مەملەكەت باسشىسى ەڭ الدىمەن ءوزىن قاسيەتتى انادولى جەرىنە مەملەكەتتىك ساپارمەن كەلۋگە شاقىرعانى ءۇشىن تۇركيا پرەزيدەنتى رەجەپ تاييپ ەردوعانعا زور ريزاشىلىعىن ءبىلدىردى.
– تۇرىك حالقىنا جانە پرەزيدەنت مىرزاعا قوناقجايلىعى ءۇشىن العىس ايتامىن. ءبىز بۇگىن ءبىرقاتار اسا ماڭىزدى ماسەلەلەر تۋرالى كەڭ اۋقىمدى كەلىسسوزدەر وتكىزدىك. پىكىر الماسۋ مازمۇندى، ماعىنالى بولدى. پرەزيدەنت رەجەپ تاييپ ەردوعان ءبىلىمدى، اسا بەدەلدى ساياساتكەر. ونىڭ كوزقاراسى كەڭ، سوندىقتان بۇل كىسىنىڭ پىكىرلەرى وتە قۇندى.
تۇركيا – ءبىزدىڭ تاۋەلسىزدىگىمىزدى العاشقى بولىپ مويىنداعان ەل. ونى قازاق حالقى ەشقاشان ۇمىتپايدى. قازاقستان –تۇركيادان ەشقاشان دا، ەشقانداي دا زيان شەكپەگەن ەل. ءالى دە سولاي جالعاسىپ كەلەدى.
قازاقستان مەن تۇركيا – تامىرلاس، باۋىرلاس، دوستاس مەملەكەتتەر. ءبىزدىڭ شەتەلدەگى العاشقى ەلشىلىگىمىز انكارادا اشىلعان. مۇنىڭ سيمۆولدىق ءمانى زور. قازاقستان مەن تۇركيا اراسىندا ديپلوماتيالىق قاتىناس ورناعانىنا بيىل 30 جىل تولدى. وسى كەزەڭدە ءبىزدىڭ ىنتىماقتاستىعىمىز نىعايىپ، ستراتەگيالىق سەرىكتەستىككە اينالدى. اۋقىمدى شارتتىق-قۇقىقتىق نەگىز قالىپتاستى. ساۋدا-ەكونوميكالىق جانە مادەني-گۋمانيتارلىق بايلانىس، جاھاندىق جانە وڭىرلىك قۇرىلىمدار اياسىنداعى ىقپالداستىق ويداعىداي دامىپ كەلە جاتىر، – دەدى قازاقستان پرەزيدەنتى.
قاسىم-جومارت توقايەۆ التايدان باستالعان قازاق كوشىنىڭ قاسيەتتى انادولى توپىراعىنا جەتكەنىنە بيىل 70 جىل تولعانىن اتاپ ءوتىپ، قانداستارىمىزدى سول كەزدەگى تۇركيا پرەمەر-مينيسترى ادنان مەندەرەس قۇشاق جايا قارسى العانىن ەسكە الدى.
Dalanews.kz سايتىنىڭ تەلەگرام ارناسىنا تىركەلە كەتۋدى سۇرايمىز:
![](/uploads/images/20240127183611072.jpg)
سونداي-اق جاقىندا الماتى قالاسىنداعى كوشەگە تۇركيانىڭ وسى ءبىر اسا كورنەكتى ساياساتكەرىنىڭ ەسىمى بەرىلگەنىن ايتتى.
– تۇرىك جۇرتى قازاقستانعا ءاردايىم تىلەكتەس ءارى جاناشىر ەكەنىن بىلەمىز. مۇنى ۇدايى سەزىنەمىز. بۇگىنگى ەكىجاقتى كەزدەسۋدىڭ ناتيجەسىندە ماڭىزدى كەلىسىمدەرگە قول جەتكىزدىك. بۇل ساپار ساياسي، ساۋدا-ەكونوميكالىق، ينۆەستيسيالىق، مادەني-گۋمانيتارلىق، اسكەري-تەحنيكالىق جانە باسقا دا سالالارداعى ىنتىماقتاستىقتى ودان ءارى نىعايتۋعا مۇمكىندىك بەرەدى. اسىرەسە، ترانسكاسپيي حالىقارالىق كولىك باعدارىنىڭ الەۋەتىن تولىق پايدالانۋعا ەكى ەل دە مۇددەلى، – دەدى مەملەكەت باسشىسى.
پرەزيدەنت گەوساياسي احۋال ۋشىعا تۇسكەن قازىرگى كەزدە مۇنىڭ ءمان-ماڭىزى ايرىقشا ەكەنىن ايتىپ، قازاق-تۇرىك ىنتىماقتاستىعىن جاڭا دەڭگەيگە كوتەرۋ ءۇشىن كەڭەيتىلگەن ستراتەگيالىق سەرىكتەستىك تۋرالى بىرلەسكەن مالىمدەمە قابىلداعاندارىن جەتكىزدى.
سونىمەن قاتار ءتۇرلى سالاداعى بايلانىستى جاڭا بەلەسكە كوتەرەتىن ماڭىزدى ۇكىمەتارالىق قۇجاتتارعا قول قويىلدى.
– بۇل – باۋىرلاستىعىمىزدى بەكەمدەپ، ىقپالداستىعىمىزدى نىعايتا تۇسەتىن ماڭىزدى قادام. قازاقستان مەن تۇركيا ەۋرازيا قۇرلىعىندا بەيبىتشىلىك پەن تۇراقتىلىقتى قامتاماسىز ەتۋگە باسا ءمان بەرەدى. وسى رەتتە، ەكى ەل حالىقارالىق جانە ايماقتىق دەڭگەيدە تىعىز ىقپالداستىق ورناتقان، – دەپ اتاپ ءوتتى قاسىم-جومارت توقايەۆ.
پرەزيدەنتتىڭ پايىمىنشا، ۇكىمەتارالىق ەكونوميكالىق كوميسسيا ساۋدا-ەكونوميكالىق سەرىكتەستىكتى نىعايتۋعا زور سەپتىگىن تيگىزەدى. سونداي-اق، تۇركى مەملەكەتتەرى ۇيىمى ماڭىزدى ءرول اتقارادى.
– بىلتىر تۇركىتىلدەس مەملەكەتتەردىڭ ىنتىماقتاستىق كەڭەسى تولىققاندى ۇيىم بولىپ قايتا قۇرىلعانى قۋانتارلىق جايت. بۇل – بارىمىزگە ورتاق جەتىستىك. ءبىز وسى ۇيىمنىڭ اياسىنداعى جۇمىستى جالعاستىرا بەرۋگە مۇددەلىمىز. سونىمەن قاتار، ءبىلىم جانە مادەنيەت سالاسىنداعى بايلانىستى ودان ءارى دامىتامىز دەپ كەلىستىك. بۇل ۇيىم قازاقستان ءۇشىن اسا ماڭىزدى، سوندىقتان ءبىز ونى ۇنەمى قولدايمىز.
جالپى، قازاقستان مەن تۇركيانىڭ جان-جاقتى قارىم-قاتىناسىن نىعايتۋعا مول مۇمكىندىك بار. بۇگىنگى ماڭىزدى ۋاعدالاستىقتار – سونىڭ ايقىن كورىنىسى.
مەنىڭ مەملەكەتتىك ساپارىم قازاقستان مەن تۇركيا اراسىنداعى قارىم-قاتىناسقا تىڭ سەرپىن بەرەتىنىنە كامىل سەنەمىن، – دەدى مەملەكەت باسشىسى.
پرەزيدەنت وسى بايلانىستى ودان ءارى نىعايتۋ ءۇشىن قازاقستاندا جوعارى دەڭگەيدە ەكىجاقتى كەزدەسۋ وتكىزۋ اسا ماڭىزدى دەپ اتاپ، تۇركيا پرەزيدەنتى، رەجەپ تاييپ ەردوعاندى ەلىمىزگە ساپارمەن كەلۋگە شاقىرعانىن جەتكىزدى. سول كەزدە نۇر-سۇلتان قالاسىندا جوعارى دەڭگەيدەگى ستراتەگيالىق ىنتىماقتاستىق كەڭەسىنىڭ ءتورتىنشى وتىرىسى وتكىزىلمەك.
قاسىم-جومارت توقايەۆ ءسوزىنىڭ سوڭىندا ەكى ەلدىڭ ءاردايىم بىر-بىرىنە قولداۋ كورسەتە وتىرىپ، تابىسقا بىرگە جەتەتىنىنە سەنىم ءبىلدىردى.
تۇركيا پرەزيدەنتى رەجەپ تاييپ ەردوعان ەكى ەل اراسىنداعى ىنتىماقتاستىقتى ودان ءالى ىلگەرىلەتۋگە دايىن ەكەنىن اتاپ ءوتتى.
– قازاق باۋىرلارىمىزدىڭ تۇراقتىلىعى مەن تىنىشتىعىنا اسا مۇددەلى ەكەنىمىزدى جانە ساۋدا-ەكونوميكالىق، مادەنيەت، قاۋىپسىزدىك سالالارىندا بىرگە بولاتىنىمىزدى ايتقىم كەلەدى. ءبىز ەكىجاقتى جانە كوپجاقتى قاتىناستارىمىزدى نىعايتا بەرەمىز دەپ كەلىستىك. بۇۇ، يسلام ىنتىماقتاستىق ۇيىمدارىنداعى بىرلىگىمىزدى ارتتىرامىز. اتامەكەنىمىزدەن كەلىپ وتىرعان پرەزيدەنت قاسىم-جومارت توقايەۆ مىرزا مەن ونىڭ قۇرمەتتى دەلەگاسياسىنىڭ كەلگەنىنە اسا قۋانىشتىمىز، – دەدى تۇركيا پرەزيدەنتى.
ەكى ەل باسشىلارىنىڭ بىرلەسكەن مالىمدەمەسىن اقوردانىڭ سايتىنان وقي الاسىز.