Memleket basshysy eń aldymen ózin qasietti Anadoly jerine memlekettik saparmen kelýge shaqyrǵany úshin Túrkiia Prezidenti Rejep Taiip Erdoǵanǵa zor rizashylyǵyn bildirdi.
– Túrik halqyna jáne Prezident myrzaǵa qonaqjailyǵy úshin alǵys aitamyn. Biz búgin birqatar asa mańyzdy máseleler týraly keń aýqymdy kelissózder ótkizdik. Pikir almasý mazmundy, maǵynaly boldy. Prezident Rejep Taiip Erdoǵan bilimdi, asa bedeldi saiasatker. Onyń kózqarasy keń, sondyqtan bul kisiniń pikirleri óte qundy.
Túrkiia – bizdiń táýelsizdigimizdi alǵashqy bolyp moiyndaǵan el. Ony qazaq halqy eshqashan umytpaidy. Qazaqstan –Túrkiiadan eshqashan da, eshqandai da ziian shekpegen el. Áli de solai jalǵasyp keledi.
Qazaqstan men Túrkiia – tamyrlas, baýyrlas, dostas memleketter. Bizdiń sheteldegi alǵashqy elshiligimiz Ankarada ashylǵan. Munyń simvoldyq máni zor. Qazaqstan men Túrkiia arasynda diplomatiialyq qatynas ornaǵanyna biyl 30 jyl toldy. Osy kezeńde bizdiń yntymaqtastyǵymyz nyǵaiyp, strategiialyq seriktestikke ainaldy. Aýqymdy sharttyq-quqyqtyq negiz qalyptasty. Saýda-ekonomikalyq jáne mádeni-gýmanitarlyq bailanys, jahandyq jáne óńirlik qurylymdar aiasyndaǵy yqpaldastyq oidaǵydai damyp kele jatyr, – dedi Qazaqstan Prezidenti.
Qasym-Jomart Toqaev Altaidan bastalǵan qazaq kóshiniń qasietti Anadoly topyraǵyna jetkenine biyl 70 jyl tolǵanyn atap ótip, qandastarymyzdy sol kezdegi Túrkiia Premer-Ministri Adnan Menderes qushaq jaia qarsy alǵanyn eske aldy.
Dalanews.kz saitynyń Telegram arnasyna tirkele ketýdi suraimyz:
Sondai-aq jaqynda Almaty qalasyndaǵy kóshege Túrkiianyń osy bir asa kórnekti saiasatkeriniń esimi berilgenin aitty.
– Túrik jurty Qazaqstanǵa árdaiym tilektes ári janashyr ekenin bilemiz. Muny udaiy sezinemiz. Búgingi ekijaqty kezdesýdiń nátijesinde mańyzdy kelisimderge qol jetkizdik. Bul sapar saiasi, saýda-ekonomikalyq, investitsiialyq, mádeni-gýmanitarlyq, áskeri-tehnikalyq jáne basqa da salalardaǵy yntymaqtastyqty odan ári nyǵaitýǵa múmkindik beredi. Ásirese, Transkaspii halyqaralyq kólik baǵdarynyń áleýetin tolyq paidalanýǵa eki el de múddeli, – dedi Memleket basshysy.
Prezident geosaiasi ahýal ýshyǵa túsken qazirgi kezde munyń mán-mańyzy airyqsha ekenin aityp, qazaq-túrik yntymaqtastyǵyn jańa deńgeige kóterý úshin Keńeitilgen strategiialyq seriktestik týraly birlesken málimdeme qabyldaǵandaryn jetkizdi.
Sonymen qatar túrli saladaǵy bailanysty jańa beleske kóteretin mańyzdy úkimetaralyq qujattarǵa qol qoiyldy.
– Bul – baýyrlastyǵymyzdy bekemdep, yqpaldastyǵymyzdy nyǵaita túsetin mańyzdy qadam. Qazaqstan men Túrkiia Eýraziia qurlyǵynda beibitshilik pen turaqtylyqty qamtamasyz etýge basa mán beredi. Osy rette, eki el halyqaralyq jáne aimaqtyq deńgeide tyǵyz yqpaldastyq ornatqan, – dep atap ótti Qasym-Jomart Toqaev.
Prezidenttiń paiymynsha, Úkimetaralyq ekonomikalyq komissiia saýda-ekonomikalyq seriktestikti nyǵaitýǵa zor septigin tigizedi. Sondai-aq, Túrki memleketteri uiymy mańyzdy ról atqarady.
– Byltyr Túrkitildes memleketterdiń yntymaqtastyq keńesi tolyqqandy uiym bolyp qaita qurylǵany qýantarlyq jait. Bul – bárimizge ortaq jetistik. Biz osy uiymnyń aiasyndaǵy jumysty jalǵastyra berýge múddelimiz. Sonymen qatar, bilim jáne mádeniet salasyndaǵy bailanysty odan ári damytamyz dep kelistik. Bul uiym Qazaqstan úshin asa mańyzdy, sondyqtan biz ony únemi qoldaimyz.
Jalpy, Qazaqstan men Túrkiianyń jan-jaqty qarym-qatynasyn nyǵaitýǵa mol múmkindik bar. Búgingi mańyzdy ýaǵdalastyqtar – sonyń aiqyn kórinisi.
Meniń memlekettik saparym Qazaqstan men Túrkiia arasyndaǵy qarym-qatynasqa tyń serpin beretinine kámil senemin, – dedi Memleket basshysy.
Prezident osy bailanysty odan ári nyǵaitý úshin Qazaqstanda joǵary deńgeide ekijaqty kezdesý ótkizý asa mańyzdy dep atap, Túrkiia Prezidenti, Rejep Taiip Erdoǵandy elimizge saparmen kelýge shaqyrǵanyn jetkizdi. Sol kezde Nur-Sultan qalasynda Joǵary deńgeidegi strategiialyq yntymaqtastyq keńesiniń tórtinshi otyrysy ótkizilmek.
Qasym-Jomart Toqaev sóziniń sońynda eki eldiń árdaiym bir-birine qoldaý kórsete otyryp, tabysqa birge jetetinine senim bildirdi.
Túrkiia Prezidenti Rejep Taiip Erdoǵan eki el arasyndaǵy yntymaqtastyqty odan áli ilgeriletýge daiyn ekenin atap ótti.
– Qazaq baýyrlarymyzdyń turaqtylyǵy men tynyshtyǵyna asa múddeli ekenimizdi jáne saýda-ekonomikalyq, mádeniet, qaýipsizdik salalarynda birge bolatynymyzdy aitqym keledi. Biz ekijaqty jáne kópjaqty qatynastarymyzdy nyǵaita beremiz dep kelistik. BUU, Islam yntymaqtastyq uiymdaryndaǵy birligimizdi arttyramyz. Atamekenimizden kelip otyrǵan Prezident Qasym-Jomart Toqaev myrza men onyń qurmetti delegatsiiasynyń kelgenine asa qýanyshtymyz, – dedi Túrkiia Prezidenti.
Eki el basshylarynyń birlesken málimdemesin Aqordanyń saitynan oqi alasyz.
