2025 jyly Qazaqstanda aýyldyq eldi mekender sany 83-ke qysqaryp, jalpy sany 6,1 myńǵa deiin azaidy, dep habarlaidy Dalanews.kz
Bul týraly QR ákimshilik-aýmaqtyq birlikteri jónindegi resmi statistika málimetterinde kórsetilgen. Aýyldar sanynyń azaiý úrdisi sońǵy 25 jyl boiy jalǵasyp keledi. Sońǵy úsh jylda bul protsess aitarlyqtai údei tústi. Máselen, 2020–2022 jyldary 46 aýyl qysqarsa, 2023–2025 jyldary 199 aýyl taratylǵan. Jalpy alǵanda, baqylaý kezeńinde aýyldar sany 1,8 myńǵa kemigen.
2025 jylǵy qysqarýdyń negizgi bóligi úsh soltústik óńirge tiesili. Olar – Soltústik Qazaqstan oblysy, Aqmola oblysy jáne Pavlodar oblysy. Osy aimaqtarda 68 aýyl taratylyp, bir jańa aýyl – Nurly (Aqmola oblysynyń Tselinograd aýdanynda) qurylǵan. Bul úsh óńir jalpy qysqarýdyń shamamen 80 paiyzyn qamtamasyz etken.
2021 jylǵy halyq sanaǵy derekterine sáikes, taratylǵan 68 aýylda bar bolǵany 1,5 myń adam turǵan. Bul – 2009 jylmen salystyrǵanda 4,4 ese az. Eń kóp halqy bar aýyldyń ózinde nebári 74 turǵyn bolǵan. 62 aýylda halyq sany 50 adamnan aspaǵan. Keibir eldi mekenderde turǵyndar múlde tirkelmegen nemese bir-eki adam ǵana qalǵan.
Zańnamaǵa sáikes, úsh jyl boiy halqy 50 adamǵa jetpeitin aýyldar taratylýǵa jatady. Ádette mundai eldi mekender jaqyn mańdaǵy iri aýyldardyń quramyna engiziledi. Alaida sheshim qabyldaý kezinde jergilikti bilik turǵyndardyń pikirin de eskerýi tiis.
Sarapshylardyń aitýynsha, aýyldardyń qysqarýyna eń aldymen kóshi-qon áser etip otyr. Jalpy aýyl halqynyń azaiýy eldiń kóp óńirine tán qubylys. 2025 jyldyń qorytyndysy boiynsha aýyl halqynyń ósimi tek Almaty, Atyraý jáne Mańǵystaý oblystarynda ǵana tirkelgen.
