ءبىلىم جانە عىلىم ءمينيسترى اسحات ايماعامبەتوۆ، دەنساۋلىق ساقتاۋ ءمينيسترى الەكسەي سوي، ىشكى ىستەر ءمينيسترى ەرلان تۇرعىمبايەۆ، سونداي-اق يۋنيسەف وكىلدىگىنىڭ باسشىسى ارتۋر ۆان ديزەن بايانداما جاسادى.
2020 جىلى قازاقستاندا بالالاردىڭ قۇقىقتارىن قورعاۋ سالاسىندا 22 نورماتيۆتىك قۇقىقتىق اكت ازىرلەنىپ، قابىلداندى. بالا قۇقىقتارىن قورعاۋدى كۇشەيتۋ، تۇرمىستىق زورلىق-زومبىلىققا قارسى ءىس-قيمىل جانە جاسوسپىرىمدەر اراسىندا سۋيسيد ماسەلەلەرىن شەشۋ جونىندەگى 2020-2023 جىلدارعا ارنالعان جول كارتاسى بەكىتىلدى. تەرروريستىك ارەكەتتەن زارداپ شەككەن بالالاردى الەۋمەتتىك وڭالتۋ قاعيدالارى مەن مەرزىمدەرى قابىلداندى.
2022 جىلى بالالاردىڭ قاۋىپسىزدىگىن، دەنساۋلىعىن، ءبىلىم الۋىن، ماتەريالدىق ءال-اۋقاتىن، الەۋمەتتەنۋىن قامتيتىن بالالار يگىلىگىنىڭ قازاقستاندىق يندەكسىن ەنگىزۋ جوسپارلانۋدا. وسى يندەكستىڭ كومەگىمەن بالالاردىڭ جاعدايىن جاقسارتۋ بويىنشا مەملەكەتتىك ورگاندار جۇمىسىنىڭ ناتيجەلىلىگى قاداعالاناتىن بولادى.
ۇكىمەت باسشىسى كوشەدە، ءبىلىم بەرۋ ۇيىمدارىندا، دەمالىس كەزىندە بالالاردىڭ قاۋىپسىزدىگىن قامتاماسىز ەتۋدىڭ ماڭىزدىلىعىن اتاپ ءوتتى.
وسىعان بايلانىستى ا. مامين ەكى اپتا ىشىندە ءبىلىم بەرۋ جانە بوس ۋاقىتتى وتكىزۋ سالاسىنىڭ وبەكتىلەرىن ءتيىستى قاۋىپسىزدىك ينفراقۇرىلىمىمەن قامتاماسىز ەتۋ جونىندەگى جول كارتاسىن دايىنداۋدى تاپسىردى.
بەينەباقىلاۋ جۇيەلەرى مەن ولاردىڭ پوليسيانىڭ جەدەل باسقارۋ ورتالىقتارىمەن ينتەگراسيالانۋىنا، “دابىل تۇيمەسىنىڭ” بولۋىنا جانە شۇعىل ارەكەت ەتۋگە ەرەكشە نازار اۋدارۋ كەرەك. بارلىق ءىس-شارالار وقۋ جىلى باستالعانعا دەيىن اياقتالۋى ءتيىس، – دەدى ا. مامين.
دەنساۋلىق ساقتاۋ مينيسترلىگىنە، اكىمدىكتەرگە اۋرۋلاردىڭ الدىن الۋ جانە ەرتە دياگنوستيكالاۋ، وڭالتۋ، اۋرۋدى بالا جاستان باقىلاۋ بويىنشا شارالار قابىلداۋ، مەكتەپ مەديسيناسىن، ەرتە دامۋ جانە سكرينينگ كابينەتتەرىنىڭ، بالالار ۇيلەرىنىڭ، بالالار ستاسيونارلارى مەن ەمحانالارىنىڭ ماتەريالدىق-تەحنيكالىق بازاسىن جەتىلدىرۋ تاپسىرىلدى.
ۇكىمەت باسشىسى اكىمدىكتەرگە سپورتپەن اينالىساتىن بالالاردىڭ سانىن ارتتىرۋ بويىنشا شارالار قابىلداۋدى تاپسىردى.
