2026–2028 جىلدارعا ارنالعان ناشاقورلىق پەن ەسىرتكى بيزنەسىنە قارسى كۇرەس جونىندەگى كەشەندى جوسپار – قوعامداعى ەسىرتكىلەنۋ دەڭگەيىن تومەندەتۋگە، جاستاردى قورعاۋعا، ەسىرتكىنىڭ قولجەتىمدىلىگىن قىسقارتۋعا جانە ۇيىمداسقان ەسىرتكى ارنالارىنىڭ جولىن كەسۋگە باعىتتالعان جۇيەلى ۆەدومستۆوارالىق قۇجات بولىپ تابىلادى. قۇجات الدىن الۋ مەن ەرتە انىقتاۋدان باستاپ جەدەل ارەكەت ەتۋگە، سيفرلاندىرۋعا جانە حالىقارالىق ىنتىماقتاستىققا دەيىنگى قارسى ءىس-قيمىلدىڭ تولىق سيكلىن قامتيدى.
مەملەكەت باسشىسىنىڭ بيىلعى جىلدىڭ ناۋرىز ايىندا وتكەن ۇلتتىق قۇرىلتايدىڭ IV وتىرىسىندا بەرگەن تاپسىرمالارىن ورىنداۋ ماقساتىندا ىشكى ىستەر مينيسترلىگى مەملەكەتتىك جانە جەرگىلىكتى اتقارۋشى ورگاندارمەن بىرلەسىپ قازاقستان رەسپۋبليكاسىندا 2026–2028 جىلدارعا ارنالعان ناشاقورلىق پەن ەسىرتكى بيزنەسىنە قارسى كۇرەس جونىندەگى كەشەندى جوسپاردى ازىرلەپ، بەكىتتى (قازاقستان رەسپۋبليكاسى ۇكىمەتىنىڭ 2025 جىلعى 19 جەلتوقسانداعى №1117 قاۋلىسى).
قۇجات عالامدىق جانە وڭىرلىك دەڭگەيدەگى ناركوجاعدايدىڭ دامۋ ۇردىستەرىن تالداۋ، پارلامەنت دەپۋتاتتارىنىڭ، مەملەكەتتىك ورگانداردىڭ ۇسىنىستارى، سونداي-اق جۇيەلى ۆەدومستۆوارالىق ءوزارا ءىس-قيمىل ناتيجەلەرى نەگىزىندە قالىپتاستىرىلدى.
كەشەندى جوسپار مەملەكەتتىك انتيناركوتيكالىق ساياساتتىڭ نەگىزگى باعىتتارىن قامتيدى. اتاپ ايتقاندا، ناركوجاعدايدى مونيتورينگىلەۋ، الدىن الۋ شارالارى، ەسىرتكى قىلمىستارىنىڭ جولىن كەسۋ، زاڭنامانى جەتىلدىرۋ، سيفرلىق شەشىمدەردى ەنگىزۋ جانە حالىقارالىق ىنتىماقتاستىقتى دامىتۋ كوزدەلگەن.
قۇجاتتا زاماناۋي تەحنولوگيالاردى قولدانۋعا ەرەكشە باسىمدىق بەرىلگەن. اتاپ ايتقاندا، تالدامالىق جانە جەدەل قىزمەتتە جاساندى ينتەللەكتتى ەنگىزۋ، گازتالداعىشتارمەن جانە سپەكترالدى كامەرالارمەن جابدىقتالعان ۇشقىشسىز ۇشۋ اپپاراتتارىن ساتىپ الۋ، ىشكى ىستەر جانە ۇلتتىق قاۋىپسىزدىك ورگاندارىن جەكە حيميالىق قورعانىس جانە زالالسىزداندىرۋ قۇرالدارىمەن جاراقتاندىرۋ، زاتتاي دالەلدەمەلەردى ساقتاۋ قويمالارىن سيفرلاندىرۋ، سونداي-اق سيفرلىق ىزدەر بازاسىن قالىپتاستىرۋ كوزدەلگەن.
ءىس-شارالاردىڭ جەكە بلوگى زاڭنامالىق جانە نورماتيۆتىك قۇقىقتىق بازانى جەتىلدىرۋگە باعىتتالعان. اتاپ ايتقاندا، ناركوسكرينينگ جۇرگىزۋدىڭ نەگىزدەرى مەن تارتىبىنە، پاراللەل قارجىلىق تەرگەپ-تەكسەرۋلەرگە، كريپتوۆاليۋتا اينالىمىن رەتتەۋگە، سپايكينگكە قارسى ءىس-قيمىلعا قاتىستى تۇزەتۋلەر ەنگىزۋ، سونداي-اق ەسىرتكى قىلمىستارىن انىقتاۋعا جاردەمدەسكەن ازاماتتاردى ىنتالاندىرۋ تەتىكتەرىن ازىرلەۋ جوسپارلانعان.
باعدارلامالىق قۇجات 7 بولىمنەن، 106 تارماقتان جانە 30 تارماقشادان تۇرادى. كەشەندى جوسپاردى ازىرلەۋ بارىسىندا ول پرەمەر-مينيستر جانىنداعى رەسپۋبليكالىق شتابتىڭ، پرەزيدەنت جانىنداعى جاستار ساياساتى جونىندەگى كەڭەستىڭ، ىشكى ىستەر مينيسترلىگى جانىنداعى ناشاقورلىق قۇقىقبۇزۋشىلىقتاردىڭ الدىن الۋ جونىندەگى كەڭەستىڭ وتىرىستارىندا، سونداي-اق حالىقارالىق بەيىندى ۇيىمداردىڭ ساراپتامالىق الەۋەتىن پايدالانا وتىرىپ قارالدى.
كەشەندى جوسپاردى ىسكە اسىرۋ ناتيجەسىندە قوعامداعى ەسىرتكىلەنۋ دەڭگەيىن جانە جاسوسپىرىمدەر اراسىنداعى ەسىرتكى قىلمىستارىن تومەندەتۋ، ەسىرتكىنىڭ جانە ينتەرنەتتەگى زاڭسىز كونتەنتتىڭ قولجەتىمدىلىگىن قىسقارتۋ، ەسىرتكى زاتتارىن تاركىلەۋ كولەمىن ارتتىرۋ، جويىلعان ەسىرتكى ارنالارى مەن ۇيىمداسقان قىلمىستىق توپتار سانىنىڭ ءوسۋى، سونداي-اق ءوڭىر اكىمدىكتەرىنىڭ انتيناركوتيكالىق قىزمەتىنىڭ تيىمدىلىگىن باعالاۋ رەيتينگىسىن ەنگىزۋ كۇتىلۋدە.
ءىس-شارالاردى قارجىلاندىرۋ ءۇش جىلدىق كەزەڭگە رەسپۋبليكالىق جانە جەرگىلىكتى بيۋدجەتتەر قاراجاتى ەسەبىنەن كوزدەلگەن.
ەسكە سالايىق، 2023–2025 جىلدارعا ارنالعان قولدانىستاعى كەشەندى جوسپاردى ىسكە اسىرۋدىڭ ءوزى ناقتى ناتيجەلەر بەردى. اتاپ ايتقاندا، ەسىرتكى زاتتارى مەن پرەكۋرسورلاردىڭ تىزبەسى وزەكتەندىرىلىپ، وعان 31 جاڭا ءتۇر ەنگىزىلدى. سينتەتيكالىق ەسىرتكىنى تاركىلەۋ كولەمى ءۇش ەسە ارتتى – 382 كيلوگرامنان 1،2 تونناعا دەيىن. سوت-ساراپتاما ورگاندارى 41 زاماناۋي جابدىقپەن قامتاماسىز ەتىلىپ، ساراپتاما جۇرگىزۋ مەرزىمى ءبىر ايدان ءبىر تاۋلىككە دەيىن قىسقارتىلدى.
سونىمەن قاتار «كيبەرقاداعالاۋ» اقپاراتتىق جۇيەسىنىڭ كومەگىمەن بۇعاتتالعان ەسىرتكى سايتتارى مەن زاڭسىز كونتەنت سانى شامامەن ءتورت ەسە ءوسىپ، 2،6 مىڭنان 9،2 مىڭعا جەتتى.
