الماتى وبلىسىنىڭ قاسكەلەڭ قالاسىندا الەمگە ايگىلى New York Film Academy (NYFA) العاشقى قازاقستاندىق جانە اقش-تان تىس ءۇشىنشى كامپۋسى اشىلدى،- دەپ حابارلايدى Dalanews.kz
بۇل ماڭىزدى وقيعا ەلدەگى كرەاتيۆتى يندۋستريانىڭ دامۋىنا سەرپىن بەرىپ، جاس تالانتتار ءۇشىن جاڭا مۇمكىندىكتەردىڭ ەسىگىن اشتى.
جوبا 2024 جىلى الماتى ەنەرگەتيكا جانە بايلانىس ۋنيۆەرسيتەتى تاراپىنان ۇسىنىلىپ، بيىلعى 29 قىركۇيەكتە Energo University كرەاتيۆتى يندۋستريالار پاركى اۋماعىنداعى كامپۋستا وقىتۋ باستالادى. مۇندا ارنايى اقش-تان كەلگەن NYFA كاسىبي لەكتورلارى ءدارىس بەرەدى.
ءبىلىم بەرۋ بەس باعىت بويىنشا جۇرگىزىلەدى:
- كينو سالاسى (Filmmaking)؛
- پروديۋسەرلىك ەتۋ (Producing)؛
- سەناريي جازۋ (Screenwriting)؛
- انيماسيا جانە ۆيزۋالدى ەففەكتىلەر (3D animation & VFX)؛
- ويىندار ديزاينى (Game design).
اكادەميانىڭ العاشقى قابىلداۋىنا قازاقستان مەن كورشىلەس ەلدەردەن، سونىڭ ىشىندە جۇڭگو، ءۇندىستان جانە رەسەيدەن 200-گە دەيىن ستۋدەنت قابىلدانادى. تۇلەكتەر العان ديپلوم امەريكاندىق ۋنيۆەرسيتەت ديپلومىنا تەڭەستىرىلىپ، ولارعا NYFA-نىڭ نيۋ-يورك نەمەسە لوس-اندجەلەس قالالارىنداعى كامپۋستارىندا وقۋىن جالعاستىرۋ مۇمكىندىگىن بەرەدى.
قاسكەلەڭدە New York Film Academy فيليالىنىڭ اشىلۋى – بۇل تەك ءبىلىم بەرۋ سالاسىن كەڭەيتۋ عانا ەمەس، سونىمەن قاتار قازاقستاننىڭ كرەاتيۆتى ەكونوميكاسىن دامىتۋعا قوسىلعان ەلەۋلى ۇلەس. جاڭا ۋنيۆەرسيتەت كينو، انيماسيا جانە ويىن يندۋسترياسى سالالارىندا كاسىبي ماماندار دايارلايتىن مىقتى پلاتفورماعا اينالىپ، جاستارعا حالىقارالىق دەڭگەيدە تابىسقا جەتۋگە جول اشادى.
