jáne "meditsinalyq-profilaktikalyq is" fakýltetterin aiaqtaǵan túlekter meditsinalyq joǵary oqý ornyn bitirgenine qaramastan dáriger sanalmaidy.
Depýtattyń aitýynsha, bul jaǵdai ádiletsizdikke jol ashady. Iaǵni, qyzmetkerlerdiń biliktiligi men joǵary bilimi bar ekenine qaramastan, birdei jumys istei tura túlekter áriptesterinen az jalaqy alady.
"Olardyń basym bóligi bir kezderi meditsinalyq joǵary oqý oryndarynyń janyndaǵy diplomnan keiingi bilim berý bazalarynda zerthanalyq diagnostika boiynsha bastapqy kásiptik qaita daiarlaýdan ótti. Ondaǵan jyl boiy dáriger-zerthanashylar bolyp jumys istedi, mol tájiribesi bar. Biraq osy buiryqtan keiin zerthanashy dárigerdiń stavkasynan tehnikalyq personaldyń jalaqysymen birdei zerthana mamanynyń stavkasyna aýystyryldy.
Olardyń jumysy infektsiialyq jáne juqpaly biologiialyq materialmen, ýly himikattarmen jáne jabdyqtyń ziiandy sáýlelenýimen bailanysty. Bul mamandardyń tájiribesi men ásirese pandemiia kezindegi meditsinaǵa qosqan úlesin eskere otyryp, olardyń osyndai túsiniksiz jaǵdaida qalǵany ádiletsiz dep sanaimyz", – dedi depýtat.
Onyń sózinshe, berilgen ýáde men oryndalǵan istiń arasynda alshaqtyq bar.
"Meditsinalyq-biologiialyq is", "Biotehnologiia" fakýltetterin bitirgen pedagogikalyq ýniversitetterdiń túlekteri bar, olar buiryqqa sáikes meditsina qyzmetkerine de, biologiia muǵalimine de jatpaityn bolyp qaldy", – dep atap ótti Gúldara Nurymova.
Osy tusta depýtat mynadai ózgerister engizýdi usyndy:
"Qoǵamdyq densaýlyq saqtaý", "Meditsinalyq-profilaktikalyq is" fakýltetteriniń túlekteri men klinikalyq zerthanalyq diagnostika salasynda meditsinalyqqa jatpaityn bilimi bar zerthana mamandary úshin biliktilik talaptary men standarttaryn ázirleý jáne bekitý;
osy laýazymda 2020 jyldyń jeltoqsanyna deiin jumys istegen zerthana mamandarynyń "dáriger-zerthanashy" laýazymyn qalpyna keltirilsin.
