قازاقستاندا اقش پەن ۋكراينا ازاماتتارىنا ىزدەۋ جاريالاندى، دەپ حابارلايدى Dalanews.kz.
مىنا ادامدارعا ىزدەۋ جاريالانعان:
- دميترى درۋجينسكى، 1970 جىلعى 27 ماۋسىمدا تۋعان، امەريكا قۇراما شتاتتارىنىڭ ازاماتى؛
- مارينا ليەۆكوۆيچ (گينزبۋرگ)، 1985 جىلعى 8 قاراشادا تۋعان، ۋكراينا ازاماتى.
سوت سانكسياسىمەن ولارعا سىرتتاي قاماۋدا ۇستاۋ تۇرىندەگى بۇلتارتپاۋ شاراسى قولدانىلعان.
ولار قازاقستان رەسپۋبليكاسى اۋماعىندا زاڭسىز ويىن بيزنەسىن ۇيىمداستىردى دەگەن كۇدىككە ىلىنگەن.
"تەرگەۋ بارىسىندا PIN-UP جانە PINCO برەندتەرىمەن جۇمىس ىستەگەن ونلاين كازينونى شەتەلدەن ارەكەت ەتكەن ادامدار باسقارعانى انىقتالدى. د.درۋجينسكى مەن م.ليەۆكوۆيچ كوورديناتورلىق فۋنكسيالاردى اتقارىپ، سىبايلاستاردى ىرىكتەۋمەن، تولەم ۇيىمدارى مەن ەكىنشى دەڭگەيلى بانكتەر وكىلدەرىمەن ءوزارا جۇمىس ىستەۋمەن اينالىسقان. سونداي-اق، اقشا قابىلداۋ مەن شىعارۋ پروسەسىن قامتاماسىز ەتكەن تولەم ينفراقۇرىلىمىن قۇرعان جانە ونىڭ جۇمىس ىستەۋىنە قاتىسقان"، - دەدى قما وكىلى.
زاڭسىز قىزمەتتى بۇركەمەلەۋ ماقساتىندا PIN-UP.KZ برەندىمەن بۋكمەكەرلىك قىزمەتتى جۇزەگە اسىرۋعا مەملەكەتتىك ليسەنزيا العان "بونامي" ج ش س زاڭدى تۇلعاسى قۇرىلعان.
"ونلاين كازينو كليەنتتەرىنەن تۇسكەن قاراجات ترانزيت شوتتاردا جيناقتالىپ، كەيىن كريپتوۆاليۋتاعا ايىرباستالعان"، - دەپ جازىلعان حابارلامادا.
قانداي دا ءبىر اقپارات بىلەتىندەردەن مىنا نومىرگە حابارلاسۋ سۇرالدى: +7 7172 70 84 78 - كەزەكشى ءبولىم.
