2025 جىلى قازاقستاندا اۋىلدىق ەلدى مەكەندەر سانى 83-كە قىسقارىپ، جالپى سانى 6،1 مىڭعا دەيىن ازايدى، دەپ حابارلايدى Dalanews.kz
بۇل تۋرالى ق ر اكىمشىلىك-اۋماقتىق بىرلىكتەرى جونىندەگى رەسمي ستاتيستيكا مالىمەتتەرىندە كورسەتىلگەن. اۋىلدار سانىنىڭ ازايۋ ءۇردىسى سوڭعى 25 جىل بويى جالعاسىپ كەلەدى. سوڭعى ءۇش جىلدا بۇل پروسەسس ايتارلىقتاي ۇدەي ءتۇستى. ماسەلەن، 2020–2022 جىلدارى 46 اۋىل قىسقارسا، 2023–2025 جىلدارى 199 اۋىل تاراتىلعان. جالپى العاندا، باقىلاۋ كەزەڭىندە اۋىلدار سانى 1،8 مىڭعا كەمىگەن.
2025 جىلعى قىسقارۋدىڭ نەگىزگى بولىگى ءۇش سولتۇستىك وڭىرگە تيەسىلى. ولار – سولتۇستىك قازاقستان وبلىسى، اقمولا وبلىسى جانە پاۆلودار وبلىسى. وسى ايماقتاردا 68 اۋىل تاراتىلىپ، ءبىر جاڭا اۋىل – نۇرلى (اقمولا وبلىسىنىڭ سەلينوگراد اۋدانىندا) قۇرىلعان. بۇل ءۇش ءوڭىر جالپى قىسقارۋدىڭ شامامەن 80 پايىزىن قامتاماسىز ەتكەن.
2021 جىلعى حالىق ساناعى دەرەكتەرىنە سايكەس، تاراتىلعان 68 اۋىلدا بار بولعانى 1،5 مىڭ ادام تۇرعان. بۇل – 2009 جىلمەن سالىستىرعاندا 4،4 ەسە از. ەڭ كوپ حالقى بار اۋىلدىڭ وزىندە نەبارى 74 تۇرعىن بولعان. 62 اۋىلدا حالىق سانى 50 ادامنان اسپاعان. كەيبىر ەلدى مەكەندەردە تۇرعىندار مۇلدە تىركەلمەگەن نەمەسە بىر-ەكى ادام عانا قالعان.
زاڭناماعا سايكەس، ءۇش جىل بويى حالقى 50 ادامعا جەتپەيتىن اۋىلدار تاراتىلۋعا جاتادى. ادەتتە مۇنداي ەلدى مەكەندەر جاقىن ماڭداعى ءىرى اۋىلداردىڭ قۇرامىنا ەنگىزىلەدى. الايدا شەشىم قابىلداۋ كەزىندە جەرگىلىكتى بيلىك تۇرعىنداردىڭ پىكىرىن دە ەسكەرۋى ءتيىس.
ساراپشىلاردىڭ ايتۋىنشا، اۋىلداردىڭ قىسقارۋىنا ەڭ الدىمەن كوشى-قون اسەر ەتىپ وتىر. جالپى اۋىل حالقىنىڭ ازايۋى ەلدىڭ كوپ وڭىرىنە ءتان قۇبىلىس. 2025 جىلدىڭ قورىتىندىسى بويىنشا اۋىل حالقىنىڭ ءوسىمى تەك الماتى، اتىراۋ جانە ماڭعىستاۋ وبلىستارىندا عانا تىركەلگەن.
