2024 جىلدىڭ قازان ايىندا ءبىرىنشى نەسيەلىك بيۋرو وپەراتورى بولىپ تابىلاتىن DMAS سترەستىك اكتيۆتەردى ساتۋشى العاشقى سيفرلىق پلاتفورما ىسكە قوسىلدى. ونىڭ اياسىندا العاشقى ساۋدا-ساتتىق 19 قاراشادا جۇرگىزىلدى. ناتيجەسىندە حالىق بانكتىڭ بالانسىنداعى بەس جىلجىمايتىن مۇلىك 1،3 ملرد تەڭگەگە ساتىلدى، دەپ جازادى Dalanews.kz.
بۇگىنگى تاڭدا سيفرلىق پلاتفورمادا "فينتەحفينانس" مقۇ جانە فريدوم بانك قازاقستان، حالىق بانكى، سكب سياقتى قارجى ۇيىمدارىنا تيەسىلى 25 اكتيۆ ورنالاستىرىلعان. ادەتتە، بۇل اكتيۆتەردى ساتىپ الۋشىلار ميكروقارجى ۇيىمدارى، كوللەكتورلىق اگەنتتىكتەر، سترەستىك اكتيۆتەردى باسقارۋ ۇيىمدارى جانە جەكە تۇلعالار بولىپ كەلەدى، دەپ جازادى LS.
ايتا كەتسەك، 2022 جىلدىڭ جازىندا مەملەكەت باسشىسى قاسىم-جومارت توقايەۆ قازاقستانداعى سترەستىك اكتيۆتەردى دامىتۋ ماسەلەلەرى تۋرالى زاڭعا قول قويدى. كەيىنىرەك قندرا اتالعان نارىقتىڭ كولەمى شامامەن 2،4 ترلن تەڭگەنى قۇرايتىنىن جاريالادى.
سونىمەن قاتار، قندرا سترەستىك اكتيۆتەرگە قاتىستى ساۋدا-ساتتىق تالاپتارىن قايتا قاراستىرۋ نيەتى بارىن دا مالىمدەگەن. اتاپ ايتقاندا، رەتتەۋشى ورگان ساۋدا-ساتتىق تۋرالى حابارلاندىرۋدى جاريالاۋ مەرزىمىن وتكىزىلەتىن ۋاقىتىنا دەيىن 15-تەن 10 كۇنگە دەيىن قىسقارتۋدى ۇسىنادى.
سونداي-اق، اگەنتتىك ساۋدا-ساتتىققا قويىلعان وبەكتىنىڭ ەڭ تومەنگى باعاسىن كەزەڭ-كەزەڭىمەن تومەندەتۋدى قاراستىرعىسى كەلەدى. اتاپ ايتقاندا، ەكىنشى ساۋدا- ساتتىققا شىعارىلعان وبەكتى باعاسى نارىقتىق قۇنىنىڭ 70% - دان اسپاۋى ءتيىس، وندا دا وتپەي، كەلەسى ساۋدا-ساتتىققا شىعارىلسا 50%-دان ارتىلماۋى كەرەك.
