2024 جىلدىڭ توعىز ايىنىڭ قورىتىندىسى بويىنشا قازاقستان ۇكىمەتى بيۋدجەت تاپشىلىعى اياسىندا الىنعان قوماقتى قارىزداردىڭ قۇرىلىمى مەن جۇكتەمەسىنىڭ سيپاتتاماسى تۋرالى ەسەپ جاريالاندى. ول جايلى Dalanews.kz سايتىنان وقىپ-بىلە وتىرىڭىزدار.
مەملەكەتتىك باعالى قاعازدار شىعارۋ ارقىلى ىشكى قارىزداردان تۇسكەن ءتۇسىمنىڭ جالپى كولەمى 4 996،6 ملرد تەڭگەنى قۇرادى. ال سىرتتان الىنعان قارىزدار كولەمى الدەقايدا از – بار بولعانى 90،7 ملرد تەڭگە، دەپ جازادى Economy.kz.
2024 جىلعى 1 قازانعا دەيىن جالپى مەملەكەتتىك قارىز 30 ترلن 504،8 ملرد تەڭگەگە جەتىپ، 134 ترلن 952،9 ملرد تەڭگە كولەمىندەگى ءجىو-نىڭ 22،6%-ىن قۇرادى. ۇكىمەتتىك قارىز جالپى مەملەكەتتىك قارىزدىڭ 94،4%-ىن قۇراپ، 28 784،7 ملرد تەڭگە بولادى. ونىڭ نەگىزگى بولىگى ىشكى قارىزدارعا تيەسىلى – 21 567،6 ملرد تەڭگە (75%)، ال سىرتقى مىندەتتەمەلەر 7 217،0 ملرد تەڭگەنى (25%) قۇرايدى.
قارىز جۇكتەمەسى كەلەسىدەي تارقاتىلادى:
- قىسقا مەرزىمدى مىندەتتەمەلەر 848،0 ملرد تەڭگەنى،
- ورتا مەرزىمدىسى 3 ترلن 209،7 ملرد تەڭگەنى،
- ال ۇزاق مەرزىمدى قارىزدار 24 ترلن 726،9 ملرد تەڭگەنى قۇرايدى.
پايىزدىق تولەمدەردىڭ باسىم بولىگى بارلىق مىندەتتەمەلەردىڭ 85% دەڭگەيىندە بەكىتىلگەن. قۇبىلمالى ءدالىزى بەكىتىلگەن ستاۆكالار 12%-دى، ال ينفلياسيا يندەكسىنە يندەكستەلگەن قارىزدار 3%-دى قۇرايدى.
ۇكىمەتتىك قارىزدى وتەۋگە 2024 جىلدىڭ باسىنان باستاپ قىركۇيەك ايىنا دەيىن 1 959،3 ملرد تەڭگە جۇمسالدى، بۇدان بيۋدجەتكە ايتارلىقتاي قارجىلىق جۇكتەمە ءتۇسىرىپ وتىرعانىن بايقاۋعا بولادى. ۇلتتىق بانكتىڭ ديسكونتتالعان قۇنداعى ىشكى مىندەتتەمەلەرى 500،0 ملرد تەڭگەنى نەمەسە جالپى مەملەكەتتىك قارىزدىڭ 1،6%-ىن قۇرادى. جەرگىلىكتى اتقارۋشى ورگانداردىڭ قارىزدىق مىندەتتەمەلەرى 1 220،1 ملرد تەڭگەگە جەتىپ، جالپى قارىز كولەمىنىڭ 4،0%-ىن قۇرادى.
"قازاقستاننىڭ قارىز قۇرىلىمى ىشكى قارجىلاندىرۋعا تاۋەلدىلىكتىڭ جوعارى ەكەنىن كورسەتەدى، بۇل بەلگىلى ءبىر تۇراقتىلىقتى قامتاماسىز ەتەدى، ءبىراق تاۋەكەلدەردى ازايتۋ ءۇشىن تۇراقتى باقىلاۋ مەن قاداعالاۋدى قاجەت ەتەدى" دەپ باسا كورسەتەدى لينا ەگەل قىزى ءوز ماقالاسىندا.
ايتا كەتسەك، كۇنى كەشە ق ر قارجى مينيسترلىگىنىڭ 2024 جىلدىڭ 10 ايىندا ۇلتتىق قورعا تۇسكەن جانە الىنعان قاراجاتتار بويىنشا ەسەبى جاريالاندى. 2024 جىلى 10 اي ىشىندە ۇلتتىق قوردان 4،6 ترلن تەڭگە جۇمسالدى: 2 ترلن تەڭگە كەپىلدەندىرىلگەن ترانسفەرت رەتىندە الىنسا،2،6 ترلن تەڭگە نىسانالى ترانسفەرت رەتىندە اۋدارىلدى. سونداي-اق قوردى باسقارۋعا جانە اۋديتكە 11،9 ملرد تەڭگە باعىتتالدى. ياعني، ونىڭ باسىم بولىگى بيۋدجەت تاپشىلىعىن جابۋعا باعىتتالعان.
