Qazaqstanda 2026–2028 jyldarǵa arnalǵan nashaqorlyqqa qarsy keshendi jospar bekitildi, dep habarlaidy Dalanews.kz
2026–2028 jyldarǵa arnalǵan nashaqorlyq pen esirtki biznesine qarsy kúres jónindegi Keshendi jospar – qoǵamdaǵy esirtkilený deńgeiin tómendetýge, jastardy qorǵaýǵa, esirtkiniń qoljetimdiligin qysqartýǵa jáne uiymdasqan esirtki arnalarynyń jolyn kesýge baǵyttalǵan júieli vedomstvoaralyq qujat bolyp tabylady. Qujat aldyn alý men erte anyqtaýdan bastap jedel áreket etýge, tsifrlandyrýǵa jáne halyqaralyq yntymaqtastyqqa deiingi qarsy is-qimyldyń tolyq tsiklin qamtidy.
Memleket basshysynyń biylǵy jyldyń naýryz aiynda ótken Ulttyq quryltaidyń IV otyrysynda bergen tapsyrmalaryn oryndaý maqsatynda Ishki ister ministrligi memlekettik jáne jergilikti atqarýshy organdarmen birlesip Qazaqstan Respýblikasynda 2026–2028 jyldarǵa arnalǵan nashaqorlyq pen esirtki biznesine qarsy kúres jónindegi Keshendi jospardy ázirlep, bekitti (Qazaqstan Respýblikasy Úkimetiniń 2025 jylǵy 19 jeltoqsandaǵy №1117 qaýlysy).
Qujat ǵalamdyq jáne óńirlik deńgeidegi narkojaǵdaidyń damý úrdisterin taldaý, Parlament depýtattarynyń, memlekettik organdardyń usynystary, sondai-aq júieli vedomstvoaralyq ózara is-qimyl nátijeleri negizinde qalyptastyryldy.
Keshendi jospar memlekettik antinarkotikalyq saiasattyń negizgi baǵyttaryn qamtidy. Atap aitqanda, narkojaǵdaidy monitoringileý, aldyn alý sharalary, esirtki qylmystarynyń jolyn kesý, zańnamany jetildirý, tsifrlyq sheshimderdi engizý jáne halyqaralyq yntymaqtastyqty damytý kózdelgen.
Qujatta zamanaýi tehnologiialardy qoldanýǵa erekshe basymdyq berilgen. Atap aitqanda, taldamalyq jáne jedel qyzmette jasandy intellektti engizý, gaztaldaǵyshtarmen jáne spektraldy kameralarmen jabdyqtalǵan ushqyshsyz ushý apparattaryn satyp alý, ishki ister jáne ulttyq qaýipsizdik organdaryn jeke himiialyq qorǵanys jáne zalalsyzdandyrý quraldarymen jaraqtandyrý, zattai dáleldemelerdi saqtaý qoimalaryn tsifrlandyrý, sondai-aq tsifrlyq izder bazasyn qalyptastyrý kózdelgen.
Is-sharalardyń jeke blogy zańnamalyq jáne normativtik quqyqtyq bazany jetildirýge baǵyttalǵan. Atap aitqanda, narkoskrining júrgizýdiń negizderi men tártibine, parallel qarjylyq tergep-tekserýlerge, kriptovaliýta ainalymyn retteýge, spaikingke qarsy is-qimylǵa qatysty túzetýler engizý, sondai-aq esirtki qylmystaryn anyqtaýǵa járdemdesken azamattardy yntalandyrý tetikterin ázirleý josparlanǵan.
Baǵdarlamalyq qujat 7 bólimnen, 106 tarmaqtan jáne 30 tarmaqshadan turady. Keshendi jospardy ázirleý barysynda ol Premer-Ministr janyndaǵy Respýblikalyq shtabtyń, Prezident janyndaǵy Jastar saiasaty jónindegi keńestiń, Ishki ister ministrligi janyndaǵy Nashaqorlyq quqyqbuzýshylyqtardyń aldyn alý jónindegi keńestiń otyrystarynda, sondai-aq halyqaralyq beiindi uiymdardyń saraptamalyq áleýetin paidalana otyryp qaraldy.
Keshendi jospardy iske asyrý nátijesinde qoǵamdaǵy esirtkilený deńgeiin jáne jasóspirimder arasyndaǵy esirtki qylmystaryn tómendetý, esirtkiniń jáne internettegi zańsyz kontenttiń qoljetimdiligin qysqartý, esirtki zattaryn tárkileý kólemin arttyrý, joiylǵan esirtki arnalary men uiymdasqan qylmystyq toptar sanynyń ósýi, sondai-aq óńir ákimdikteriniń antinarkotikalyq qyzmetiniń tiimdiligin baǵalaý reitingisin engizý kútilýde.
Is-sharalardy qarjylandyrý úsh jyldyq kezeńge respýblikalyq jáne jergilikti biýdjetter qarajaty esebinen kózdelgen.
Eske salaiyq, 2023–2025 jyldarǵa arnalǵan qoldanystaǵy Keshendi jospardy iske asyrýdyń ózi naqty nátijeler berdi. Atap aitqanda, esirtki zattary men prekýrsorlardyń tizbesi ózektendirilip, oǵan 31 jańa túr engizildi. Sintetikalyq esirtkini tárkileý kólemi úsh ese artty – 382 kilogramnan 1,2 tonnaǵa deiin. Sot-saraptama organdary 41 zamanaýi jabdyqpen qamtamasyz etilip, saraptama júrgizý merzimi bir aidan bir táýlikke deiin qysqartyldy.
Sonymen qatar «Kiberqadaǵalaý» aqparattyq júiesiniń kómegimen buǵattalǵan esirtki saittary men zańsyz kontent sany shamamen tórt ese ósip, 2,6 myńnan 9,2 myńǵa jetti.
