بۇگىندە قازاقستاندا شامامەن 170 مىڭ ازاماتقا بانكروتتىق ءراسىمى قولدانىلعان. بۇل تۋرالى ق ر قارجى نارىعىن رەتتەۋ جانە دامىتۋ اگەنتتىگىنىڭ ءتورايىمى ءمادينا ءابىلقاسىموۆا مالىمدەدى، دەپ حابارلايدى Dalanews.kz.
ونىڭ ايتۋىنشا، قارجىلاي قيىندىققا تاپ بولىپ، تولەم قابىلەتىن قالپىنا كەلتىرۋگە مۇقتاج ازاماتتاردىڭ سانى بۇدان الدەقايدا كوپ. قازىرگى تاڭدا 500 مىڭنان استام ادامنىڭ نەسيە تولەۋ مەرزىمى ەكى جىلدان بەس جىلعا دەيىن كەشىكتىرىلگەن.
"قارىزىن وتەي الماي جۇرگەن ازاماتتاردىڭ بانكروتتىق راسىمىنە جۇگىنۋگە زاڭدى قۇقىعى بار. الايدا زاڭداعى كەيبىر شەكتەۋلەر بۇل پروسەستى قيىنداتىپ وتىر"، - دەدى ءمادينا ءابىلقاسىموۆا.
ماسەلەن، بانكروت دەپ تانىلعان ازاماتقا بەس جىل بويى نەسيە راسىمدەۋگە تىيىم سالىنادى. بۇدان بولەك، راسىمنەن ءوتۋ ءۇشىن ونىڭ مەنشىگىندە مۇلكى بولماۋى جانە تابىسى ەڭ تومەنگى كۇنكورىس دەڭگەيىنىڭ ەكى ەسەلەنگەن مولشەرىنەن اسپاۋى قاجەت.
ءمادينا ءابىلقاسىموۆا بۇل ماسەلەنى جەڭىلدەتۋ ءۇشىن بىلتىر زاڭناماعا ءبىرقاتار وزگەرىس ەنگىزىلگەنىن ايتتى. اتاپ ايتقاندا، بەرەشەگى ۇزاق ۋاقىت وتەلمەگەن ازاماتتارعا قاتىستى مۇلىك پەن تابىسقا قويىلاتىن تالاپتاردى جۇمسارتۋ تەتىكتەرى قاراستىرىلعان.
