قازاقستانداعى ارنايى حالىققا قىزمەت كورسەتۋ ورتالىقتارىندا (ارنايى حقكو) اۆتوكولىكتەرگە ارنالعان مەملەكەتتىك تىركەۋ نومىرلەرىن ەركىن تاڭداۋ مۇمكىندىگى 5 قاڭتاردان باستاپ قولجەتىمدى بولادى. بۇل تۋرالى ىشكى ىستەر مينيسترلىگىنىڭ باسپا ءسوز قىزمەتى مالىمدەدى، دەپ حابارلايدى Dalanews.kz.
"متبن-نى تاڭداۋ قىزمەتىن ازاماتتار 2026 جىلعى 5 قاڭتاردان باستاپ ارنايى حقكو ارقىلى پايدالانا الادى. كەز كەلگەن قالاعان ارىپتىك جانە ساندىق كومبيناسياسى بار ءنومىردىڭ قۇنى 10 اەك جانە 15 اەك كولەمىندە بولادى (سۇرانىسى جوعارى نومىرلەر بۇل ساناتقا كىرمەيدى، ولاردى الۋ ءۇشىن بولەك الىمدار قاراستىرىلعان)"، — دەدى جۇما كۇنى ءىىم اكىمشىلىك پوليسيا كوميتەتىنىڭ ەرەكشە تاپسىرمالار جونىندەگى اعا ينسپەكتورى اراي تولەگەن قىزى.
ءىىم-نىڭ تۇسىندىرۋىنشە، حالىق ءۇشىن قولايلى جاعداي جاساۋ ماقساتىندا قالاعان سيفرلىق جانە ارىپتىك بەلگىسى بار مەملەكەتتىك نومىرلەردى ەركىن تاڭداۋ مۇمكىندىگىن كوزدەيتىن نورمالار ازىرلەنىپ، ولار 2026 جىلعى 1 قاڭتاردان باستاپ كۇشىنە ەندى.
