الماتى قالاسى پد كريمينالدى پوليسيا باسقارماسى ۇقكد قىزمەتكەرلەرىمەن بىرلەسىپ، حالىقارالىق اۋەجاي اۋماعىندا جەدەل ىزدەستىرۋ شارالارىن جۇرگىزدى. ناتيجەسىندە اۋەجايدا ىستەيتىن 29 جاستاعى ايەل مەن 28 جاستاعى ەر ادام ۇستالدى، دەپ حابارلايدى Polisia.kz.
كۇدىكتىلەر شەتەلگە ۇشاتىن ازاماتتارعا كوروناۆيرۋس جۇقتىرماعانى تۋرالى جالعان پتر-تەست ساتقان. بارلىعى 15-20 انىقتاما ساتىلعان.
ۇستالعاندار پتر-تەستى ۇيالى تەلەفونداعى قوسىمشا ارقىلى وزدەرى جاساعان.
ولار كليەنتتىڭ انكەتالىق دەرەكتەرى مەن انىقتاما داتاسىن وزگەرتكەن. ال جولاۋشىلاردى ۇشاق بورتىنا وتكىزۋگە اۋە كومپانياسىنىڭ وكىلدەرى كومەكتەسكەن. تۇسكەن اقشانى ءوزارا ءبولىپ العان.
"ءقازىر جەدەل تەرگەۋ شارالارى جۇرگىزىلىپ جاتىر. ۇستالعانداردىڭ وسىعان ۇقساس باسقا قىلمىستارعا قاتىسى بار-جوعى انىقتالۋدا"، - دەپ مالىمدەدى ۆەدومستۆو.
ءتيىستى ساراپتامالار تاعايىندالدى.
"ساتۋشىلار" ۋاقىتشا ۇستاۋ يزولياتورىنا قامالدى.
