Búginde Qazaqstanda shamamen 170 myń azamatqa bankrottyq rásimi qoldanylǵan. Bul týraly QR Qarjy naryǵyn retteý jáne damytý agenttiginiń tóraiymy Mádina Ábilqasymova málimdedi, dep habarlaidy Dalanews.kz.
Onyń aitýynsha, qarjylai qiyndyqqa tap bolyp, tólem qabiletin qalpyna keltirýge muqtaj azamattardyń sany budan áldeqaida kóp. Qazirgi tańda 500 myńnan astam adamnyń nesie tóleý merzimi eki jyldan bes jylǵa deiin keshiktirilgen.
"Qaryzyn ótei almai júrgen azamattardyń bankrottyq rásimine júginýge zańdy quqyǵy bar. Alaida zańdaǵy keibir shekteýler bul protsesti qiyndatyp otyr", - dedi Mádina Ábilqasymova.
Máselen, bankrot dep tanylǵan azamatqa bes jyl boiy nesie rásimdeýge tyiym salynady. Budan bólek, rásimnen ótý úshin onyń menshiginde múlki bolmaýy jáne tabysy eń tómengi kúnkóris deńgeiiniń eki eselengen mólsherinen aspaýy qajet.
Mádina Ábilqasymova bul máseleni jeńildetý úshin byltyr zańnamaǵa birqatar ózgeris engizilgenin aitty. Atap aitqanda, bereshegi uzaq ýaqyt ótelmegen azamattarǵa qatysty múlik pen tabysqa qoiylatyn talaptardy jumsartý tetikteri qarastyrylǵan.
